موفته مال شیرین اولار ، " موفته سیرکه بالدان شیرین دیر " ، هله او سیرکه 800 میلیون تومن اولسا! بیری ایللر بویو قازاندیقلارینی بیر گئجه ده اوتوزور ، بیری ده هئچ لاییق اولمادیغی شئ لره صاحیب اولور ، نه تر تؤکور نه یوخوسوز قالیر ، آج آدامین دینی ایمانی اولماز ، توخ آدامین اولور مو؟ نییه بو دونیایا گلمیشیک ، نییه؟

بو یوخاریداکی سؤزلر ده منیم دئییل ، یینه او وکیلین فیکیرلریدیر ، زنجان – تبریز اوتوبوسونون ایچینده تبریز یولوندا ، پوتا بیر کیشینین یانیندا اوتوروب بونلاری دوشونور. پوتا کیشی زنجاندان چیخاندان به ری سیمیشقا چیتدی ییر. سیمیشقانین سسی ، اییی ، اونون نئجه چئینی ییب اوتماسی و هر شئ یی وکیلی راحاتسیز ائدیردی ، آما او ایکی قارداشین راحاتجا 800 میلیونا صاحیب چیخمالاری او قدر اونو فیکره سالمیشدی کی هر زامان آجیغی گلدی یی سیمیشقایا دا دؤزوردو. بعضا اؤزونه دئیینیردی :

_ بلکی قادینین سون گونلرده عاغلی باشیندا دئییلدی  ، نیییه اونا ایذین وئردیم ، من نییه بو ایشین بیر پارچاسی اولدوم؟

تبریزه یئتیشه ندن به ری وکیلین گؤزو عئینالی داغیندا قالمیشدی. بو داغ بؤیوک بیر پولو کیمسه سیزلردن آلاجاق می؟ بو دونیادا هر کس اونلاری آتیب بو داغدا آتاجاق می؟

تبریزده او ایکی نامردی تاپماق ائله ده چتین اولمادی. بؤیوک بیر توکان ، ایچریسی باهالی ماشینلارلا دولو ، اورانین ایشچی سی وکیلی اوست قاتدا قارداشلارین یانینا بویور ائتدی. کیچیک قارداش " بویورون نه ایشیز وار؟ " دئیه سوروشدو.

- نه یازیق کی سیزه پیس بیر خبریم وار ، کئچه ن هفته عمه ز زنجاندا آللاهین رحمتینه گئتدی.

ایکی سی ده اویموشدولار ، بیر آز اولسون اوزولمه دیلر.

- قویلی ییب لر؟

- بلی.

بیر آز راحاتلادیلار. خرجه دوشمک ایستمیردیلر. کیچیک قارداش بیر سیگار یاندیردی:

- آقاجان اؤلندن سونرا ، نه ائیله دیق بیزینه ن قالمادی ، سونرا دا خبریمیز اولمادی هارا گئتدی.

وکیل چیخاردیب وصیت نامه نی اوخودو. ایلک اؤنجه اینانمیردیلار آما یاواش – یاواش هر شئ یی آنلایینجا ادالاری دا ده ییشدی. بؤیوک قارداش اؤزونو آغلاماغا ویردی کیچیک ده سیگار چکیب باشینی توولی ییردی. وکیل آرتیق بو فیلمی گؤرمه یه دایانا بیلمه ییب ، یارینین قرارینی قویوب اتاقدان چیخدی. او گئدندن سونرا ایکی قارداش اوتوروب اوزون – اوزون دانیشدیلار. سون سؤزو بؤیوک قارداش سؤیله دی :

- داغا بیرلیکده چیخاریق ، مسجده یاخینلاشاندا سن بیر آز یاواشلا ، من قاباقدا گئدیم. پولو آلدیقدان سونرا ، یاری بؤله ریک.

چهارشنبه گونو سحر تئزدن وکیل ایشه باشلامیشدی. شاهیدلرین بیر آزی داغین اتگینده ، بیر آزی دا مسجدین یانیندا دورموشدولار. اشاغیداکیلار ساعات 10 دا ایکی قارداشین بیرلیکده داغا چیخمالارینا شاهید اولدولار. وکیل مسجدین یانیندا دوروب گؤزلرینی یولا تیکمیشدی. کیم بیلیر اوره ییندن نه لر کئچیردی. تئز – تئز ساعاتینا باخیردی. ساعات 12 یه 20 دیقه قالان ، هر ایکی قارداش دا یورگون آرقین ، گؤروندولر. کیچیک قارداش قاباقدا گلیردی بودا بؤیوک قارداشی حیرصله ندیرمیشدی ، بیردن کیچیک قارداش دؤنوب بیر سؤزلر دئدی.ائله بیل کی بؤیوک قارداشا اود ویردین ، بللی ایدی کی سؤزلری چیخیمیشدی ، آما نییه؟

کیچیک قارداش آرتیق دالی یه دؤنموردو ، قارداشینی سایمیردی ، داها دا یئیینله میشدی ، بؤیوک قارداش قیشقیریردی ، گؤزلرینی قان آلمیشدی ، بوتون گوجونو توپلاییب ، یئردن بیر داش گؤتوروب قارداشینا ساری تولازلادی. داش دالدان کیچیک قارداشین باشینا ده ییب اونو بیر دره یه آتدی. اوسته دورانلار دره یه ساری قاچماغا باشلادیلار. آما ایش ایشدن کئچمیشدی. کیچیک قارداش اؤلدو ، بؤیوک قارداش دوستاغا دوشدو، هر کس حقینه یئتیشدی …    86.4.29