ياخشي پادشاهين ناغيلي - 1

يازان : آنار رضايئو

كؤچوره ن : رسول ملك زاده

سيزه كيمدن دئييم ، ياخشي پادشاه دان. راويلر بئله روايت ائدير كي ، ايامي – قديم ده يا چين ده ، يا ماچين ده بير ياخشي پادشاه وارميش. بو پادشاه چوخ عادل پادشاه ايميش. هاميدان ، هاميدان عادل. ياخشي پادشاه هئچ وعده اؤز رعيت لرينه گولدن آغير سؤز دئمزميش. نه اينجيده رميش اونلاري ، نه بويونلارين ووردورارميش ، نه ده آسارميش. پادشاهين ياشي اؤتموشدو ، آما عؤمرو بويو او نه يينكي آدام ، هئچ تاختابيتي ، بيره ده اؤلدورمه ميشدي.

ائله بونا گؤره ده پادشاهين چارپاييسي بيره يله دولو ايدي و پادشاه يازيق گئجه لر ياتا بيلميردي. گئجه نين بير ياريسي ، گؤرورسن ، دوروردو ، چيراغي يانديريردي ، بير – بير بيره لري توتوردو ، آما اؤلدورموردو. اونلاري آروادي نين چارپاييسينا آتيردي. پادشاه آروادي اوچون الدن – آياق دان گئديردي. لاپ " گئتمه گؤزوم دن ، گئده رم اؤزوم دن " ايدي. بيره لري ده آروادي نين چارپاييسينا اونو اينجيتمك ، اونا اذيت وئرمك اوچون آتميردي. يوخ ، پادشاه بيليردي كي ، بيره لرين آروادينا هئچ بير زياني ده يمه يه جك. آروادي ، ماشاللاه ، ائله برك ياتيردي كي ، ايسته ييرسن اوستونه بير قشون بيره ، تاختابيتي بوراخ ، وئجينه دئييلدي. آرواد ائله برك ياتيردي و هم ده ائله برك خورولداييردي كي ، بوللور – دمير – بتون سارايين ستون لاري تير – تير تيتره ييردي.

پادشاه قاراگون بير ته هر جانيني بيره لردن قورتاريب مورگوله ين كيمي گؤزونون چيميريني آلماميش تزه دن ديك آتيليردي – اونو آروادينين خورولتوسو اوياديردي. صبح تئزدن آرواد يوخودان دوروردو – آيا دئييردي سن چيخما ، من چيخيم ، گونه دئييردي سن چيخما ، من چيخيم. آما پادشاه سحر ، خورولتو كسيله ندن سونرا دا ياتا بيلميردي – آخي ايشي – گوجو واردي. بير مملكتين كي ، پادشاهي سحر ياتيب يوخويا قالا ، او مملكتين ايشلري نه ساياق اولار؟

پادشاه بئله بدبخت پادشاه ايدي.

سؤزون دوزو ، پادشاهين اؤز پادشاهليغي اوچون ده چوخ گؤزو آتميردي. پادشاه اولماقدان لاپ بئزميشدي. اوندان اولسايدي چوخدان تخت – تاجدان ال چكردي. آما ال چكميردي. چونكو ال چكسه يدي تخته وزيري چيخاجاقدي. ايشدي شايه وزير شاه اولسايدي ، او ، نه يينكي مملكت دكي بوتون بيره لري ، تاختا بيتلري ، ميلچك لري و قارغالاري قيريب اؤلدوره جكدي. وزير هم ده او بيري وزيرلري ، وكيل لري ، كيم بيلير بلكه ائله پادشاهين اؤزونو ده جنته واصل ائده جكدي.

اودور كي ، پادشاه تخت – تاجدان ال چكميردي. نه قدر ياتماق تامارزيسي اولسا دا ، هميشه ليك يوخويا غرق اولماق ايسته ميردي.

پادشاه هم عادل پادشاه ايدي ، هم بدبخت پادشاه ايدي ، هم ده چوخ عاغيللي ، تدبيرلي پادشاه ايدي. هاميدان ، هاميدان عاغيللي ، هاميدان ، هاميدان تدبيرلي.

دئمه لي ياخشي پادشاه عادل ايدي ، بدبخت ايدي و عاغيللي ، تدبيرلي ايدي. آما پادشاه هم ده يامان يالقيز ، تپه – تنها پادشاه ايدي. او سببدن كي ، مملكتده هره نين بير بابي ، بير جورو ، بير دوستو وار ايدي.

پادشاهين سككيز آشپازي ، سككيز فايتونچوسو ، سككيز دل له يي ، سككيز وزير – وكيلي ، بير قشون قارااولچوسو و بير قشون ساراي شاعيري واردي.

بير آشبازين او بيريندن زند – زهله سي گئديردي ، چونكو بيري دئييردي كي بو دونيا بير پوچدور، او بيري دئييردي ، خئير ، اصلا بئله دئييل. فايتونچولار ائله هئي بير – بيرينين انگينه قويوردولار. سؤزلري چپ گليردي. بيري دئييردي حياتين معناسي وار ، او بيري دئييردي ، دونياسيندا اولا بيلمز، يوخدور كي ، يوخدور. شاعيرين بيري او بيريندن دانوس يازيردي كي ، بس فلان كسين ايشله تدي يي قافيه لر اذل – آخير مملكتيميزي برباد ائديب خرابا قوياجاق. قارااولچولارين بير- بيريني گؤرمه يه گؤزلري يوخ ايدي. وزيرلر ، وكيل لر بير – بيرينين اتيني يئمه يه حاضيرديلار. آما بونا باخماياراق ، اونلارين هئچ بيري تك ، يالقيز دئييلدي. هره اؤز هم پئشه لرينين ، ايش داشلارينين آراسيندا ايدي. بيرجه پادشاه تك ايدي. پادشاه لارين هم پئشه لري اولمور.

پادشاه لارين هم پئشه لري ده اولمور ، آرزولاري دا. فايتونچولار شاعير اولماق ايسته ييردي. شاعيرلر دل له ك ، دل له كلر وكيل ، وكيل لر وزير ، وزيرلر پادشاه. يئني پادشاه اولماغين هامي تامارزي سيدي. هامي ، بيرجه پادشاه دان ساوايي. پادشاه اونسوز دا پادشاه ايدي و اودور كي ، هئچ بير شئ آرزولاميردي.

هامي بير – بيريندن ماتئريال وئريردي ، اؤز هم پئشه لريندن پادشاها غيبت قيريرديلار. آما پادشاه هئچ كسه هئچ كسدن ماتئريال ، دانوس وئره بيلمزدي ، هئچ كسدن هئچ كسه شكايت لنه بيلمزدي. هئچ كسله غيبت قيرا بيلميردي. اوره ييني بيرجه آروادينا آچا بيليردي ، آما آروادي دا اونو آتدي. باش وزيره قوشولوب قاچدي ، بيلميرم ژاپونيايا ، يادا حبش لر اؤلكه سينه. بلكه ده كانار آدالارينا...

                                                                  آردي وار...