پول دونیادا وار اولان شئ لرین ان غریبی دیر ، وارلیغی بیر درد ، یوخلوغو یارا. بعضا چوخ سئویملی اولار ، یعضا نفرت ائدرسین آلدیغین پولدان ، بعضا عادیل اولار ، ایشچی ایسته دیغی پولو آلدیغی زامان ، آما کیچیک بیر قیزین گؤز یاشلاری ویترین دکی باشماقلار اوچون آخاندا ، چوخ ظالیم لشر ، کیمیسی پولون چوخلوغوندان قودوروب هر شئیی پولونان آلابیله جه یینی دوشونر ، کیمیسی ده بیر پارچا چوره ک اوچون نه ایشلر کی گؤرمز! پول اینسانلاری ده ییشتیرر ، بؤیودر ، کیچیلدر!..

بو یوخاریداکی سؤزلر ، زنجاندا بیر اتاقدا یاپایانلیز اوتوران بیر وکیلین فیکیرلریدیر ، اوزون زاماندیر پوللو بیر ایش توتا بیلمه ییب ، بلکی ده بونون اوچون فلسفه قورماغا باشلاییب. بو فیکیرلشمه لر یاواش – یاواش اؤز – اؤزونه دانیشماغا دؤنموشدو ، کیم بیلیر اگر تلفون چالماسایدی بو ایش هارا چکه جکدی.

تلفون سسلندی یینده وکیل ال آیاغینی ایتیریب تلفونا ساری جومدو ، اونو چوخ زنگین بیر ائودن وصیت نامه یازماق اوچون چاغیریردیلار ، بودا گئنج وکیلین اوزونو گولدوردو. کار کاغاذینی ییغیب یولا دوشدو.

او بویوک قاپینی دؤیه نده ، کؤینه یینین یاخاسینی دوزه لتمه یی ده اونوتمادی ، قاپینی آلاسین بیر قادین آچدی ، ائوین حیزمتچی سی ایدی ، - " خانیمیم سیزی گؤزلی ییر ، بویورون ".

چوخ گؤزل ، بؤیوک و او قدر ده سس سیز بیر ائو ایدی. حیزمتچی قاباغا دوشوب یول گؤستریردی ، اتاقلارین بیرینین قاپیسینی آچیب ایچری گئتدی. اتاغین ایچینده بیر یاتاق گؤرونوردو ، سانکی یاتاق اتاقی ایدی ، یودا وکیلین شوبهه سینه سبب اولموشدواونا گؤره ده دایانیب ایله ری گئتمدی. قیسا بیر سوره دن سونرا آلاسین قادینین سسی له اؤزونه گلدی ، " بویورون ".

اتاق بیر آز قارانلیق ایدی ، وکیل ایچری گیردی ، آرخاسیندان قاپینی حیزمتچی اؤرتدو ، یورگون بیر سس ، " گل اوتور " ، دئدی. وکیل یاتاغا یاخینلاشاندا، آرتیق موکیلینی ده گؤروردو. قوجا بیر قادین ایدی. یانینداکی ماسانین اوستونده داوالار وارایدی ، بودا اونون خسته اولدوغونو گؤستریردی. وکیل اوتوردوقدان سونرا قادین دانیشماغا باشلادی :

- منیم عومرومدن آرتیق ساییلی گونلر قالیر. اونا گؤره ده ایستردیم حایات یولداشیمدان قالان بو ثیروت دوغرو بیر یئرده خرجلنسین ، بو دونیادا کیمسه م یوخدور ، اگر ایکی قارداش اوغلومو سایماساق.

قادین بونو دئیینجه درین بیر فیکره گئتدی.آز سونرا وکیلین شاشقین باخیشلاری ایله قادینین وار – یوخو ، 800 میلیون تومنه یاخین بیر پول ، زنجانین یئتیم خاناسینا باغیشلاندی ، وکیل او ائودن چیخارکن موکیلینین قارداش اوغلانلارینا هئچ بیر شئ وئرمه مه سینی دوشونوردو.

بیر نئچه گون سونرا ، یینه او ائودن وکیله تلفون آچیلدی. وکیل او ائوه گئتدی یینده هئچ بیر شئ ده ییشمه میشدی ، یانلیز قادینین خسته لییی بیر آز بترلشمیشدی.

- نییه قارداش اوغلانلاریزا هئچ بیر شئ وئرمه دیز؟

وکیل اؤزونو ساخلایا بیلمه ییب ، سوروشدو. قادین الیندکی سویو ایچرکن ، بیلینمه ین بیر یئره گؤز تیکمیشدی ، گؤزلری ایله یول چکیردی.

- ایللر بویو بوندان اؤنجه ، تبریزده قارداشیمین ائوینده قالیردیم ، منی بیرینجی ائولیلیییمدن قورتاران و منه صاحیب چیخان رحمتلیک قارداشیم ایدی. قارداشیمین ائوینده راحات یاشی ییردیم آنجاق بو راحاتلیق اوزون سورمدی. او اؤلندن سونرا ، اوغلانلارینین سایقی سیزلیقلاری باشلاندی ، من نه قدر دؤزسه مده سونوندا بیر گون اؤزومو قاپینین ائشی یینده گؤردوم.

قادین بیر آز داها سو ایچدی.

- قارداشیم تبریزده ماشین آلیش – وئریشینه باخاردی. رحمتلیک اریم زنجاندا یاشاسادا اونون دوستلاریندان ایدی ، هردن تبریزه گلیب اونا باش ویراردی ، بیر نئچه دفعه ده ائوینه گلمیشدی ، منی ده اوردان تانیییردی. قارداش اوغلانلاریم منی ائشی یه اؤتوردوقدن سونرا ، بیر گون خییاواندا ، قارداشیمین او زنجانلی دوستونا راست گلدیم. منی ماشینینا میندیردی ، هر شئ دن خبرسیز منی اونون ائوینه یئتیرمک ایسته ییردی ، من نه قدر گیزلتمه یه چالیشسامدا سونوندا هر شئیی آنلادی. آرتیق دانیشمیردی ، منده اوتانجیمدان باشیمی یئره تیکمیشدیم ، باشیمی قووزادیغیمدا ، زنجان یولوندا ایدیق!

قادین وکیلین اوزونه باخیب دوام ائتدی:

- وصیت نامه نی ده ییشتیر ، بوتون مالیمی بیر شرطله قارداش اوغلانلاریما وئریرم.

وکیل اعتراض ائتمک ایسته ییردی ، آنجاق قادین دوام ائتدی:

- من اؤلندن بیر هفته سونرا ، چهارشنبه گونو سحر ساعات 10 دا قارداش اوغلانلاریم تبریزین عئینالی داغینین اتگیندن اوسته چیخاجاقلار ، گون اورتا چاغی ساعات 12 یه قدر هانکیسی عئینالینین باشیندا مسجده یئتیش سه بوتون پوللار اونا یئتیشه جک ، هئچ بیری او ساعاتاجان یئتیشه مزسه ، بوتون مالیم یئتیم خانایا قالاجاق ، 10 نفر ده بو ایشه شاهید اولسونلار.

وکیل بو سؤزه قارشی چیخدی:

- او داغی 2 ساعاتدا اوشاقدا چیخار ، بو ایشی گؤرمه یین!

قادین گولدو.

- سن دئدیقلاریمی ائله ، هر کس حاققینا یئتیشه جک!

وکیل ایسته مییه – ایسته مییه قادینین دئدیقلارینی یازیب او ائودن آیریلدی...          86.4.29