قارا بوزقير

قينامايين سولقون گولو ، بورا  بوزقير ، قارا  بوز قير ...

سوناسي قاناد آچيب ، قوپ - قورو گؤلده چؤكه بيلمير . غنچه سي باغرين آچيب گؤزل چيچه يه دؤنه بيلمير. آناسي بسله نه رك كؤرپه سينه سوت وئره بيلمير. بونه قيتليق ، نه قارانليق ؟

توتامي دولوب داشير سس سيزليك دن ، شاللاري بوش قاييدير عشق سيزليك دن . بيز اسرك - اسرك  گزركن ، بير آياغچي آختاراركن ، آرپاغچي يه راست گليريك !  

بورا بوزقير ، قارا بوزقير...

قاتار- قاتار دوه لريم يوك لري ايله تالانديلار ، قيزيل قوببا چاديرلاريم ، بان ائولريم ييخيلديلار، تؤيله - تؤيله آتلاريم ، سورو- سورو قويونلاريم قيريلديلار،

مره قاراجيق چوبانيم ، هاردا قالدين ، ييغمالانديم ...

هامي كؤله ، اونا گؤره ، تكور خان دير ، نه زامان دير !

ساغ سيتقايير ، سول سارسيلير، سونرا دوشمني بوش وئرير، قارشي يؤنه سؤيوش وئرير !...

تون بوچوغو ، دان اولدوزو ، يانير كئچير ، آجي وئرير.

سويوق يئلر ، بوتون اويونجاقلاريمي مندن آلير .

يينه ده من ياپا - يانليز، بولاق كيمي گؤزوم آخير ...

قازليق آتيم آدديميني آتا بيلمير ، گؤي آغاجيم بالتالاردان قاچا بيلمير ،تيتره ك گؤوده م گييسي سيني تاپا بيلمير ، هر كس يالين ،هر شئ يالين !

 بو ايگيت سيز آلاني ، من  چنلي بئل سانيرميشام ، يانيلميشام ، جانيخميشام ! ...

آدسيز مكتوب

ر.م.

قوجا خيدمتچي ياواشجادان كيتابخانانين قاپيسيني آچيب الينده اولان كاغاذلاري ميز اوستونه قويا – قويا بيرده به يينين آسيلميش صوراتينا باخدي.20 ايلدن چوخ بو ائوده چاليشسا دا ، يينه ده به ييندن چكينيردي. بلكي ده ائله اونا گؤره دانيشمادان دؤنوردو كي ، به يينين دانيشماسي ايله سانكي يئرينده قورودو.

- نه گتيردين؟

- بو گونون قزئتلري ايدي به ييم. بير ده مكتوب واردي.

كيشي ال اوزاديب مكتوبو گؤتوردو،

- بونون اوستونده آدي يوخ دور كي ، كيمدن گليب؟

- بيلميرم ، به ييم.

- او زامان نييه منه گتيريرسن؟ آت آشغالا گئتسين.

- اولور.

خيدميتچي مكتوبو آليب يوللاندي ، كيشي سيگاراسيني يانديراركن،

- دور ، گتير بير باخيم ، نه ده اولسا بو قزئتلري اوخوماقدان كي ياخچي دير.

آز سونرا مكتوب كيشي نين الينده ور اندازلانيردي. اوجوزلو بير كاغاذدا يازيلميشدي ، بو ائوه بئله بير كاغاذدا مكتوب گؤنده ريلير مي؟ كيشي آرتيق اوخويوردو او اوجوزلو كاغاذي:

" دون آخشام اوغلوموز اؤلدو. سنين هئچ تانيماديغين اوغلون.3 آي آغير خسته ليك دن سونرا ، قوجاغيمدا جان وئردي. بير نئچه دفعه سنه خبر وئرمه يي دوشوندوم. آما بيليرديم ، سن اونو اؤز اوغلون اولاراق قبول ائتمزسن ، بيليرديم.

دون آخشام اوغلوموز اؤلدو. 3 ايل اؤنجه ائودن قاچديغيمدا ، منه يارديم ائده جه ييني سؤيله ين قادين ، ائله بيرينجي گئجه ، سنين ائويوه يوللادي مني ، 16 ياشيم واردي ، سحر قالخديغيمدا ، سانكي 10 ايل بؤيوموشدوم ، بير گئجه ده. سن گئتميشدين ، ميز اوستونه پول بيراخاراق. قاچديم.

دون آخشام اوغلوموز اؤلدو. اوگون تبريزين سويوق خيياوانلاريندا چوخ يورولدوم. آما بير ايش تاپديم ، كيچيك بير هتلين ياشلي صاحيبه سي ، مني ايشه آلدي ، يئرده وئردي ، قاب – قاشيق يوووردوم ، بير سوره باشيم ايشه قاريشدي ، بير نئچه دفعه ائويوين قارشيسيندا تصادفا قارشيلاشديق ، هئچ تانيماديغين بيريسي كيمي باخيردين منه.

دون آخشام اوغلوموز اؤلدو. او گئجه دن 3 آي سونرا ، من يورگون و بويلو بير قادين كيمي او هتلده چاليشيرديم. بونو گيزلتمك چوخ زور اولدو. سون هفته لرده ، آنام خسته لنيب دئيه ،  هتلدن آيريلديم. دؤولت خسته خاناسيندا ياتديم ، اوغلوم اولدو ، سنين اوغلون.

دون آخشام اوغلوموز اؤلدو. اوچونجو گون ، اوغلاني قولتوغوما ويريب خسته خانادان قاچديم. هر يئريم آغري ييردي. سنه گلديم ، خيدمتچين ، " به ييم تهرانا گئديب ، بير هفته سونرا گله جك" ، دئدي. ايشله دي ييم هتله گئتديم ، هتل صاحيبه سي اوشاغي گؤرونجه قاش – قاباغين ساللادي ، آما بير سؤز دئمه دي.

دون آخشام اوغلوموز اؤلدو. گون لري ساييرديم. سن گلندن سونرا ، اوشاق قوجاغيمدا قارشيوا چيخديم ، خيدمتچين ،" به ييم بو قادين بير هفته اؤنجه ده گلميشدي " ، دئدي. اوزومه باخدين ، " بير پول وئر گئتسين " ، دئدين ، سن مني ديلنجي ساندين؟

دون آخشام اوغلوموز اؤلدو. اونو هتلده بؤيوتدوم ، تك باشيما. اوغلوموز سنه چكميشدي. آما سن هر دفعه سينده ، اؤزگه ، كيمسه سيز ، حتي ديلنجي گؤزو ايله بيزه باخدين.

دون آخشام اوغلوموز اؤلدو. 3 گون تب ايچينده يانديقدان سونرا. من ده چوخ ياشامارام آرتيق..."

***

يارين كي گونون قزئتلرينين بيرينجي صحيفه لرينده ، اونلو بير ايش آدامي نين آني اؤلوم  خبري وارايدي ، آرا صحيفه لرده ده ، كيم اولدوغو بللي اولمايان بير قادينين ، كيچيك بير هتلده اؤزونو اؤلدوردوغونون خبري...

اينشا

م.ا.

... نئچه ايل بوندان اؤنجه يه گئري قاييديرام. ايندي ايسه من محصيل ام. فيزيك ، شيمي ، زيست شناسي و باشقا درس لر منه نه قدر راحات اولسادا بير درسين كئچيت مه گي منه چوخ زور اولور. من ياخشي اينشا يازيرام آنجاق معليم گلن هفته نين موضوسونو تخته ده يازينجا مني هؤوشنه باسير. بو هؤوشنه قورتولماميشدان يئنه گلن هفته نين كي باشلانير. هفته لرين بيرينده معليم كيلاسدا آياغا قالخيب : " اوشاقلار بو گلن هفته نين موضوسودور" دئيه گچ گؤتوروب تخته ده يازدي:

علم بهتر است يا ثروت.

اونون قاشلارينين دويونو آچيليب يئرينده اگلشدي. قارشيدا شاگيردلرين قاشلاري دويون اولوب فيكره جومدولار. من ايسه اونلاردان چوخ.

من دئديم او عوض آچار گؤردونوز مو؟ ، موبصور دئدي. كئچن هفته شاگيردلرين نئچه سي اينشا يازمادان بو هفته بئله اولدوغونو دوشوندوك. بو موضونو كئچن ايل ده دئميشدي ، من نه يازيم؟ بيلميرم.

بو موضونون تيكراري اولدوغونا گؤره و جوابي اولمادان اينشا معليم لرين دسته يي و خلاص تير اولدوغونو دوشونورم. بؤيوك قارداشيم دان اونلارا بو اينشاني مطرح اولماسيني ائشيتميشديم. ائله بيل بو بير تاريخي موضودور. بير گون جوابين سوروشدوم دئدي:

- بيزيم زامان بونا بير جواب وار ايدي و بير جور يازي:" بر كسي پوشيده نيست و بر همه واضح و مبرهن است كه علم از ثروت بهتر است و..."

آنالار اوشاقلارين درسه گؤنده ريب اونلاري دوكتور ، مهنديس پالتاريندا گؤرركن ، اونلار قد آشديقجا آنالارين آرزيلاري دا يئكه ليردي. بو قد آچما آنالاري شئشللنديره ردي.

تاريخ بويو بئله اولوب. همه شه علم ثروت دن ياخشي اولوب. آنجاق بيلميرم بو نئچه مين ايلليك قانون نه دن بو سون 5 ، اون ايلده ده ييشيلدي. ايندي ايسه قولاغيما چوخ ده يير ، هر كسين پولو اولسا علمي ده اولار ( دانشگاه آزاد ).

نئچه آي بوندان اؤنجه من گؤزو يومولو سهندين كيلاسينا آياق آچديم. من اوشاق اولوب ، سهند اليمدن ياپيشيب دده قورقود بازارليغينا آپاريب گزديرير. اوشاق بازاري سئوه ر ، سئومز اولار مي؟

نئچه آيدير دده قورقودون هفته بازاري دير منه. بو بازاردا گؤردوغومو دوشوندوم ، آبرويه قيمت يوخ ، پولا دا آبرو يوخ. اؤيرنديم شاه رعيت ايله ديز – ديزه اوتورور. دلي دومرولون قاديني ارينين جانينا قيمت وئرير: اؤز جاني.

ارينين جاني گئديرسه اونون دا جاني گئتمه لي دير. قانتورالي ائولنمه يه جانين ساتيشا قويور ، نفسي اؤلور ، جاني قالير.

قازان خان ائوينين ييغمالانماسين توتور ، آنجاق هئچ بير پول آلمير. دده قورقود ، دوشونجه صاحيبي ، ائلين باشي دير.

ايندي ايسه منه بو اينشا تازالانيب ، ائله بيل معليم قارشيمدا اوتوروب سوروشور: علم بهتر است يا ثروت.

دئيه رم هم علم ياخشي دير هم ثروت ، آمما دوشونجه هر ايكي سينه ده يه ر.

نه اولار؟

ر.م.

اي دونياني حالدان – حالا چئويرن

ائليميزين بختين آچسان نه اولار؟

گؤز ياشيميز گؤزوموزده دونوب دور

ال اوزاديب اونو سيلسه ن نه اولار؟

يامان گون دور آصلان لار داردا قاليب

سؤزوموزه قولاق آسسان نه اولار؟

يول ايتيب دير يولجولار آزقين قاليب

اليميزدن بير ياپيشسان نه اولار؟

اوت يانيري آتيلماغا كئچيت يوخ

گوج وئريب ده بئجيت وئرسن نه اولار؟

...............................................

................................................؟

................................................

.................................................؟

.................................................

..................................................؟

                                           ۸۷.۱.۱