بیر آخشام اوستو

یازان : محمد رضا لوائی 

اوگونو هئچ زامان اونوتماياجاغام . بير آخشام اوستو . بير يابانجي دهشتين ايچينده دويونن اوره‌ك ،سونرا بير قارا آرابانين وييلتيسي. بو صحنه‌ني دفعه‌لر ذهنيمده ساليب چيخميشديم. بير گون مني ده ياخالاياجاقميشلار. آرابايا آتيلماغيمي، گؤزلريمين باغلانماسيني، اهانتلر ائتديكلريني دئميرم آرتيق. آز سونرا بير داريسقال اوتاق بوجاغيندا صندله باغلانديم. بير قورو سس باشيما دوشدو.

- سن بئش يوز دوققوزونجو پاخماسان كي ديلين دينج اوتورمور.

دوغروسو، بيربيريميزين ديليميزي قانميريق .

- آما من خالق ديلي ايله دانيشيرام.

- سوس ... بير داها دانيشماياجاقسان ابليس!

بو آندا قاپي آچيلدي. حيس ائتديم ايكي نفر منه ياخينلاشيب، بيريسي مؤحكم باشيمدان ياپيشاراق انگيمي آشاغي باسدي. ديليمه آمپول ايگنه – سينين تاخيلماسيني دويدم. سونرا ديليمي قارماقلا توتوب، كسديلر. آغزيما داوا ته‌پيب بوراخديلار. زامانين اؤتمه‌سي، يارامين ساغالماسي. اللريمله دانيشماغا گؤسترديگيم هوس، بير قورو اتاق، بير قورو نفس...، سونرا بير گئجه قاپينين تله‌سيك آچلماسي ... بو هامان قورو سسين صاحيبي ايدي :

- قولاق آس گؤر نه دئييرم، سني بوراخيرام يالنيز بير شرط ايله، اودا بوكي ديلينه صاحيب دوراسان !

من باشيملا، الريمله اونا آنلاتديم‌كي، آخي ديليمي اليمدن آليب‌سينيز، آرتيق نه ايسته ييرسينيز؟ آما سن دئمه بوناغيلين سونو هله‌ده بير افسانه ايميش. دئمه ديليمي كسندن سونرا آپاريپ آشغال قابينا آتماق ايسته ييرلر. ديليمي كسنلرين بيريسي او بيريسينه دئيير: «باخ گؤر نئجه اوزون ديل ايميش !» او بيريسي جاواب قايتارير: « آخي طرف هم شاعيردي همده يازار، ائله دوغروسودا بو گونلر ديلي چوخ اوزانميشدي؛ گؤرمورسن مه‌ير؟» او حالدا ديليم بيرينجي سينين اليندن پيرلاييب سالوندا كانگورو كيمي آتيليب دوشور. سونرا باش آليب خياوانا دوغرو يوللانير گئت ها گئتده اونلارا دوغرو باغيرير:

- ياخشي مني او كافتارين اليندن قورتاردينيز! هله‌ليك خوش چاغ قالينيز به‌يلر. باى باي...!

«چوخ ايجلاسلاريميز سنين ديلينين حاققيندادير. بير امنيتي معظله‌چئوريليب دير بو ديل. پرئزدئنت جناب لارينين چيخيشيني ، بيرمضحكه – يه چئويريبدير... اينديسه سن اؤزون بو ديله صاحيب دورماليسان.»

سونرا مني بوراخديلار . بئصاحاب ديليمي تاپمالي ايديم. اولماسي بير جور عذاب‌دير اولماماسي باشقاجور. آخي بير دئيه‌ن يوخدور نه يه ديليمي مندن آييرديلار كي ايندي بوگونه قالميشلار؟

زامان، پاييزين رنگينه قاتيليب رحمسيز كئچن چاغدا بير پاركا وارديم. بير شاعير قادين قورو آغاج كؤتوكو اوستونده فيكيره داليب، هوپموشدو. جل الخالق... ديليمي اونون اته‌ييينده يوخويا گئتميش گؤردوم! او قادين منيم شاييردلاريمدان ايدي.

- اوستاد سالام.!

بارماقلاريما جاوابلاديم. شاعيره داوام ائتدي:

- دوشونورم... هله ليك ديلينيزه بير يئر تاپانماميشام. بعضا منه پناه گتيرير نه ائديم ؟ اونو آتانمارام. ديلينيزي كسنلر قوشون- قوشون اونو آراييرلار. بو سون گونلر اونو موزئي‌ده ساخلاماسينين اعلانيه‌سيني دووارلارا ياپيشديرميشلار. آما ديلينيز كؤنول وئرمير.

- شاعيره يه آنلا تديم كي، او منيم ديليمدير، يئريده آغزيمدادير. منه قاييتماليدير. سونرا اونا ياخينلاشيب ايسته‌ديم اته يينده يوخلاميش ديليمي آستاجا گؤتوروب آغزيما تپيم، آما دئمك اونون اته‌يينده آرينماز. سيلينمز. بير بؤيوك لكه واريميش. ديليم باليق كيمي سيچراييب اليمدن زويويرك، اللريم قادينين اته‌يينه ياپيشيب ائله‌جه قالدي . باخيشلاريما اوندان سئوال ائتديم :

- قيز بو لكه‌ني، كيم اته‌يينه ياخميش؟!

- بيلميرم كي ... بعضا خيال ايله گرچگي قاتيشديراندا بو كيمي عجايب ايشلره راست گلميرم ... ايندي ايسه بونه بلا ؟

نه قده‌ر چيرپينيب – چالينديم ، يوخ كي يوخ اللريم اونون اته‌ييندن قوپماديلار. هله ، ديليمده بيزدن آيريلار كن دئدي:

- چوخ رومانتيك بير صحنه‌دير به‌ي افنديم، باي باي ...هله ليك !

«آللاه بو ديل باشيما نه اويونلار گتيره‌جكدير؟» اؤز- اؤزومه دئيه‌ره‌ك ، پاركين نگهباني اوزاقدان باغيردي:

- آهاي حاياسيزلار، نه‌لر اولور اورادا ؟!

گؤزومو شاعيره‌يه‌ تيكيب آنلاتديم:

- ال مندن، اتك سندن، ايندي بير چارا قيل منه.

- نه چاراسي قيليم ؟ ائله دوزو سنين ديلين اول بير گوندن باشيميزا هر جوره اويون گتيريب‌دير. بودا يئني بير اويون.

آز زامان چكمدي هامي ييغيشدي باشيميزا:

- اكسيك، سنين الين بونون اته‌يينده نه قاييرير؟

- بوجور آداملاري آسماق گرك!

- واه واه گون ائشكار... خالقين گؤز قاباغيندا ... آللاه گؤسترمه‌سين!

پوليس لره كيمسه خبر وئرميشدي. كلانترينين رئيسي منه دوغرو چيغيردي :

- بو اللر كؤكوندن كسيلمه‌ليدير.

شاعيره اوزونو اونا دوغرو توتوب. اوتاناراق دئدي:

- او يانليز ديليني ايسته‌ييردي. منله ايشي يوخ ايدي سرهنگ.

- ديليني؟ ياني اونون ديلي سيزين اته‌يينيزدن باشلانيب‌دير؟

بيريسي ازدحام ايچيندن باغيردي:

ياگرك بو اللر كسيله يادا...

- يادا نه ؟

- يادا گرك او اتك چيخا !

- كس ديليني غئيرت سيز.

- ناموس سوز.

آرتيق نه يازيم؟ يئنه بير آمپول ... سونرا هوشدان گئتمك و سونرا آييليب اؤزونو زنداندا بير تاخت اوسته گؤرمك. آه اللريم ،اللريم. بس نئجه يازاجاغام ؟ نه دانيشماغا ديليم، نه يازماغا اليم...اللريم كسيلميشدي. اللريم، گوجلو سيرداشلاريم. سن دئمه اللريمين حئكايه سي ديليمين حئكايه‌سيندن ده ائشيتمله لي ايميش. اللريمي كسندن سونرا اونلاري بير ايته آتيرلار كي يئسين. همن پاركدا هامينين گؤزونون قاباغيندا، اللريم ايته دوغرو يوگوروب. خير خيراسيندان ياپيشيب، اونو بوغماق ايسته‌ييرلر. اليمين بيريسي قلم گؤتوروب هر يئرده ديليمين حاققيندا، اونا گئدن ظولملر اساسيندا، نه‌دن كسيلديگي حاقدا مقاله‌لر، كيتابلار و اعلانيه‌لر يازيب، ديلين صاحيبينه قاييتماسيني ايسته‌يير. او بيري اليم ايسه توفنگ گوتوروب. داغ داشا دوشوب ،هادي هاي كوي ساليب بير دهشتلي فضالارين يارانماسينا باعث اولموشدور. ميللت ايكي يه بولونموشدو. ساغ اليمين طرفلرينه ساغچي، سول اليمين طرفلرينه سولچو دئييرلر. بير گون اونلارين ايكي سينين بحثينه شاهيدايديم. زيندانين حه‌يه‌طينده آخشام چاغي مني بير بوجاغا چكيب دئديلر:

- سن حؤكوم ائت بوديل نئجه قاييتمالي‌دير.

- سونرا مني بوراخيب بيربيرلريله غريب دانيشيقلار آپارديلار.

- قلم يالنيز بير قورو چؤپ‌دور. من بئله دوشونورم‌كي، اساسدا بيزيم اختلافيميز يوخدور، يانليز سالقالارادا فرقلي ييك. من توفگه اينانيرام.

- زورو بوتون دونيا رد ائدير. هئچ اولمازسا بير اورتاق نظره چاتا بيله ريك، ائله دئييل ؟

- من اونو بونو قانميرام، بوسن بودا ديلين صاحيبي، گؤر اؤزو نه دئيير؟

- ائله باشيميزا هر اويون گتيرن سنين قانمازليغين‌دي ..

- ياني من قانمازام ؟!...

هاچان؟ نه واخت؟ بيلمه‌ديم. اونلار دوتوشدولار. من آرادا نه ائتمه لي‌ ايديم؟

هارادانسا بير بامباچا اوتوردو كلله‌‌مه. ائله بير بامباچاكي گؤزلريم شوشه ماوزي كيمي آتيليب دوشدو يئره. آه گؤزلريم ... گؤزلريم. حياتيمين سونونجو ايشيق يوللاري. بودا اونلارين داواسينين خئيري منه. بيزي بير سويوق داخمايا آتديلار. اؤزگه‌لر ديليمي، اليمي كسديلر. اؤزومونكولرده گؤزلريمي چيخارتديلار. هئچ دئيه‌ن يوخكي سن نه اومودلا ياشاييرسان اينسان اوغلو؟ بو فيكيرلرده ايديم كي اونلارين سسي ايله اؤزومه گلديم.

- نه يامان سويوقدور بو داخما.

- نه ده قارانليق.

- نه ائتمه‌لي ايندي؟!

چارام يوخ ايدي. سونونجو يولودا گئتمه‌لي ايديم...من اوره‌ييمي قوپاريب اونلارا وئرديم آز سونرا اونلارين سؤزوندن دويدم كي

داخما ايشيقلانيب‌دير. اورانين قيزيشماسيني اؤزوم ده حيس ائتديم، هله اونلارين پيچيلتي سيني دا ائشيتديم :

- دئيه سن بو اور‌ك‌ده ، ياغي قورتارميش فانيس كيمي اليميزه ايش وئره‌جكدير... گؤرورسن نئجه پيرت- پيرت ائدير؟!

- هله توستوله مه ييني نييه دئميرسن؟!