او ، بیر قیز دیر...

رسول ملک زاده

قاپ – قارانلیق گئجه ، ایشیقلان سانا

یینه گئج قالیب سان تون

یورولمادین می؟

آغ – آبباق شیلتاق قار ، یاغما سانا

بیازلیغین نه یه یارار؟

گؤک بو قدر قارانلیق سا

تر – تله سیک گؤک لرده دولاشان آی ، دایان سانا

نه دن اوز قویوب سان زؤهره یه ساری؟

یوخسا قادین لارلا بیر دردین می وار؟

قیپ – قیرمیزی دان اولدوزو ، پارلا سانا

سن اولماسان بو یاش گؤزلر

هارا باخسین؟

ساپ – ساری آزقین یولجو ، اوباوا وار سانا

وارین یوخون یاغمالانیب

سن سه نه یین پئشینده سن؟

یاپ – یاشیل بارسیز آغاج ، آرتیق سول سانا

کؤلگه ن هر یئری ساریبدیر

یانینداکی گنج آغاجین سوچو نه دیر؟

سپ – سرین باخیشیوی باخیشیمدان آییر سانا

نه سن اصلی سن ، نه ده من کرم

سن کیمه رول اویناییر سان؟

تر – تمیز یالاواج قادین ، ارکک لرله اوغراش سانا

سن قیزیوا چؤره ک آپار

اونلاردا ائش آلدات سینلار!

آپ – آیدین سان جیزیق گؤزگو ، بیر باخ سانا

بو دونیادا اوندان گؤزل ده وار می دیر؟

او ، بیر قیز دیر...