بير زامانلار يانليز گئجه ياشارديم

ايندی ايسه گئجه نين ايزی ده يوخ دور...

***

ساعات دوققوز ياريم چيراغلار كئچيب

اليمده بير قلم قورويوب قاليب

بيريسی اوجادان باغيرير : ياتين !

اويسا منيم روحوم چوخدان دير ياتيب

گؤزلردن ايتميشه م اوزاق دوشموشه م

بلكی اوره كلردن تام سيلينميشه م

اوره ييم چيرپينير ياشاماق اوچون

آنجاق بو ساواشدا من يئنيلميشه م

يوللار باغلانيب دير دؤنه بيلميرم

دؤنه بيلسئيديم ده ذاتا دؤنمه زديم

گئری دؤنمك بيزيم اوچون خوش اولماز

سؤزلرين يوكونو چكه بيلمه زديم

ساعات دوققوز ياريم هر يئر قارانليق

آييق بيريسينی تاپا بيلميرم

دونيام اورمان كيمی اوت توتوب يانير

بير آووج سو اونا بولا بيلميرم

هردن بيری لری كناردان دوروب

اؤيوتلر وئريرلر ياشا دئييرلر

بونلاردا بير گون دور كئچه جك دئييب

هر شئ يی بو قدر ساده گؤرورلر

اونلارا دئيه ن يوخ سيز نه آنلارسيز؟

سهند اوخومادان ساز چالماق اولار؟

ياشام نه دئمك دير سيز نه بيليرسيز؟

اومودو گؤرمه دن ياشاماق اولار؟؟؟...

***

بير زامانلار يانليز گئجه ياشارديم

ايندی ايسه گئجه نين ايزی ده يوخ دور...

تهران - ۲۱/۸/۸۶ - ۳۰ : ۲۱