ایندی بیر اؤلویم من ، بیر جسد ، بیر قویونون دیبینده. سون نفسیمی وئرمه م چوخ اولدو ، قلبیم چوخدان دوردو ، آما اسگیک  قاتیلیم خاریج کیمسه باشیما گلنلری بیلمیر. او ایسه ،چیرکین  رذیل ، منی اؤلدوردوغوندن امین اولماق ایچین نفسیمه قولاق آسدی ، نبضیمه باخدی ، سونرا بوغرومه بیر یوموروق ویردی ، منی قویویا داشیدی ، قووزاییب آشاغی سالدی . داشلا اؤنجه دن سینان باشیم ، قویویا دوشرکن پارچا – پارچا اولدو ، اوزوم ، آنلیم ، یاناقلاریم ازیلدی ، یوخ اولدو ، سوموکلریم سیندی ، آغزیم قانلا دولدو .

ائوه دؤنمه مم دؤرد گون اولدو : خانیمیم ، اوشاقلاریم منی آختاریرلار. قیزیم آغلایا – آغلایا سولموش ، باغچا قاپیسینا باخیردیر ، هامیسینین گؤزو یولدا ، قاپیدادیر .

دوغرودان قاپیدادیر می ؟  اونو دا بیلمیرم . بلکی ده آلیشمیشلار . نه پیس ! چونکو اینسان بوردا ایکن ، آرخادا بیراقدیغی حایاتین اسکی دن اولدوغو کیمی سوروب گئتمکده اولدوغو دویغوسو گلیر . من دوغمادان اؤنجه آرخامدا سینیرسیز بیر زامان واردی . من اؤلدوکدن سونرا دا ، بیتیب قورتولمایان بیر زامان ! یاشارکن هیچ دوشونمزدیم بونلاری ، ایشیقلار ایچینده یاشاییب گئدردیم ، ایکی قارانلیق زامانین آراسیندا .

خوشبخت ایدیم ، خوشبخت ایمیشیم ، ایندی آنلاییرام : پادشاهیمیزین نقاشخاناسیندا ان یاخچی تذهیب لری من چکردیم  و اوستالیقدا منه یاخین لاشا بیلن  باشقا بیر مذهیب ده یوخدو . ائشیکده گؤردویوم ایشله رله الیمه آیدا 900  آغچا کئچه ردی . بونلار دا طبیعی دیر کی اؤلومومو داها دا دایانیلماز ائدیر .

یانلیز نقش و تذهیب چکردیم ، صحیفه کنارلارینی بزر ، چرچه وه ایچینه رنگلر ، رنگلی یاپراقلار ، شاخه لر ، گوللر ، چیچکلر ، قوشلار چکردیم : چین اوصولو بولوتلار ، بیر بیرینین ایچینه کئچن یاپراقلار ، رنگ اورمانلاری و ایچلرینده گیزلنمیش جئیرانلار ، گمی لر ، پادشاهلار ، آغاجلار ، سارایلار ، آتلار ، اوو جولار ... اسکی دن بعضا بیر بشقاب ایچینه نقش سالاردیم ، بعضا بیر آینانین آرخاسینا ، بیر قاشیغین ایچینه ، بعضا بوغاز ایچینده بیر ساحیلین ، بیر قوناق اتاغینین تاوانینا ، بعضا بیر صاندیغین اوستونه ... سون ایللرده ایسه یانلیز کیتاب صحیفه لری اوستونده چالیشیردیم ، چونکو پادشاهیمیمز چوخ پول وئریردی نقشلی کیتابلارا . اؤلوم له قارشیلاشینجا پولون حایاتدا هئچ اؤنملی اولمادیغینی آنلادیم ، دئیه بیلمرم ، اینسان حایاتدا اولمایاندا بیله پولون اؤنمینی بیلیر.

ایندی بو وضعده منیم سسیمی ائشیتمه نیز، بو معجزه یه  باخیب بئله دوشونه جه ییینیزی  بیلیرم : بیراخ ایندی یاشایاندا نئچه قازاندیغینی ، بیزه اورادا گؤردوکلرینی آنلات .

اؤلومدن سونرا نه وار ، روحون هاردا ، جنت وجهنم نئجه دیلر ، اورادا نه لر گؤرورسن ؟

اؤلوم نئجه بیرشئ ، جانین یانیرمی ؟ حاقلی سیز ، اینسان یاشارکن اوبیریسی طرفده نه لر اولدوغونا ماراخلاندبغینی بیلیرم . محض بو ماراخ اوزوندن قانلی ساواش مئیدانلاریندا جسدلر آراسیندا گزن بیریسینین حیکایه سینی آنلاتمیشلار ...جان وئرمکده اولان یارالی جنگاورلر آراسیندا اؤلوپ ده دیریلن بیرینه راست گله رم ده ، اودا منه اودونیانین سیرلارینی وئریر دئیه آرانان بو آدامی تئیمورون عسگرلری دوشمن حئساب ائدیب بیر قیلینج ضربه سی له ایکی یه بؤلوب لراودا اودنیادا ، اینسانین ایکی یه بؤلوندغونو سانمیش .

بئله بیر شئ یوخ . حتی دونیادا ایکی یه بؤلونن روحلارین بورادا بیر لشدیغینی بیله سؤیله یه بیلرم. آما ؛ دین سیز کافیرلرین ، زندیق لارین و شئیطانا اویان کافیرلرین ادعالارینین عکسینه ، بیر اودونیادا شوکور کی وار .اورادان سیزه سس لنمه م  بونو ثابیت ائدیر . اؤلدوم ، آما گؤردوغونوز کیمی یوخ اولمادیم . همده  قرآن کریم ده سؤزو ائدیلن و آلتلاریندان ایرماقلار ( نهرلر) آخان آلتیندان ، قوموشدن جنت کؤشکلرینه ، دولو مئیوه لی ایری یاپراقلی آغاجلارا ، باکیره گؤزللره راست لایا مادیغیمی سؤیله مک زورندایام . اویسا واقعه سوره سینده آنلاتیلان جنتدکی او ایری  گؤزلی حوری لری بیر چوخ دفعه نئجه ده کئیف له رسم ائتدی ییمی ایندی چوخ یاخچی خاطیرلی ییرم . قرآن کریمین دئییل ده ، ابن عربی کیمی گئنیش خیاللرین باللاندیراراق آنلاتدیقلاری سوت دن ، شرابدان ، دادلی سودان و بالدان دوزلمیش او دؤرد ایرماغا دا طبیعی دیر کی هئچ راست گله بیلمه دیم . حاقلی اولاراق او دونیانین اومود و خیاللاری ایله یاشایان بیرچوخ اینسانی اینانج سیزلیغا سوروتله مک ایسته مه دیغیم ایچین بوتون بونلارین منه اؤزل اولدوغونو آچیقلامام لازم دیر .

اؤلومدن سونراکی حایات قونوسوندا بیز آز اولسون معلوماتی اولان هر مؤمن ، منیم وضعیمده اولان بیر حضور سوزون جنتین ایرماقلارینی گؤرمکده زورلاناجاغینی قبول ائدر .

قیساجا : نقاشلار بؤلومونده و اوستالار آراسیندا ظریف افندی آدیله تانیلان من اؤلدوم ، آما قویلانمادیم ؛ بو اوزدن ده ، روحوم گؤوده می تماما  ترک ائده بیلمه دی . جنت ، جهنم ، هارا اولسا قسمتیم ، روحومون اورالارا یاخینلاشا بیله سی اوچون گؤوده مین پیس لیکیندن چیخا بیله سی لازم دیر . باشقالارینین باشینا دا گلن بو استثنایی وضعیت ، روحوما قورخونج آجیلار وئریر . باشیمین پارام - پارچا اولماسینی ، گؤوده مین یاریسینین بوز کیمی بیر سودا سینیخلار و یارالار ایچینده ، چورومه سینی ائشیتمیرم ده ، گؤوده می ترک ائتمک اوچون چابالایان روحومون درین عذابینی حیس ائدیرم . سانکی بوتون عالم منیم ایچیمده بیر یئرده سیخیشیب دارالمایا باشلاییر .

بو دارالما حیس سینی ، او ائش سیز ( بی مانند ) اؤلوم آنیمدا حیس ائتدیغیم شاشیرتیجی گئنیش لیک حیسی ایله قاراشیلاشتیرا بیله رم آنجاق .

او هئچ گؤزله مه دیغیم داش ضربه سیله  باشیم کناریندان سیندیغیندا ، او اسگیکین منی اؤلدورمک ایسته دیغینی آنیندا آنلادیم دا ، اؤلدوره بیله جگینه اینانا بیلمه دیم . اومودلا دوپ - دولو ایمیشیم ، آما نقاشخانا ایله ائویم آراسینداکی سورگون حایاتیمی یاشارکن هئچ گؤره بیلمه میشیم بونو . حایاتا بارماقلاریم ، دیرناقلاریم و اونو دیشله دیغیم دیشلریمله توتگو ایله ساریلدیم . باشیما آلدیغیم دیگر ضربه لرین آجیسی لا سیزلرین جانینی سیخیمی ییم .

اؤله جگیمی کدرله آنلادیغیم زامان ، ایچیمی اینانیلماز بیر گئنیش لیک حیس سی ساردی . کئچیش آنینی ، بو گئنیش لیک حیسی سی ایله یاشادیم : بو طرفه وارمام ، اینسانین اؤز رویاسیندا اؤزونو یوخودا کیمی گؤرمه سی کیمی یوموشاجیق اولدو . ان سون ، اسگیک  قاتیلیمین قارلی ، زیغلی باشماقلارینی گؤردوم . گؤزلریمی یاتمیش کیمی یومدوم و دادلی بیر کئچیش له بویانا واردیم .

ایندی کی شیکایتیم ، دیشله ریمین  قانلی آغزیما لب لبی کیمی تؤکولمه سیندن ، اوزومون تانینمایاجاق قدر ازیلمه سیندن ، یادا بیر قویونون دیبینده سیخیلیب قالمیش اولماقدان  دئییل ، هله ده یاشی ییر سانیلماقدان . منی  سئونلرین تئز- تئزمنی دوشونوب ، استانبولون بیر گوشه سینده سفئیه کیمی بیر مشغولیت له هله ده باش قاتمام ، حتی باشقا بیر قادینین دالیسیندان گئتدیغیمی خیال ائتمه لری حضورسوز روحوما بوس - بوتون عذاب وئریر . بیر آن اؤنجه جسدیمی تاپسینلار ، نامازیمی قیلیب ، جنازه می قالدیریب منی قویلاسینلار آرتیق ! داها اؤنملی سی ، قاتیلیم تاپیلسین ! او اسگیک  تاپیلمادیفجا ، ایسته سه لر ان محتشم مزارا قویلاسینلار منی ، حضورسوزلوق ایچینده مزاریمدا دؤنه - دؤنه گؤزلی یه جگیمی ، هامینیزا اینانج سیزلیق وئره جگیمی بیلمه نیزی ایسترم .

قاتیلیم اولاجاق فاحیشه اوشاغی نی تاپین ، من ده سیزه او دونیادا گؤره جک لریمی تک - تک آنلاتارام ! آما قاتیلیم تاپیلدیقدان سونرا اونا منگنه آلتی له شکنجه ائدیب سوموکلریندن سککیز اونونو( ₁₀/ ⁸ )  ترجیحا کؤکس ( سینه ) سوموکلرینی ، یاواش – یاواش چیتیرداتاراق سیندیرمانیز، سونرا دا او چیرکین و یاغلی ساچلارینی ، شکنجه وئرنلرین بو ایش ایچین دوزتمیش شیش لری ایله باشینین دریسینی دله رک ، تک – تک و باغیرتاراق یولماغینیز گرکیر.

او قدر آجیقلاندیغیم قاتیلیم ، هئچ گؤزله مه دی ییم بیر شکیلده منی نییه اؤلدوردو؟ بونلارا ماراقلانین . دونیا بئش پولا ده یمز اسگیک قاتیل لرله دولو، ها بیری ، ها اوبیریسی می دئییرسینیز؟ او زامان سیزی ایندی دن اویاریرام : اؤلومومون آرخاسیندا دینیمیزه ، عنعنه لریمیزه ، عالمی گؤروش شکلیمیزه قارشی چیرکین بیر دوزاق ( تله ) وار . آچین گؤزلریزی ، ایناندیغینیز و یاشادیغینیز حایاتین ، اسلامین دوشمنلری منی نییه اؤلدوردولر ، بیر گون سیزی نییه اؤلدوره بیلرلر ، اؤرگشین. بوتون سؤزلرینی گؤزیاشلاری له دینله دی ییم بؤیوک واعظ ارض روملو شیخ نصرتین دئدیکلری بیر – بیر اوزه چیخیر. باشیمیزا گلن لرین ، حیکایه ائدیلیب بیر کیتابدا یازیلسا بیله ، ان اوستا نقاشلار جا بیله هئچ زامان  رسیم لنه بیلمه یه جگینی ده سؤیله ییم سیزه . عئینی قرآن کریم کیمی ، - یانلیش آنلامایین ، هاشا! – بو کیتابین سارسیجی گوجو هئچ زامان  رسیم ائدیله بیلمز . بونو آنلایا بیلدیغینیزدن امین دئییله م . باخین ، من ده شاگردلیغیمدا  درین لردکی گلن سسلری  قورخار دا دیقتیمی وئرمز ، اله سالاردیم بئله شئ لری . سونوم بو رذیل قویو اولدو!  سیزین ده باشیزا گله بیلیر بو ، گؤزونوزو د<رد آچین. ایندی یاخچی جا چورورسم ، چیرکین قورخومدان منی بلکی تاپارلار دئیه اومودلانماقدان باشقا ائدجک هئچ بیر شئ ییم یوخ . بیرده رذیل قاتیلیمه ، تاپیلدیغیندا ، خئییر سئور بیرینین ائدجه یی شکنجه لری خیال ائتمکدن باشقا .