| تبليغات | X |
کوره ک
یازان : م.ا.
گونش داراغین گئجه نین قارا زولفوندن یاواش – یاواش چیخاردیر. گؤی حسرتدن قیزاریب. سانکی او قیزارمیش گؤی اونون اوره ک یاراسیدیر. قیشین شاخداسی اونون الینه ، اوزونه سیللی ویریر. آدین نه دیر سوروشان اولسا ، سیزیلداییر: اهل عیال شرمنده سی. بو شرمنده لیک سازاق اولوب اونون اوزون قیزاردیر.
گؤی قیرمیزی حسرت. اوره ک قیرمیزی یارا. اوز قیرمیزی شرمنده.گؤرموشوق وارلینین دا اوزو قیرمیزی اولار. گؤره ن بو قیرمیزین نئچه اوزو وار؟
او گونوز اوچ ایدی ، اؤزو ، کوره یی ، بیر ده کؤلگه سی. سؤزلرین کوره یی دئدی ، گون باتدی سؤز سونا چاتمادی. قیش گونشیندن آجیغی گلیر. گونش اولاندا قار یاغمیر ، قار یاغماسا او...
گئجه گلیب. یئنه او اوچدو ، اؤزو ، کوره یی ، بیرده کؤلگه سی. قالان سؤزلرین کؤلگه سینه سؤیله ییر. گئجه نین گوندوزون فرقی نه اولار؟ سوروشسالار مندن ، دئیه رم: کؤلگه لرینده.
گونوزون کؤلگه سی مغرور اولار ، یا آرخاندادی یا قارشیندا ، آنجاق بورنو یئللی.اؤزه ل لیکله قیشین گونوز کؤلگه سی. آریق اوزون ، یاخشیدیر اونو سایمایاسان.
اگر شهرین گئری قالان دار کوچه لرینین بیرینده یول گئدیلسه چراغ گازین بیر هن بیر یوخ آتمیش لامپلارینین ایشیغی آدامین کؤلگه سینه روح وئره ر . جان وئره ر . کؤلگه ن اوشاق اولوب آیاق التین دان یاواش- یاواش بوی آتیپ گنج اولوب قوجالیب محو اولوب اؤلر . بو کؤلگه سنده ن دردله شه ر . دوست اولار گاهدان کوسوب قوری- قوری گئری ده ن گه لیب سوزوبن سیبقت آلیب کئچه ر . قورخوسو یوخ کوچه نی بیر دؤنگه دونسه ن باریشار .
یاشاییش کوچه سینده فلک بیزده ن اوزچئویرسه بیر دونگه دونمه لی لیک اولا بیله ر باریشسین . وای کوچه سی بن بست اولانین حالینا .
گئجه یاریمی کئچیب . سویوق هاوا بیر طرفده ن یورقونلوغودا بیر طرفده ن اوشاقلار هلبت یاتیپلار دئیه دئیه اونو ائوه ساری چئویریر.
ایشلی یه ن یورولار او بوگون اوچ ایش گؤروب : بوللی آه چکیب . بوللی دانیشیب ، کوره ک ایله . و بیرده او ایکی ایشده ن باش آییداندا باخیشین بیر اوزون آغاج ائدیب گؤیده بولودلاری بیر یئره ییغما غا . گوره ن سیغیشارمی ؟ بیر یئره ییغیلسا لار گوره ن او بولودلاردان چوخ یوخ ، ایکی قاریش جا قار یاغارمی ؟
ایندی ایسه ائوین قارشیسینا یئتیشیب . بیر بالا قارداناسینین اوزونه چیلتیک ویرماسی اونو اؤزونه گه تیریر . هن ! دئیه سن آلاچرپوتوشوب . آللاه دئیه ن اولسا سحره جاق قار یاغاجاق آللاها توککول .
یئرینین ایچینده سحره جاق بیر گؤزی یاتیپ باشقا گؤزی قوببادان گؤیه باخیر قارداما یاتدیقجا ، یوخو اونون جانینا یاتیر .
سحر تئزده ن ائشیگه چیخیر . ایندی ایسه او ایکی دیر . اؤزو بیرده کوره گی . یوخ یوخ اوچدو کؤلگه یئرین قارا وئریب . یئره دیزه جاق قار توشوب . هوا شاخدا دیر گؤز یاشی آخیر . وارلی لار محله سی هایلانیب . بیر دئییب نئچه ائشیدیب:
"آی کوره ک ایشی اولان ، آی کوره ک ایشی اولان"
دولانیب بیر دار کوچه نین اؤنون ده دیر . کوچه نین دیبینده بیر منظره ، دوره ده کی ائولرین اولان فرقی اونو اؤزونه گه تدی . دا ها سه سله میر . کوهنه سوواخدان بیر دووار ، کوهنه سینیخ تخته ده ن بیر قاپی . ائله بیل بیری آزدیر . اوچ اولماسا اویون باشلاماز . دوزدی . قاپی آچیلیر . سانکی اونون یاتمیش بختی آچیلدی . کوهنه دووار ، کوهنه تخته قاپی بیرده قوجا ننه قاپینین آراسیندا . ننه الین قالخیزییب : گه ل گؤروم اوغلوم ، گه ل یاخینا ...
اویون باشلیر . او ایندی دامدا قار کورویور .
ایندی بیلدیم او گؤز یاشی سویوخدان دئییل . او سئوینج یاشی دیر .
دام سورعتیله کوره نیر. دامین قاری آزالدیقجا اونون جیبی آرتیق شیشیر. اؤزو دامدا آنجاق فیکری اوشاقلارینین یانیندا. فیکرینده ائوه هر شئ آلیر.
دامین قاری قورتولور. قوی آلدیغیم پول آرتیق حلال اولسون دئیه کئچیب هئره نی تمیز له مه یه باشلادی. ایش گرک آللاهدان دوز گه له . اوشاقلار فیکریله فلکین اویونو ال – اله وئریر. بیر آن او اؤزون گؤیده گؤردو. ایاقی هئره دن زویوبن دامدان یئره توشدو. بختی قالخان کیمی یاتدی. گؤی هایلانیر:
" ای وای کوره گیم سیندی ، ای وای کوره گیم سیندی"...
رسول ملک زاده
بوگون بیر اوشاغین دیلی آچیلدی
هؤججوله مه دن " آنا " دئدی
آنا دا " جان بالا " دئدی
لوطفا" گؤز یومون بو گوناها
لوطفا"...
اؤلوم قارشی سیندا – 2
رسول ملک زاده
زورلا سئویشمک دن داها ایرگنمه لی بیر شئ یوخ.
دون گئجه آنلادیم بونو. اگر قادین لارین بیر چوخو سئومه دیکلری ارکک لرله سئویشمه
ک زوروندا اولسالار ، او زامان بو دونیانین ان یازیق ، شانس سیز یاراتیق لاری ،
قادین لار دیلار.
نه بیلیم ، بلکی ده بو قادین لاردان هر کس
قورخمالی ، چکینمه لی.
ائله بیری ده بو لیلا ، کؤکسو قابا ، آرخادان
باخاندا سانکی "جنیفر لوپئز" یئری ییر ، بو یاری گؤزل یاری چیرکین ،
آتامین وار- یوخونون یاری سینا صاحیب چیخدی. کیم بیلیر ، بلکی ده او قوجانین اوره
یی بو قدر حئیوانجا سئویشه ن بیریسینه آرتیق دایانا بیلمه دی. بونو دا دون گئجه
آنلادیم.
آتامی گؤممه ک چوخ یوروجو ایدی. بیر نئچه قاری –
قوجا قونشونون آغیر باخیشلارینین آلتیندا. منیم بو قدر سویوق قانلی لیغیم اونلاری
راحات سیز ائدیردی. نامازا قاتیلمامام سا ، باغیشلانماز بیر سوچ اولدو. قبرین
ایچینه قویارکن ماللا بیر آز هوروت – هوروت اوزومه باخدی. سونرا مندن الی اوزولوب
، اشاره سی له بیر قوجا کیشی قبرین ایچینه گیریب ماللا ایله بیرلیکده او اویونباز
ایشلره باشلادیلار.
باخیشلار داها دا آغیرلاشدی. پیچیلدامالار
باشلادی:
- یاراماز ائولاد! هئچ ائله بیل اوغلو دئییل.
من سایمیردیم. اعتراض لار چوخالینجا ، یانیت
لیلا دان گلدی:
- گئجه سحره جان یانیندا ایدی ، چوخ یورولوب!
دؤنوب لیلا یا باخدیغیمدا ، یاواشجا گولومسه ییب
بیر ده گؤز ووردو...
آردی وار...
او ، بیر قیز دیر...
رسول ملک زاده
قاپ – قارانلیق گئجه ، ایشیقلان سانا
یینه گئج قالیب سان تون
یورولمادین می؟
آغ – آبباق شیلتاق قار ، یاغما سانا
بیازلیغین نه یه یارار؟
گؤک بو قدر قارانلیق سا
تر – تله سیک گؤک لرده دولاشان آی ، دایان سانا
نه دن اوز قویوب سان زؤهره یه ساری؟
یوخسا قادین لارلا بیر دردین می وار؟
قیپ – قیرمیزی دان اولدوزو ، پارلا سانا
سن اولماسان بو یاش گؤزلر
هارا باخسین؟
ساپ – ساری آزقین یولجو ، اوباوا وار سانا
وارین یوخون یاغمالانیب
سن سه نه یین پئشینده سن؟
یاپ – یاشیل بارسیز آغاج ، آرتیق سول سانا
کؤلگه ن هر یئری ساریبدیر
یانینداکی گنج آغاجین سوچو نه دیر؟
سپ – سرین باخیشیوی باخیشیمدان آییر سانا
نه سن اصلی سن ، نه ده من کرم
سن کیمه رول اویناییر سان؟
تر – تمیز یالاواج قادین ، ارکک لرله اوغراش سانا
سن قیزیوا چؤره ک آپار
اونلاردا ائش آلدات سینلار!
آپ – آیدین سان جیزیق گؤزگو ، بیر باخ سانا
بو دونیادا اوندان گؤزل ده وار می دیر؟
او ، بیر قیز دیر...
اؤلوم قارشی سیندا - ۱
رسول ملک زاده
سحر گؤزومو آچدیغیمدا ایلک گؤردویوم ، ساغیمدا آتامین جان سیز گؤوده سی ایدی. بیر ده سولومدا چیپلاق بیر قادین ، لیلا.
آتامین باخیجی سی دیر بو لیلا. دون آخشام آراییب آغلایا – آغلایا آتامین اؤلوم خبرینی وئردی. یالان دان آغلی ییردی ، اصلینده اوره یینده اوجادان گولدوغونو ائشیدیردیم. سحر گله رم ، دئدیم :
- اولماز ، من قورخورام.
ندنسه دوردوم گئتدیم. یئنی آچدیغیم ودکا دا منله گلیردی. یولدا ایچیب قورتارمیشدیم. آما بوش شوشه سی هله ده الیمده ایدی. لیلا قاپی نی آچان کیمی گؤزلرینی الیمده کی بوش شوشه یه تیکدی. منسه دانیشمادان ایچه ری گیردیم. لیلا بیر شئ لر آنلاتیردی آتامین اؤلومو ایله ایلگیلی آنجاق چوخ چکمه دی کی او سؤزلره هئچ فیکیر وئرمه دی ییمی آنلادی.
آتامی گؤرمک ایسته دی ییمی سوروشدو ، " یوخ " دئدیم.
قارشیمدا اوتوروب ، گؤزلرینی گؤزلریمه تیکمیشدی لیلا. یاواش – یاواش باخیشی ده ییشدی ، بیر ایل بوندان اؤنجه کی کیمی اولموشدو. بیر ایل اؤنجه آتام بیر هفته مشهده گئتدی . لیلا ایسه او بیر هفته ده مین بیر یوللا منی ائوه چکیب گئجه نی اوردا قالمامی ایسته ییردی. نه ده اولسا من آتامدان داها گنج ایدیم!
آما دیلک لری بوشا گئتدی.
و بو گئجه ، ایکی اتاقلیق بیر ائوین بیر اتاغیندا بیر اؤلو یاتمیشدی. و یانلیز بیر اتاق قالیردی دیری لره. اویونا ائرکن باشلامیشدی ، باخیشی ایله ، یئریشی ایله ، اوتوروشو ایله. داها ائروتیک گؤرونمک اوچون نه باشاردی ایسه یاپدی.
قالخیب آتامین اتاغینا گئتدیم. اوزونه دک اؤرتموشدو. بیر گوشه ده اوتوروب یارین نه ایشلر گؤره جه ییمی دوشوندوم ، یا دا بو گؤوده نی هارا گؤمه جه ییمی. اتاغین هاواسی اؤلموشدو. لیلادان بیر سس یوخ ایدی. یاتدیغینی دوشونوب سئویندیم. آما بیردن قاپی آچیلدی ، قورخمادان ، چکینمه دن ، اؤلونو کنارا چکیب ، یاتاغیندا یاتدی ، منیمله...
آردی وار...