| تبليغات | X |
اؤلو آللاه لار
رسول ملك زاده
بورادا قبيرلر قوتسال دير
اؤلولر آللاه
زنگين اؤلولره ساريليبلار
يوخسول اينسانلار
اوغورلاريندا
اجاق لارا دوشمه لر ، آداك لار ، تاپينمالار!
سانمايين كي بو اينسانلار
قبير داشلاريندا
48 اؤلچوده پالتار گؤرورلر
يوخ!
اونلار آغلاييرلار
اؤلو آللاه لارينا…
جینایت – 2
رسول ملک زاده
7 گون دور توتولموشام.
دوستاغین سویوق هاواسی بئینیمی دوندوروب ، دوشونه بیلمیرم. بیر آز اؤنجه وکیلیم له دانیشدیم ، اونون آنلاتدیقلارینا قولاق آسارکن بیر آن ، دوستاغین تاوانی باشیما ییخیلدی دئیه دوشوندوم. اؤزومو اونوتموشام. ایلهامه توتوقلانیب ، اودا دوستاق دا! بونو دوشونمک چوخ آجی دیر...
اوره ییمده ایلهامه یه قارشی یئنی دویغولار دوغور ، من نه قدر قبول ائتمه سه مده ، یاواش – یاواش اونو سئودی ییمی دوشونورم. اولمایا عاشیق اولموشام؟
ایندی یارقیجین سؤزلری یادیما دوشور:
" سن ائله اوولدن ایلهامه یی سئویردین ، بلکی ده ایکیزین فیکری ایدی ، صابیری اؤلدورمک!.."
من ایلهامه یی سئویرم؟
" هن " دئیه بیلمیرم. اگر دئسه م ، او زامان صابیری من اؤلدورموشه م ، یارقیج حاقلی دیر!
آما اوره ییم " هن " دئییر ، هم ده اوجا سس له.
اگر بو تئزلیقدا بیر داها یارقیلانسام ، هر شئ یی بوینوما آلاجاغام. شانسیم گتیریب منی دوستاق قیراغیندا اونوتوبلار.
ایلهامه ، او نه دوشونور؟ ، یارقیجین سورولارینا نه یانیت وئریر؟ ، اودا منی سئویر؟
دوستاغین قاپیسینین سسی له اؤزومه گلدیم ، مامور وکیلیمی ایچه ری یه بویور ائدیب گئتدی. وکیلین اوزو گولوردو:
- سیزه بیر خبریم وار ، بوگون ایلهامه یارقیلاندیقدان سونرا ، دوستاقدا اینتیحار ائتدی!
من آیاغا قالخدیم ، ائشیتدیقلاریما اینانمیردیم ، وکیل الی ایله چیی نیمه دؤیوب دوام ائتدی :
- بو بیزیم ایشیمیزه یارادی ، آرتیق سنی بوردان قورتاراجاغیما اینانیرام.
وکیل تام قارشیمدا دورموشدو :
- داریخما ، یاخیندا بوردان چیخاجاقسان.
نه گوجوم وار ایکی الیم له بوینوندان یاپیشیب سیخماغا باشلادیم. گؤزلرین منه تیکمیشدی ، بو ایشیمه آنلام وئره بیلمیردی.
چوخ تئز اؤلدو ، صابیر کیمی ، ایلهامه کیمی... 86.10.20
شاختا – 2
رسول ملک زاده
تون بوچوغو تبریزده هاوانین ان سویوق زامانی دیر. ائله بو سویوق زاماندا ، لب لبی چی کیچیک حیه طده چابالیر. لب لبی لری ته لیسدن چیخاریبان یوووب ، قابلامایا تؤکور ، سحره حاضیرلاییر. هردن گؤز آلتیجا تخته قاپی یا باخیر. سانکی اوندان ایذین ایستیر ، اونا کئچیت وئرسین دئیه. بیرده دؤنوب ائوین ایچینه باخیر ، اگر او ائوین ایچیندن بیری اونا گولومسه سه ، لب لبی چی بئجیت لنر. سانکی اونو گؤزلور.
کیم بیلیر بوردا نه واخت سحر اولار ، یاشامادان کیم آنلایار؟
هه ، یاددان چیخمادان ، بیرده تخته داشقا وار ، سحر اونو اویاتماق دا چوخ چتین دیر. یوخوسو چوخ آغیردیر.
هاوا بیر آز ایشیقلانان کیمی اولدو ، ائو یییه سی بیر – بیر ائشی یه چیخیر ، عجب ، تخته قاپی ایذین وئریر اونلارا ، سانکی گئجه قاش قاباغینی ساللایان ، یول وئرمه ین تخته قاپی هئچ بو دئییل.
ایلک اؤنجه آتا چیخدی ، داشقاسی له ، اوندان سونرا اوغول چیخدی ، کیتابلاری قولتوغوندا ، بیر الینه الجک تاخیب ، آنجاق اوبیریسی یالین دیر:
- اوغول هله بیر تایین گئی ، بو بیریسین ها توخورام قوتولمور ، نسه دوشوب!
اوغلان دانیشمادان الجه یی تاخیب گئتدی ، ائو بوشالدی . آنا یانلیز قالان کیمی ، اه ی نیندکی جیلیققانی چیخاریبان ، اتگینی سؤکدو ،الجه یین یاریمچیلیق بارماغینی توخوماغا باشلادی.
یینه آنا ، اللری له بیر یئنی سین یاراتمیشدی ، بو شاختادا...
آدی باتمیش بیر شهرین اؤیکوسو
رسول ملک زاده
بو یازدیغیم ، نه اسکی بیر حیکایه دیر ، نه اویدورما سؤزلردندیر ، نه دوزه تیلمیش بیر میف ، عئینی ، عئینی حقیقت دیر.
یئر آلتیندا بیر یئر واردیر ، آدی – سانی باتمیش بیر شهر. چوخ اسکی دن ده دئییل دیر ، ائله بو 2008 ده!
بیر زامانلار یئر اوزونده یاشایارمیش ، یاشام طرزی ، هر کسی حئیران قویارمیش. بعضی لری بو ایشه یان باخارلارمیش ، گؤزلری گؤتورمز ایمیش. سن دئمه ائله اونلار ، اوزون – اوزون دوشونموشلر ، بو شهری یئرین آلتینا سوخماغین یوللارینی آرامیشلار. بو یوردون ایچیندن ده بیر نئچه سی اونلارا یاردیم ائتمیشلر!
ایلک اؤنجه ، آداملارین دانیشماسی ، یازیشماسی یاساق لاندی. بیر نئچه ایلدن سونرا دا یئنی بیر دیل یاراتدیلار ، شهرین آدین ده گیشدیلر ، کئچمیشینی ده داندیلار.
ایللر کئچدی ، یئنی نسیلدن بیر چوخو دوغرولاری اؤیرنمه دی ، گون کئچدیکجه بو شهرین آدی باتدی ، یئره گیردی...
آما بو شهر کئچمیشیندن بیر شئ لری ساخلامیشدی ، عنعنه لر ، سازلار ، سؤزلر. یئر آلتیندا بیری لری ییغیشدیلار ، یئر اوزونو دیله دیلر. دیلکجه لر گئری دؤندو. دیره ندیلر ، توتوقلانیب بیر آز داها یئر آلتینا سوخولدولار!
ایندی بیر نئچه ایل اولار ، یئر آلتیندان یئر اوزونه بیری چیخیب ، دده کیتابی گوجو ایله ، اینسانلارا یاردیم ائدیر ، اوسته چیخاردیر اونلاری.
ایل ، 2008 ، دده کیتابینی اوخوماق سوچ اولار می؟؟؟...
86.10.15
شاختا - 1
رسول ملک زاده
تبریزین شاختا خیاوانلارینین بیرینده ، مدرسه دن دؤنه ن بیر اوغلان ، الینده کی کیتابلاری ، کئشله باغلانمیش کیتابلاری ، یئره سالدی. اللری دونوردو. چتینلیک له کیتابلاری گؤتوروب یولونا دوام ائتدی. خیاوان کناریندا ، لب لبی ساتانا یئتیشرکن دوردو. کیتابلارین تخته داشقانین اوستونه قویدو. هئچ دانیشمادان ، داشقادان کپسول گازی چیخاردیب دولدورماق اوچون یوللاندی. لب لبی ساتان ، اونون آتاسی ، بیر گؤزو لب لبی لرده ، اوبیریسی اوغلونون اللرینده ، بیریسی قیزاریردی ، بوغلاییردی ، اوبیریسی چاتلاییردی ، قاناییردی ، لب لبی چی گؤز یاشلارین آخیدیردی ، گؤره نلر سه ساده جه ، نه سویوق دور دئییب ، کئچیردیلر.
بوز کیمی خیاوانلاردا ، دولو کپسول آغیر ، سوروجولر ساغیر ، ائشیتمیرلر او اوغلانین دیشله رینین تیتره مه سین ، یول وئرمیرلر ، دئیینیرلر ، یول بیزیمدیر ، حاق بیزیمدیر ، او قوپ قورو گؤزلریله!
بیر آز سونرا دولو کپسول تخته داشقانین ایچینده دیر ، اوغلان ایسه کیتابلارلا ائوه ساری یولا دوشوب ، دار کوچه لرین بیرینده ، سایقی سیزجا تخته قاپینی چیرپیب ایچه ری گیردی. کیتابلارین بیر گوشه یه تولازلادی ، سلام وئردی ، اودون پینجینه سیغیندی.
- آنا دوندوم...
بو اتاق اصلینده او قدر ده سویوق دئییل ، آما بیلمیرم نه دنسه ، گؤز یاشلاری یئنه دورمور.
- بو گئجه ، الجک لری توخومادان یوخو یوخدور...
ساعات 12 نی کئچدی ، آتا گلدی ، سسی گلدی ، تخته داشقانی زورونان تخته قاپیدان ایچه ری سوخدو ، تخته قاپی ایسته میردی ، دیره نیردی ، آغلاییردی...
آردی وار...
چیلله
یازان:م.ا.
کیمسه بیلمه زدی منیم بوینومدا گونشین آنالیق حاققی وار. بو بیر سیر ایدی ، قوی آچیلسین. بیلن بیلسین. ائشیدنلر هامی یه دئسینلر. هن گونش منی چوخ سئوه ر ، هامیدان چوخ. پاییزین سون گونو باشا چاتیردی ، گونش قیزاریب ، داراغین ییغیر. سئوگیلیم منله قارشی – قارشی یه ، اوز – اوزه. الی الیمده اونو باغریما باسمیشام. سئوگیلیمین باشی چیگنیمده اولارکن گونش منه باخیردی ، من گونشه. او منه گؤز ویردی منده اونا. گونش منه گولدو. من ، سئوگیلیم بیلمه سین دئیه اونا گوله نمه دیم. گون باتیب ، گئجه دیر ، هئچ کیمسه یوخ ، بیر منه م بیر ده سئوگیلیم ، نه گؤزل گئجه.
گئجه سونا چاتمیر. دئیه سن گونشین چیخماغا بئجیتی یوخ. گئجه اوزانیب ، ایندی ایسه بیلدیم گونش منه نییه گؤز ویردی ، نییه گولدو. گؤره ن قوی خوش اولسونلار گونش دئیه دونیانین باشقا طرفینده یا یاتیب ، یا بیر ایشه باش قاتیب. گونش ساغ اولسون.
گونلر ، هفته لر کئچدی. سونرالار ائشیتدیم او گئجه نین اوزون اولدوغوندان اونا یلدا ، چیلله گئجه سی آد وئریبلر. او گئجه نین اوزون اولدوغون بیله ن اولار می؟
یوخ. بو بیر سیر ایدی ، بیر گونش بیله ر بیر ده من...
نییه اؤزونو اؤلدوردو؟
بوگون سحردن مینلرجه دفعه بونو اؤزومدن سوروشموشام. هله لیک هر شئ جاواب سیزدیر. پلیس آچیقجا اونو اؤلدوردوغومو دوشونور ، پئشیمده دیر. منسه ائله گیجه لمیشه م کی ، اؤزومو ساوونا دا بیلمیرم.
هر شئ بوندان عیبارت دیر: دون آخشام یورگون – آرقین ائوه گئدرکن ، تلفونوم چالدی. ان یاخین دوستوم ایدی . دوستلوغوموزا دا شککیم وار آرتیق! نومره سین گؤرنده سئویندیم.
- بویور به ی .
سسی بیر آز توتولموشدو.
- زحمت اولماسا فیلان داواخانادان فیلان داوانی آل منه . یولووون اوستونده...
- نیگران چیلیق یوخدور کی؟
- یوخ.
تلفونو قاپاتدی. منده ساده اوره ییمده ، خسته لنیب دئیه اوزولدوم. هله او داواخانا یولومون اوستونده ده دئییلدی. اودا بونو بیلیردی!
اؤز – اؤزومه دئدیم: "سحر جمعه دیر. نه قدر یوبانسام یوبانیم ، سحر ناهاراجان یاتارام."
قاپینی نیشانلی سی ، " ایلهامه " ، آچدی.
- صابیر نئجه دی؟ بترلشمی ییب؟
تعجبله باخدی.
- نه اولوب کی؟
الیمده کی داوانی یاواشجا جیبیمه قویدوم. اوره ییمده ده اؤزومو یامانلادیم: " ائششک! به یه بوندان گیزلدیر."
- هئچ ، بیر آز سسی یاواش گلیردی ، اونا گؤره.
- یوخ ، یاخشی دیر.
بیلمیرم قاپیدان اتاغاجان بیز نه لر دانیشدیق ، آنجاق ایکیمیزده گوله – گوله اتاغا گیردیک. صابیر سه بیزه باخیردی. ایندی او باخیشی یادیما دوشه نده ، اصلینده بیر دوست باخیشی دئییلدی. آما من خسته لیک حئسابینا قویدوم. ایلهامه گئدیب چای گتیرنده ، یاواشجا داوانی صابیره وئردیم.
- آز قالیردی بارا وئرم. نه ییندی؟
غضبلندی:
- هئچ ، نه ییم اولاجاق ، سیزدن داها ساغلیق لی یه م .
- نه؟
گولومسه مه یه چالیشدی ، یالاندان دا اولسا.
- هئچ ، داوا بیر دوستوما لازیم ایدی. من ده ائشی یه چیخا بیلمیردیم. اونا گؤره سنه دئدیم.
ایلهامه چای گتیردی. منده بیر اونا بیر ده صابیره باخا – باخا :
- گرک ده ائشی یه چیخا بیلمه یه سن!
دئییب اوجادان گولدوم. منه ائله باخدیلار کی سؤزومدن پئشمان اولدوم.
سؤزو ده ییشتیرمک اوچون ، هن ، تویا نه قالیر؟ ، دئدیم. صابیر منه چوخ پیس باخیردی. ایلهامه ، " بیر هفته " ، دئدی. من دانیشماغا دوام ائتدیم آما اوره ییمده باشقا شئ لر دوشونوردوم:" اولان بو صابیرین بیر دردی اولمی یه ، کاش داواخانادان سوروشایدیم ، نه داواسی آلدیم؟ "
یانلیز قالمادیق کی دانیشاق. بیر آز اوتوردوقدان سونرا ، بیر آن ، صابیر تئز دوروب گئتمه می ایسته ییر دئیه دوشوندوم. دوشونن آداملار کیمی تئز آیاغا قالخدیم کی اونلار یانلیز قالسینلار. من هر زامان اؤزومو آداملارین نه دوشوندوقلارینی گؤزلریندن آنلایان بیریسی بیله ردیم. آما دونن گئجه نییه صابیرین نه دوشوندوغونو آنلامادیم؟ همده هئچ آنلامادیم! من دئییردیم به او اوره یینده منیم تئز دوروب گئتمه می ایسته ییر ، سن دئمه صابیر اؤلومه حاضیرلانیر!
بوگون سحر ، صابیر اؤلموشدو ، اوتدوغو داوالاری من آلمیشدیم ، ایچدی یی سویو ایلهامه گتیرمیشدی ، بارماق ایزلری بونون قانیتی ایدی.
بیز نییه صابیری اؤلدوردوک؟
آردی وار…