هابیلین کمانچاسی

یازان : ائلچین افندی یئو

کؤچوره ن : رسول ملک زاده

هابیل کمانچانی دیزی نین اوستونه آلیب چالماغا باشلاییر و بیر آزدان گؤزلرینی یومور . چالدیغی موسیقی نین حیس لر عالمینه گئدیر ، او عالمین رنگ لری ، هیجان لاری ، گؤروملری ایله یاشاییر.

هر دفعه صحنه ده ، یا خود تلویزییا اکرانیندا هابیله باخدیقجا ، اونون موسیقی سینه قولاق آسدیقجا ، ائله بیل او دم اونون قاپالی گؤزلرینین قارشی سیندان کئچه نلری من ده گؤرورم.

هابیلین کمانچاسی سسله نیر ، دونیایا اینسانلار گلیر ، یاشاییر ، سئویر ، سئویلیر ، خوشبخت اولور ، درد چکیر و بیر گون گلدی یی کیمی ده ، کؤچوب گئدیر... و دونیایا یئنی اینسانلار گلیر...

هابیلین کمانچاسی اینسانین ، عمرون موقتی لی ییندن ، اینسانلیغین ، یاشاییشین ایسه ابدی لی ییندن دئییر...

هابیلین کمانی آذربایجان دان دئییر...

قوجا و مودریک ده ده قورقودو گؤردوم ، جاوان ، تمیز ، چیلغین کرمی گؤردوم ، گؤزل ، عصمت لی ، غیرت لی نیگاری گؤردوم...

هابیلین کمانچاسی سسله نیر ، کور اوغلو قیرآتین بئلینه قالخیر ، شاه اسماعیل قانلی دؤیوشلردن سونرا ، اؤز ظریف ، حزین اینسانی حیس لرینی آغ ورقه کؤچورور ، فضولی دوشونور ، لیلی چمنده گول – چیچک دریر...

هابیلین کمانچاسی سسله نیر ، آراز چایی آخیر و او چایین شیریلتی سی هابیلین کمانچاسی نین دیلی ایله دونیانین دردیندن ، عالمیندن دئییر ، درویش محمود سازی سینه سینه سیخیر و من اونون یوز ایل بوندان اول دئدیگی مصراع لاری ائشیدیرم:

بو دونیانین چوخ اولوب دور جفاسی

جفاسینا ده یمز ذؤوقی – صفاسی

قوشوم دا سسله نیر گئتمک صداسی

اوره ییم حسرتله دولوب ، آغلارام...

هابیلین کمانچاسی سسله نیر ، من قاراباغی گؤرورم ، شیروانی ، نخجوانی ، میلی ، مغانی ، لنکرانی ، آبشرونو ، عمرومده هئچ واخت گئتمه دی ییم ، گؤرمه دی ییم تبریزی گؤرورم ، اردبیلی گؤرورم ، سرابی گؤرورم ، ارک قالاسینین اؤنونده دایانیب بابالارین اوجالیغینا باخیرام...

هابیلین کمانچاسی سسله نیر ، هابیلین قاپالی گؤزلرینین قارشی سیندان کئچنلری من ده گؤرورم ، او موسیقی یه قولاق آسا – آسا همین کمانچانی دا یاددان چیخاریرام. هابیلین اؤزونو ده یاددان چیخاریرام ، من اولورام. او موسیقی اولور ، منیم خالقیم و منیم وطنیم اولور...

بو – کمانچانین دا ، هابیلین ده بؤیوکلویودور.

15 دئکابر 1985.

باکی.