بايرام

بولوت قره چورلو ( سهند )

 ...

قارا قيشين سونون ، يازين ايلك گونون

اسكيدن بيزلرده بايرام دوتموشلار

آدين "ايل بايرامي" ، "باهار بايرامي"

يئري گلينجه ده "نوروز" قويموشلار

بو بايرام حاققيندا ديللرده – ديشده

غريبه ناغيللار ، افسانه لر وار

بعضيلر سؤيلرلر بو دب ، بو عادت

"جمشيد"دن ، "زردوش"دان قاليب يادگار

آنجاق هئچ بير عادت ، هئچ بير عنعنه

معين بير شخصه عاييد اولانماز

عادت ده ديل كيمي ائللرين كي دير

اونسوز تاپيلانماز ، اونسوز قالانماز

اينسانين توپلانتي قورولوشلاري

بيرده كي طبيعي خصوصيتلر

يارادير هر دبي ، هر عنعنه ني

تصادفي ايشلر دئييل عادتلر

بايراملار باشلانان آيا شرقده

"آراز" "فروردين" يا "حمل" دئميشلر

لاكين بيزيم يئرده ساده جه سينه

"بايرام آيي" دئيير ساده كوتله لر

بو ساده ليكده چوخ درينليك ياتير

بايرام "خاص" معنادا ايشلنير باخساق

گؤرونور يگانه خالق بايرامي ايميش

بوتون بايراملاردان ، تويلاردان قاباق

بو گؤزل بايرامين تاپيلان يئري

علم باخيميندان آراشديرساق بيز

دؤرد فصيل منظم اولان يئرلرده

آختاريشيب تاپماق گرك شوبهه سيز

او يئرلرده نجوم حسابلاري يوخ

طبيعت آييرير ، قيشي باهاردان

باخاندا جوغرافي بؤلگه لرينه

بو بؤلگه ده دورور " آذربايجان "...