آذربایجان ادبیاتی

اويونجاق قيز

sonbaharim — Sat, 21 Mar 2009 17:54:35 GMT

اويونجاق قيز

يازان : رسول ملك زاده

قوللاري دوشدو. 27 دانا قيراغي خمير لاواش ، اوزون بير يول ، هله بيرده اؤزو اوزاديردي يولو ، او كوچه دن بو كوچه يه ، ائودن اوزاق ، بير الينده چؤره ك ، بيرينده قولچاق ، اويونجاق ، اوزون يولدا مين بير توزاق ، ديلدن دوشوب ، سس سيز آما ، كي نه اولا؟ ، ائوده كي اويون قورتولا ، او اويوندا يئر آلمايا ، اويونجاغي اونا يئتر...

ايللر اؤنجه ، بو اويونلارين سونوجو ، او اكيلدي ، آناسي نين آج قارنينا. او قاريندان پايين آلدي ، يئره اندي. او اويونون بير پارچاسي آناسي ايدي. او بيريسي؟ ، او بيريسي ، نه بيليم من.

بلكي ده يئتدي ياشي واردي ، ياتميش ايدي ، يان اوتاقدان گلن سس لردن اوياندي ، قولاق آسدي ، سسين بيري آناسي ايدي ، او بيريسي ، اويون داشي. آستا – آستا ، او اوتاغين تخته قاپي جيريغيندان سئير ائديردي ، او اويونو داها اؤنجه گؤرمه ميشدي . يازيق اوشاق ، آنا آجي چكير دئيه ، قاچماز مي اونون يانينا؟ ، بير آندا اويون پوزولوب ، آناسينين اويون داشي ، قيزين باشينا ال چكدي ، اوزون قيرتدي ، آنا اونو ايته له ييب اوشاغيني قوجاقلادي ، چيريل – چيلپاق. آنليندا ته ر ، جيم – جيلاق سو ، اوشاغي اوزاق لاشديردي ، اويون داش اوجادان گولدو...

ائله او گوندن بويانا ، او اويون لار سيراسيندا ، ائوده قالماق ياساق لاندي ، قيزجيغازا.

***

او ، بؤيويوب ، گؤزه ل بير قيز ، يئنه بيرالينده چؤره ك ، بيرينده اويونجاق ، اويونجاق عئيني اويونجاق ، اويون داش دا. او ، ايللرين يورغونودور ، او كوچه دن بو كوچه يه ، جيبينده پول ، اويون داشين وئردي يي پول ، آنليندا ته ر ، گؤزونده ياش ، دونن گئجه آناسينين دئدي يي سؤز ، اوره يينده يانان بير كؤز؛

" صاباح دان ، من چؤره يه چيخارام ، اويونجاق لا ،

سن قال ائوده ، اويون داش لا..."

يانار داغ

sonbaharim — Sun, 01 Feb 2009 13:23:18 GMT

يانار داغ

يازان : رسول ملك زاده

پهلوي آپارتايديني ييخان و هر زامان آزادليق اوغروندا جانيندان كئچه ن ،

شانلي ميللتيمه...

(( 1 ))

يانار داغا گؤز تيكيب دير ، ياشيل باغ

بير ميللتين سون اومودو ، يانار داغ

توركمنين چايينا يان باخيردي

اودلاييردي گلستاني ، يانار داغ...

(( 2 ))

كيم بيلير كي ، هانسي گوج گونش اؤلكه سينده ، داغدا آچان گوله سئوگي يئتيشديرير ، اومود سپير ، كي بو قارانليق لار ايچينده يئنه ده كوسمور بو اؤلكه نين اؤكسوز اينسانلارينا ، يئتيم قيز اوغلان لارينا. هله بيرده باشيني اوجا توتور ، اينجه بئلين بورور ، گرير كؤكسون ، كي باخين ، قارانليغين اؤنونده ده دايانيلير.

اونون داورانيشينا قارشي ، قارانليق دان بيري چيخير ، ساغا – سولا بونو آيدير :

" داغ گولونون عؤمرو آزدير ، گونش اونا بئله ياردير ، اوزون يولدا تك قوياندير ، بيردن باتير، قارانليغا مئيدان وئرير."

بو سؤزلره ، اؤكسوز اينسانلار اينانير ، گونش باتير ، گول سارالير ، داغ باغيرير ، آلوو ساچير.

بوتون بونلار ، ايللر اؤنجه دن دئييله ن بير اؤيكويو يادا سالير...

(( 3 ))

ائل اوزاني ، ديرناقلاري ديللري

اودا چكير اوره كلري تئللري

قان آخيري اوره ييندن ديرناغا

بيلمه م نئجه سسله نديرير تئللري...

(( 4 ))

كيم بيلير كي ، او اوزان عؤمرونون قاچ باهاريني او داغين اته يينده توكه تدي ، داغ گولونو گؤرمه يينجه ، داغ باشينا گؤز تيكديردي ، كي نه اولا؟ ، يا گون چيخا ، گول اويانا ، يا داغ پاتلايا – چاتلايا ، آلوو ساچا ، اوزان قالخا ، اؤكسوز اينسانلارا وارا ، بو گؤزل خبري آپارا ، قسمت اولا ، اوجاغي سؤنموش آنانين قاپيسيني بيري چالا ، بير دمه ت چيچك الينده ، بويور دئيه ، آصلان آنا.

هردن دومانليق اولونجا ، يازيق اوزان اومودلنير ، يوخ اولونجا ، كدرلنير ، سينيق سازين قوجاقلايير ، سيزيلدايير:

- نييه اومودومو كسيرسن ، نييه؟؟؟...

(( 5 ))

كيم بيلير كي ، اونلارين گوناهي نه يدي .

من بيله لي ، بير گون بير نئچه قيز – اوغلان توپلانميشلار ، اوزون – اوزون دوشونموشلر ، تاشينميشلار ، قارانليق دان اوسانميشلار ، ساغا – سولا بير باخميشلار ، كيمسه يوخ كي ، داغين باغرين سؤكوب چيخان سودان مدد ديله ميشلر ، سو اونلارا هاي وئرينجه ، اونلاردا آند ايچميش سووا ، " سو آند ".

قارا گوجلر اولانلاري ائشيدينجه ، ال – آياغا دوشموشلر ، هاميسيني توتوقلاييب ، سوسوزلوقدان اؤلدورموشلر. سوچلاري ايسه " سوگند " دئيه بير شئ ايدي...

(( 6 ))

كيم بيلير كي ، آرادان نئچه ايل كئچدي ، اوزان آرزيسينا چاتدي ، گون اولدوزو يولا دوشدو ، آيين يانيندا داياندي ، داغين دا صبري توكه ندي ، داغ كوكره دي ، اؤكسوزلري اويانديردي ، هر تؤكولن سوچسوز قانا ، قان ديله دي...

شیشمان – 3

sonbaharim — Fri, 21 Nov 2008 08:49:37 GMT

شیشمان – 3

یازان : رسول ملک زاده

***

« قیزینی دؤومه ین ، دیزینی دؤوه ر!...»

***

سون گونلرده منیم یازیلاریم اؤلکه ده ساغیر قولاقلارا یئتیشمیش ، بعضی لری به یه نمه میش اونلاردان بعضی لری تهدید یاغدیرمایا باشلامیش ، نه ایمیش ، هرکس قیسمتی قدر یاشارمیش ، بو یازیلانلار یانلیش.

نه دئمک قیسمتی بو قدرمیش ، اصلینده دوزه ن یانلیش ، آما بونو آنلایان یوخ موش...

بو آرادا ساققاللی آغا دا آرایا گیرمیش ، بویور ائتمیش:

- اسکی دن ده بئله کوفورلری یازانلار وارمیش ، آنجاق مؤمون لرین همتی له هامیسی بو اؤلکه دن سورون موش.

سونوندا بو ایشلره قاتیلانلار ، قوتسال بیر بیرلیکه سؤز وئرمیش...

***

آخشام اوستو شیشمان ، بوگونکو آل – وئرلرینین حئساب – کیتابینی گئده رکن ، قادینین خیال قوشو بام – باشقا یئرلرده اوچوردو ، بلکی ده اونوتماق ایسته ییردی ، اؤزونون ده بئله بیر آل – وئرلرین قوربانی اولدوغونو ، آتاسینین شیشمان لا آل – وئری سونوجو بو ائوه آیاق باسدیغینی...

دوشونوردو آما دوشونمک اونون اوچون ، سئویشمک دن یورولان شیشمانین خورولتو سسی له ، گؤزلرینی زیلله مک دیر گؤیه ، گؤی ده نه گؤی ، قارا دیره کلرله باسدیریلمیش بیر تاوان ، گئری قالان هر شئ یالان...

او زامانلار سئودا نه دیر دئیه سوروش سایدین ، قونشو قیزینین بیر اوغلان لا یوخاری کنده قاچماسینی دوشونه ردی ، ساده جه. سونرا ایکی کندین بیر – بیرینین جانینا دوشوب ، بؤیوک قان داعواسی. بیرده آتاسینی خاطیرلاییردی کی او زامانلار قونشو ائوینده کی ییغینجاق لارین ان باشدا اوتوران لاردان بیری ایدی ، و باشینی یئره دیکمیش قونشونو هده له ینلردن بیری. کی سنین قیزین بو کندین آبریسی له اویناییب ، اؤز الین له بو ایشی تمیزله ، دئیه. ایت هوره ر ، کروان کئچه ر. قونشو بو سؤزلری بوش وئره بیله ردی ، ندنسه کؤهنه سیلاحینی آلیب گئتدی ، و بیر نئچه گون سونرا ، کندین قبریستانیندا قونشو قیزینین قانلی گؤوده سینی یئره گؤمدولر ، و کیمسه او تعزیه ده ، " آللاه رحمت ائله سین " دئمه دی ، ساده جه قونشونو اؤیوردولر ، کیشی لیک ائتدین دئیه...

هله بو آرادا ، بیری لری چیخیب دا اؤج آلماق ایسته رلر ، و بوتون بو قارما – قاریشیق ایشلرین آراسیندا ، قونشو ائوینین یانیقلی آناسی اؤله ر ، ندنسه ، و بیر نئچه آی سونرادا قونشو ائوه یئنی بیر خانیم بویور ائده ر ، نه گؤزه ل سئودالاردیر بونلار...

آردی وار...

شيشمان – 2

sonbaharim — Fri, 24 Oct 2008 12:23:18 GMT

شيشمان – 2

يازان : رسول ملك زاده

***

« سانكي زامان دايانيب دير ، بو خارابادا...»

***

او ، نفس چكير هله ده ،

دؤزوم لودور درد كدره

نييه يازيق هده له نه؟

قارغيش اولسون بو سنته!

***

اصلينده هئچ ده دئيينگن دئييل دي بو قادين. حتي گؤي لر ائشيتمه سين دئيه ، ساده جه بير آه چكردي ، كدرلي آنلاردا. چونكو قورخاردي ، تانري نين غضبيندن ، شيشمانين كؤته ييندن!

دوغروسو هئچ ده يونگول دئييل دي شيشمانين الي. قادين داديب دير ، اونونچون اونون آغيرليغين بيلمه لي. نه ائتمه لي ، سؤز ائشيتمه لي ، ساده جه دؤزمه لي. ايلك گوندن دونيا بئله دؤنمه لي.

هر آن سيخيشديريردي اونو ، سانكي بوغازينا دولاشميش بير سيجيم ، قارالديردي ياشاميني ، همده نه بيچيم!

هر آن سينديريردي غرورونو ، آغزين آچيب دانيشماق ايسته ييردي آنجاق يانينداكي ديشله ييردي ديلينين اوجونو ، و باشلامادان يئنيليردي...

اوندان دير كي ، بو اؤلكه ده بوتون آجي سؤزلر اوره كلره قالانار ، قبيرلره ياتار ، بعضي لري اوردا اويانار ، اود توتار يانار ، ديشاري يا داشار ، او اوزده ن دير كي ، بعضي شيطان پارچالارينين قبيرلرينه ياخينلاشماق اولماز ، چونكو اوره ك يارالاري قبيرده ده ساغالماز...

شيشمان قالخير ، نه تانري يا شوكور قيلير ، نه قادينا ، بو ، تاريخين اونا وئردي يي اوستونلوك دور...

آردي وار...

علي

sonbaharim — Tue, 16 Sep 2008 20:19:18 GMT

او ، هر زامان يالنيز ايدي...

شيشمان – 1

sonbaharim — Thu, 28 Aug 2008 14:01:03 GMT

شيشمان – 1

يازان : رسول ملك زاده

***

بيلميرم يئر كوره سينين هانسي ديب بوجاغيندا ، هانسي ديني تؤره نده ، سسله نيردي جماعته ، قادين شيطان پارچاسيدير دئيه ، ساققاللي آغا.

نه دئميشلر ، سورو دالي قاييتسا ، آريق آخسار قاباغا دوشه ر!

حالبوكي همين جماعت هاوا قارالينجا او شيطان پارچالاريندان دويموردولار ، سانكي گئجه لر شيطان ، تانري يا چئوريليردي!...

***

... سونرا راحات بير نفس آليب پالتارلاريني گئيدي. بو قاپ – قارانليق گئجه ده ، بوندان آرتيق گؤرولمك ايسته ميردي ، يانيندا ياتان قادينين طرفينده ن. پالتارلي ياتان شيشمان تانيديق بيريسي ايدي ، او معلوم دين تؤره نينده ، اؤنده اگله شنلردن بيريسي ايدي. گئجه ياري يي كئچميشدي ، قادين ديلدن دوشموشدو ، آنجاق شيشمان سو ايسته يينجه ، يينه ده درحال آياغا قالخيب يئرينه گتيرمه سيني ده اونوتمادي. شيشمان سويو قانتاريب سونرا ياتدي ، قادين گؤيده كي اولدوزلارا بير داها باخدي ، اوزاق دوشه ن رؤيالارين دوشونوركن ، گؤز ياشلاري يينه آخدي ، سانكي گؤز گيله لرينه اولدوز تاخدي ، بو كدر دولو آنلارا ائشليك ائتدي ، شيشمانين خورولتو سسي. اتاغي باشينا آلميشدي.

سونوندا گون دوغور ، شيشمان اسنه يه – اسنه يه قالخير ، يينه هر شئ اونا حاضير ، سانكي قولاق لاري ساغير ، اونون هر اداسي بو ائوده بيرينين اوره يين قازير.

ائوي سس سيزليك بورويوب ، ساده جه شيشمانين يئمك يئمه سسي ، چايي خورولداتماسي ، اوجادان گه ييرمه سي ، ايسكاني نعلبكي يه چيرپماسي ، يعني چاي گتير ، تئز گتير!

ثانيه لر آخديقجا ، يئني توزاقلار قورولور ، شيشمان يينه بويورور ، قادين نفس آلديقجا.

گله نك دووارلاري آلتيندا ازيلميش بير قادين دير بو قادين ، او دووارلارا ميخ لانميش ساعاتلارين هر ثانيه سي اونا توزاق ، نييه بيز ده او دووارلارداكي ساعاتلارا بير ميخ ووراق ، نييه؟

زامان اونون اسارتي له گئدير ، او اسارته گوج وئرير ، دستك وئرير. بو آرادا شيشمان دويمور ، يينه ايستير ، نه لر ايستير...

شيشمان قالخير ، نه تانري يا شوكور قيلير ، نه قادينا ، بو ، تاريخين اونا وئردي يي اوستونلوك دور...

آردي وار...

ياخشي پادشاهين ناغيلي – 2

sonbaharim — Sat, 16 Aug 2008 10:58:18 GMT

ياخشي پادشاهين ناغيلي – 2

يازان : آنار رضايئو

كؤچوره ن : رسول ملك زاده

گونلرين بير گونو باش وزير پاپاغيني قويوب قاباغينا فيكيرلشدي ، خيلي فيكير ائديب آنلادي ، قاندي كي ، پادشاه هئچ بير واخت اؤلوب – ائله ين دئييل و دئمه لي بو گرك تخت – تاجدان گؤزونو چكسين. باش وزير ايسه يامان پادشاه اولماق ايسته ييردي. پادشاه اولماقدان دا آرتيق پادشاهين آروادينا گؤزو دوشموشدو.

پادشاهين آروادي بير گؤزه ل ايدي ، بير گؤزه ل ايدي ، ديلين – سؤزنن دئييب قورتارماق اولماز. دونيايي عالمده تايي – برابري يوخ ايدي : اينجه ميان ، نازك بدن ، بوللور بوخاق ، آلما ياناق ، گل مني گؤر ، درديمدن اؤل. آغزينا قوشا بادام سيغماز. مرمر سينه سينده ناز – نازي ايپك پالتارلارين آلتيندان بير جوت شاماما باش قالديريب " منم – منم " دئيير. ياناق لار – ياقوتون قيراق لاري كيمي ، ائله بيل قار اوستونه قان داميب ، قاش لار – قورولو ياي ، كيرپيك لر ياي دان چيخميش اوخ كيمي ائله اوزون دو كي ، تمام گؤزونون اوستونو توتوب ، ساچلار شوه كيمي. بلي ائله نازك ايدي كي ، گيلاس يئسه دئيه ردين بويلودور. بوغازي ائله ظريف ايدي ، سو ايچسه گؤرونه ردي ، يئري ينده يئره ناز ائله يير. پادشاه دا اونو يامان ايسته ييردي. يامان دا قيسقانج ايدي پادشاه. لاپ آرواديني خوروزدان گيزله دندي. قويمازدي آروادينين اوستونه بير ائركك ميلچك قونسون.

بلي ، باش وزير ، نه فند ايشلتدي سه ، فرصت تاپدي ، پادشاهين آروادينان خلوتي گؤروشدو. نه دئدي اونا ، نه بويون اولدو ، نه وعدلر وئردي ، دئيه بيلمه رم ، الغرض ، گونلرين بير گونو قوشولوب قاچديلار. بيلميرم مغربه يا مشرقه.

باش وزير ، داها دوغروسو تزه پادشاه وعدينه خيلاف چيخمادي – آروادي نين خورولتوسونو ماقنيتوفونا يازدي و بو خورولتونو مملكتين هيمني اعلان ائتدي.

هر گئجه تزه مملكتين راديوسو خورولتو – هيمني وئريردي و تزه پادشاه لذت له قولاق آسيردي. آخي او جاوان آرواديني يامان سئويردي. سئونده ايسه خورولتونو دا موسيقي كيمي دينله ييرسن. بونلار بوردا سئويشمه ده اولسون ، سيزه كيمدن دئييم ، قوجا پادشاهدان.

قوجا پادشاها آروادينين وفاسيزليغي و باش وزيرين خيانتي يامان يئر ائله ميشدي. او اؤز رعيتينه ياد راديونو دينله مه يي قاداغان ائتميشدي. آما گئجه لر خلوت ده بوتون اهالي سابق پادشاه آروادينين خورولتوسونا قولاق آسيردي. بعضي لري اونا گؤره قولاق آسيرديلار كي ، ماراقلي دي : آخي هئچ كيم پادشاه آروادينين خورولتوسونو بوندان اقدم ائشيتمه ميشدي. باشقالاري آجيقجان قولاق آسيرديلار : عجب اولدو بيزيم مايماق پادشاها ، ياخشي ائله دي آرواد ، اونو قويوب قاچدي. بعضي لري ده اوره ك آغريسي لا دينله ييرديلر : آخي نئجه اولدو كي ، بيزيم مودريك پادشاهيميز بوجور آروادي الدن وئردي ، بوجور ملاحتلي خورولتونو هيمن ائله مك عاغلينا گلمه دي.

آما ياد راديونو هاميدان گيزلي جه پادشاه اؤزوده توتوردو. معين ساعاتلاردا پادشاه كيريميشچه آرادان چيخيردي. ترانزيستورونو گؤتوروب سارايين معلوم يئرينه گيريردي. او ، راديونو قورور ، ايللرله دينله دي يي و ابدي ايتيردي يي خورولتونو سانكي يئني دن ائشيدير و اوزاق گنجليك گونلرينين خاطيره لرينه داليردي. كئچيب گئده نلري بير – بير يادينا ساليردي – آروادي لا رقص مئيدانچاسيندا ايلك تانيشليغي ني ، اولدوزلو ماي گئجه سينده اونو تراموايا اؤتورمه سي ، سئوگيلي سينين ساچلارينين و آغاجلارين او آخشام كي قوخوسو و ايلك اؤپوش – بوللور سارايين قارانليق دهليزينده كي ايلك اؤپوشلري... هر شئ ، بير –بير گليب دوروردو پادشاهين گؤزلري قاباغيندا. پادشاهين گؤزلري ياشاريردي. آخي پادشاه يامان يوخا اوره ك پادشاه ايدي.

خورولتو كسيلير و گئجه دوشوردو. قوجا ، يالقيز پادشاهين يالقيز ياتاغينداكي يالقيز اوزون گئجه سي. ياتاقدا آرتيق آروادي يوخ ايدي ، بيره لر ، تاختا بيتيلر ده هاراسا غئيب اولموشدو. آما اونسوز دا ايندي پادشاه ياتا بيلميردي. بوتون گئجه ني گؤزونو ده قيرپميردي. يوخوسوزلوق بلاسينا دوچار اولموشدو. قيش دوشه نده پادشاهين حالي لاپ پيس اولدو. اوزون قيش گئجه لري اوزانديقجا اوزانيردي. يوخوسوز پادشاه گؤزلريني داما زيلله ييردي – ناخيشلي دام گؤيلر قدر اوزاق ايدي. پادشاه چارپاييسيندا اوزانيب دوشونوردو. يامان دوشونن پادشاه ايدي. او دوشونوردو : نه اولاردي ، هئچ اولماسا بيرجه ساعات ياتايديم ، يوخومدا دا آرواديم وفاسيزي گؤره يديم. نه گؤزه ل اولاردي ، او وفاسيز گلردي يوخوما ، يانيما ، بو ساراييما ، اؤلكه مه. هئچ كس ده بيلمزدي ، هئچ كسين ده عاغلينا گلمزدي ، هئچ نه ده لازيم اولمازدي – نه دانيشيق ، نه باريشيق ، نه صؤحبت ، نه غئيبت...

آما بيردن پادشاهين عاغلينا گلدي كي ، ياخشي ، آخي سابق آروادي باشقا بيريسينين ده يوخوسونا گيره بيلر. پادشاه بير آزدا فيكيرلشدي و لاپ دلي اولدو : بيردن دوغرودان آروادي كيمينسه يوخوسونا گيرير ، باخ ائله بو ساعات رعيت لريندن بيري اونو يوخودا گؤرور. بلكه لاپ ائله تزه باش وزيريم گؤرور اونو. پادشاهي اود گؤتوردو. او ، يئريندن سيچرادي. عاديل ، رحم ديل و ساكيت پادشاه لاپ اؤزوندن چيخميشدي. بئله خيانتي او هئچ كسه باغيشلايا بيلمزدي – نه آروادينا ، نه بيرينجي وزيرينه ، نه آخيرينجي فايتونچويا. پادشاه درحال تدبير تؤكدو. او يامان تئز – تدبير پادشاه ايدي : بوتون رعيت – باش وزيردن آشپازا قدر هر سحر يازيلي صورت ده گئجه كي يوخوسونون مضمونونو پادشاها تقديم ائتمه ليدير.

بوگوندن اعتبارن پادشاهين ايشي – پئشه سي يوخولارين مضمونونو اوخوماق ايدي. چوخوسونون مضمونو قاتما قاريشيق ، دولاشيق و سفئه ايدي. تئزليكله بو پادشاهين پيسي ني ووردو. او قرارا گلدي كي ، بو آخينين قاباغيني آلسين. پادشاه يوخولاري اختصارا سالماق حاققيندا فرمان وئردي. آنجاق بازار گونلري يوخو گؤرمه يه اجازه وئريليردي. بعضي امتيازلي شخص لرين – وزيرلرين ، وكيل لرين – هفته ده علاوه ياريم يوخو گؤرمه يه اجازه لري واردي – جمعه گونلري...

آردي وار...

آغا به ييم آغا

sonbaharim — Thu, 05 Jun 2008 09:39:18 GMT

آغا به ييم آغا

يازان : ائلچين افندي يئو

كؤچوره ن : رسول ملك زاده

آخير واخت لار تئز – تئز آغا به ييم آغانين ايكي يوز ايل بوندان اول سؤيله دي يي او ايكي مصراع ياديما دوشور :

افسوس كي ، ياريم گئجه گلدي ، گئجه گئتدي

هئچ بيلمه ديم عؤمروم نئجه گلدي ، نئجه گئتدي...

نييه تئز – تئز ياديما دوشور بو ايكي مصراع ؟

يعني يالنيز اونا گؤره كي ، هاچان سا بير واخت آييليريق و گؤروروك كي ، هئچ بيلمه ميشيك عؤمور نئجه گليب ، نئجه گئديب ؟

بوراداكي حسرته گؤره ؟

آغا به ييم آغا قاراباغ خاني ابراهيم خليل خانين قيزي ايدي ، شوشا دا آنادان اولموشدو ، ايرانا ، فتحعلي شاها اره وئريلميشدي ، آما هميشه ده غريب چيليك ايچينده اولموشدو.

دوزدو ، غريب چيليك سني يالنيز غربت ده باسمير ، بعضا اؤز ائوي نين ايچينده ده غريب اولورسان ، آما آغا به ييم آغانين اوره يي قاراباغ دا ، شوشا دا قالميشدي و آغا به ييم آغا دردلي بير آه چكميشدي :

من عاشيقم ، قاراباغ ،

قارا سالخيم ، قاراباغ ،

تهران جنته دؤنسه

ياددان چيخمير قاراباغ...

اصلينده هر بير آدامين ايچينده اؤز شوشاسي وار ، بعضا هئچ بوندان اؤزونون ده خبري اولمور ، آما اوره يي او شوشانين ايچينده دي ، اؤز شوشاسيندادي. او شوشا كيمين اوچونسه بير حيه طدي ، كيمين اوچونسه بير توت آغاجيدي ، بير بؤيورتكن ¹ كولودو ، كيمين اوچونسه بير محلله دي ، آما او حيه ط ده ، او توت آغاجي ، بؤيورتكن كولودا ، او محلله ده ، البته ، اؤز – اؤزلويونده شوشا دئييل ، اوراداكي تبسسومدو ، حيس دي ، اورانين هميشه ليك كئچميشده قالماغيندان دوغان تاسف دو ، حسرت دي ، هر بيريميزين بير – بيرينه بنزه مه ين ، آما ائله بيل كي ، ابدي اولان بير حزين ليك ايچينده عئيني حسرت ، عئيني يانغي ايله ايللر كئچديكجه رنگيني ايتيره ن ، چيزگي لري اري ين اؤز شوشاسي.

بو نه مودريك ليك درسي دي بئله ، من وئريرم؟

بو نه نصيحت دي بئله؟

آغا به ييم آغا ايكي مصراع دا دئميشدي :

اي ناصح ، نصيحتين منه عبث دير ، عبث

اتك له يه ر سؤزلرين آتشيمي – سؤندورمز...

3 دئكابر 1987 –

مردكان

¹ - بؤيورتكن : تمشك

ياخشي پادشاهين ناغيلي - 1

sonbaharim — Tue, 03 Jun 2008 13:17:18 GMT

ياخشي پادشاهين ناغيلي - 1

يازان : آنار رضايئو

كؤچوره ن : رسول ملك زاده

سيزه كيمدن دئييم ، ياخشي پادشاه دان. راويلر بئله روايت ائدير كي ، ايامي – قديم ده يا چين ده ، يا ماچين ده بير ياخشي پادشاه وارميش. بو پادشاه چوخ عادل پادشاه ايميش. هاميدان ، هاميدان عادل. ياخشي پادشاه هئچ وعده اؤز رعيت لرينه گولدن آغير سؤز دئمزميش. نه اينجيده رميش اونلاري ، نه بويونلارين ووردورارميش ، نه ده آسارميش. پادشاهين ياشي اؤتموشدو ، آما عؤمرو بويو او نه يينكي آدام ، هئچ تاختابيتي ، بيره ده اؤلدورمه ميشدي.

ائله بونا گؤره ده پادشاهين چارپاييسي بيره يله دولو ايدي و پادشاه يازيق گئجه لر ياتا بيلميردي. گئجه نين بير ياريسي ، گؤرورسن ، دوروردو ، چيراغي يانديريردي ، بير – بير بيره لري توتوردو ، آما اؤلدورموردو. اونلاري آروادي نين چارپاييسينا آتيردي. پادشاه آروادي اوچون الدن – آياق دان گئديردي. لاپ " گئتمه گؤزوم دن ، گئده رم اؤزوم دن " ايدي. بيره لري ده آروادي نين چارپاييسينا اونو اينجيتمك ، اونا اذيت وئرمك اوچون آتميردي. يوخ ، پادشاه بيليردي كي ، بيره لرين آروادينا هئچ بير زياني ده يمه يه جك. آروادي ، ماشاللاه ، ائله برك ياتيردي كي ، ايسته ييرسن اوستونه بير قشون بيره ، تاختابيتي بوراخ ، وئجينه دئييلدي. آرواد ائله برك ياتيردي و هم ده ائله برك خورولداييردي كي ، بوللور – دمير – بتون سارايين ستون لاري تير – تير تيتره ييردي.

پادشاه قاراگون بير ته هر جانيني بيره لردن قورتاريب مورگوله ين كيمي گؤزونون چيميريني آلماميش تزه دن ديك آتيليردي – اونو آروادينين خورولتوسو اوياديردي. صبح تئزدن آرواد يوخودان دوروردو – آيا دئييردي سن چيخما ، من چيخيم ، گونه دئييردي سن چيخما ، من چيخيم. آما پادشاه سحر ، خورولتو كسيله ندن سونرا دا ياتا بيلميردي – آخي ايشي – گوجو واردي. بير مملكتين كي ، پادشاهي سحر ياتيب يوخويا قالا ، او مملكتين ايشلري نه ساياق اولار؟

پادشاه بئله بدبخت پادشاه ايدي.

سؤزون دوزو ، پادشاهين اؤز پادشاهليغي اوچون ده چوخ گؤزو آتميردي. پادشاه اولماقدان لاپ بئزميشدي. اوندان اولسايدي چوخدان تخت – تاجدان ال چكردي. آما ال چكميردي. چونكو ال چكسه يدي تخته وزيري چيخاجاقدي. ايشدي شايه وزير شاه اولسايدي ، او ، نه يينكي مملكت دكي بوتون بيره لري ، تاختا بيتلري ، ميلچك لري و قارغالاري قيريب اؤلدوره جكدي. وزير هم ده او بيري وزيرلري ، وكيل لري ، كيم بيلير بلكه ائله پادشاهين اؤزونو ده جنته واصل ائده جكدي.

اودور كي ، پادشاه تخت – تاجدان ال چكميردي. نه قدر ياتماق تامارزيسي اولسا دا ، هميشه ليك يوخويا غرق اولماق ايسته ميردي.

پادشاه هم عادل پادشاه ايدي ، هم بدبخت پادشاه ايدي ، هم ده چوخ عاغيللي ، تدبيرلي پادشاه ايدي. هاميدان ، هاميدان عاغيللي ، هاميدان ، هاميدان تدبيرلي.

دئمه لي ياخشي پادشاه عادل ايدي ، بدبخت ايدي و عاغيللي ، تدبيرلي ايدي. آما پادشاه هم ده يامان يالقيز ، تپه – تنها پادشاه ايدي. او سببدن كي ، مملكتده هره نين بير بابي ، بير جورو ، بير دوستو وار ايدي.

پادشاهين سككيز آشپازي ، سككيز فايتونچوسو ، سككيز دل له يي ، سككيز وزير – وكيلي ، بير قشون قارااولچوسو و بير قشون ساراي شاعيري واردي.

بير آشبازين او بيريندن زند – زهله سي گئديردي ، چونكو بيري دئييردي كي بو دونيا بير پوچدور، او بيري دئييردي ، خئير ، اصلا بئله دئييل. فايتونچولار ائله هئي بير – بيرينين انگينه قويوردولار. سؤزلري چپ گليردي. بيري دئييردي حياتين معناسي وار ، او بيري دئييردي ، دونياسيندا اولا بيلمز، يوخدور كي ، يوخدور. شاعيرين بيري او بيريندن دانوس يازيردي كي ، بس فلان كسين ايشله تدي يي قافيه لر اذل – آخير مملكتيميزي برباد ائديب خرابا قوياجاق. قارااولچولارين بير- بيريني گؤرمه يه گؤزلري يوخ ايدي. وزيرلر ، وكيل لر بير – بيرينين اتيني يئمه يه حاضيرديلار. آما بونا باخماياراق ، اونلارين هئچ بيري تك ، يالقيز دئييلدي. هره اؤز هم پئشه لرينين ، ايش داشلارينين آراسيندا ايدي. بيرجه پادشاه تك ايدي. پادشاه لارين هم پئشه لري اولمور.

پادشاه لارين هم پئشه لري ده اولمور ، آرزولاري دا. فايتونچولار شاعير اولماق ايسته ييردي. شاعيرلر دل له ك ، دل له كلر وكيل ، وكيل لر وزير ، وزيرلر پادشاه. يئني پادشاه اولماغين هامي تامارزي سيدي. هامي ، بيرجه پادشاه دان ساوايي. پادشاه اونسوز دا پادشاه ايدي و اودور كي ، هئچ بير شئ آرزولاميردي.

هامي بير – بيريندن ماتئريال وئريردي ، اؤز هم پئشه لريندن پادشاها غيبت قيريرديلار. آما پادشاه هئچ كسه هئچ كسدن ماتئريال ، دانوس وئره بيلمزدي ، هئچ كسدن هئچ كسه شكايت لنه بيلمزدي. هئچ كسله غيبت قيرا بيلميردي. اوره ييني بيرجه آروادينا آچا بيليردي ، آما آروادي دا اونو آتدي. باش وزيره قوشولوب قاچدي ، بيلميرم ژاپونيايا ، يادا حبش لر اؤلكه سينه. بلكه ده كانار آدالارينا...

آردي وار...

ساری گلین – 2

sonbaharim — Sun, 25 May 2008 15:52:28 GMT

ساری گلین – 2

بو یازینین آردینی

http://urmuhikaye.blogfa.com/cat-17.aspx

آدرسینده اوخویا بیلیرسینیز.