رسول ملک زاده

گونلر کئچدی. اوغوز ائلی یئنه کؤچدو ، ساری چوبان یئنه اوزون میناردان کئچدی. غریبه بیر ییغین گؤردو ، شیشیب بؤیویه ن بیر ییغین! ساری چوبان قویدو قاچدی ، امانتین آغیرلیغین چکه نمه دی!

ائله او گون باییندیر خان به یلر ایله بیرلیکده سئیره چیخمیش ایدی ، اونلاردا اوزون میناردان کئچدیلر. او نسنه نی گؤره ن کیمی آتدان دوشوب ، دؤوره ووروب دایاندیلار.به یلرین بیری کئچیب اونو تپیکله دی ، تپیک دگدی نسنه شیشدی! بیر نئچه سی داها گلیب ، هیمله شدیلر ، هئی تپدیلر ، هئی بؤیودو!

اوروز قوجا آتدان دوشوب ، اودا ویردی. مهمیز دگدی ، اؤرتولونو دلدی ، ییرتدی. اوردا دوران بوتون به یلر ، هامیسی حئیران قالدیلار ، آدام کیمی بیر یاراتیق قارشیلارینا چیخمیشدی ، آداما چوخ بنزی ییردی ، آنجاق یانلیز بیر گؤزلو ایدی!

اوروز قوجا دوشونمه دن یاراتیغا صاحیب چیخدی ، سانکی بوتون یاراتیق لار اونون کی ایدی!

اونو قاپیب باییندیر خان  قوللوغونا آپاریبان ، ایسته یینی دیله گتدی ، خان دا یئرینه گتیردی. اوروز قوجا اوره یینده ، بوساتا قارداش بولموشام دوشونوردو. "تپه گؤز" و گؤتوروبن ائوه واردی. چاغیردیلار تایا گلدی ، یازیق تایا تپه گؤزو کؤرپه سانیب امجک وئردی. بیر سوردوقدا سوتون آلدی ، ایکی سوردو ، قانین آلدی! اوچونجوسون سوردوغوندا ، جانین آلدی!

اوروز یئنه ال چکمه دی ، باشقا تایالار گتیردی ، تپه گؤز ده بیر – بیر سوردو ، جانلار آلدی! سونوندا تایالاری آت سوتو ایدی کی قورتاردی ، قانلارینین آراسینا گیردی دئمک. هر اؤونه ده بیر قازان سوت وئریردیلر ، زورلا دویوروردو اونو!

اوروز قوجا یانیلمیشدی ، تپه گؤز بوساتا قارداش اولمادی ، چیخیب ائشیک لرده گزیب دولانیردی ، اوشاقلارلا اوینایارکن ، کیمیسی نین قولاقلارین ، کیمی سینین بورنون یئییب بسله نیردی!

اوغوز ائلی تپه گؤزدن جانا گلدی ، ییغیشدیلار ، به ی اوروزا یالواردیلار ، بو ایشه چاره بول دئیه ، آما اودا نئیله دیسه کار کسمه دی.

سونوندا چاره سیز قالیب ، تپه گؤزو ائودن قوودو ، تپه گؤز گئتدی کی گئتدی ، بیر سوره گؤزلردن ایتدی ، بعضی لری سئویندیلر ، آما اونلار بیلمیردیلر ، بو گئدیشین دؤنوشو وار!...

                                                               آردی وار...

رسول ملک زاده

اوروز قوجانین بیر چوبانی وار ایدی ، ( قونور قوجا – ساری چوبان ) آدیندا ایدی. اوزون ایللردن به ری اوغوز ائلی کؤچه ن زامان ، ساری چوبان اؤنده کؤچه ر ، کیمسه اونو قاباق لاماز.

بیزیم بو اولدوغوموز زامان ، اوغوز ائلی یئنه کؤچور ، یایلاغینا ، ساری چوبان یئنه اؤنده. یول اوستونده "اوزون مینار" آدیندا بیر مینار واردی. میناره یه چاتار – چاتماز بیردن – بیره قویونلاردان سسلر قالخدی ، بیر چوخ قویون هورکدو ، قاچدی. ساری چوبان باخدیغیندا ، پری لری میناره یه قونار گؤردو. قویونلار پری دن قاچدی ، پری جیکلر سه چوبان دان. پری جیکلر قاناد چالیب پیرلایارکن ، ساری چوبان کؤینگینی چیخاریبان اوستله رینه تولازلادی. بیر چوخو اوچوب قاچدی آنجاق بیری تورا دوشدو. پری گؤزل ، چوبان قیزقین ، تاماسیندی ، اولمایان ایش اولدو گئتدی...

یئنه بیردن قویون هورکدو ، ساری چوبان قویون لارین قارشی سینا وارار – وارماز ، پری اوچدو ، سون سؤزو ایسه بئله اولدو:

- مره چوبان ، یئنگی ایلده منده سنون امانتون اولاجاقدیر ، گل آل گیلن ، آمما بیل کی اؤز ائلیوین باشینا قادا گتیردون!

ساری چوبان ده یه نه یین یئره چیرپدی ، آیریلیغا دایانمادی ، رنگی سولدو. بلکی ده بوندان دولایی هئچ بیلمه دی ، بیر آنلیق بیر تاماح اوچون ، اؤز باشینا ، ائل باشینا ، نه درد آچدی!..

                                                       آردی وار...

رسول ملک زاده

ایللر کئچدی ، اوغوز یینه قوجه گلدی ، اؤز یوردونا گئری دؤندو. حایات سویو یینه آخدی.

او گونلرده اوغوز خانین ایلخیچیسی قامیشلیغین قارشیسیندان کئچدی یینده گؤردویونه حئیران قالیب شاشیریردی. اؤلو آت لار ، قانلاری سورولموش آت لار!

بیر نئچه گون بو اولایا گؤز یومسا دا ، سونوندا ایلگی سیز قالماییب بو ایشی چؤزدو. گؤردویونه اینانمادی. قامیشلیقدان غریبه بیر آسلان گلیر ، آداما دا چوخ بنزی ییر ، بیر آت توتور ، قانین سورور ، قویور گئدیر!

ایلخیچی آتینا مینیب ، اوغوز خانا خبر گتدی. "باییندیر خان" فیکره گئتدی. بعضی لری بو آسلانلا دؤیوشمه یه ایذین آلماغا گلدیلر. آما بیردن "اوروز قوجا" سؤزه گلدی :

- اولمی یه کی بو یاراتیق منیم او قاچا – قاچدا ایتیردیگیم اوغلوم اولا؟

کیمسه یانیت وئرمه دی. باییندیر خان ایذین وئردی. او غریبه آسلان یئسیرله نیب گتیریلدی. دوغرودان دا آدام ایدی. اوروز قوجا دوشونمه دن اوغلوم دئیه اونو آلیب ائوه گئتدی. بیر چوخ قوناق چاغیریبان شنلیک قوردو. هرکس اونو قوتلویوردو. آنجاق اوغلان یئرده – گؤیده دایانمادی ، آنا سوتون ایتیرمه دی ، قامیشلیغا گئری دؤندو ، آسلان آناسی یانینا!

گئدیب توتوب گتیردیلر ، یینه قاچدی. ایگیت لر یورولدولار ، آما او هئچ یورولمادی. ایش بیلنلر ، بو ایشی "قورقود دده" چؤزر دئیه عاغیل وئردیلر. چاغیردیلار ، گلر اولدو. اوغلانجیغی قارشیسینا اوتورتوبان اؤیود وئردی :

- سن اینسان سان. حئیوانلارلا قایناشماق ، اینان سنه هئچ یاراشمیر. ایگیت لرله اوتوروب دور. هئپ بیرلیکده اووا چیخین ، قوش قوشلایین. قازلیق آتین قانین سورما ، سن اونو مین. "قییان سلجوق" بوندان سونرا قارداشین اولسون سنون. آدیوی من " بوسات " قویدوم ، یاشیوی دا اولو تانری اؤزو وئرسین ...

                                                      آردی وار ...

رسول ملک زاده

گونلرین بیر گونونده ، اوغوز ائللرینین یوردوندا یاشایان هر کس ، وار – یوخوندان الینه نه گلیرسه ، اصلینده نه یی ده یه رلی بیلیرسه ، آلیب ، بیر چوخو چادیرینی بئله قویوب قاچماق دا ایدی. آنلاشیلان بونلار شیرین یوخودا ایکن ، یاغی لرین سالدیریسی آغیر اولموش.

به یلر به یی " باییندیر خان" : " چاره یوخدور ، غافیلجه دن یاغیلرین هجومونا معروض قالدیق ، گئتمه لی ییک ، کؤچمه لی ییک " ، دئیه بویوردو. ارنلر ارنی "قازان خان" بو ایشه قاش قاباق ساللاسادا ، قازلیق آتین مینیب گئتدی. او دا بیلیردی ، یاغی لرین قارشی سینا چیخما زامانی دئییلدی. اوغوز قوجلنمه لی ایدی.

ایشه باخ کی بو سیرادا "اروز قوجا" آدلی بیر اختیار ، ائو ائشیگین ییغیب قاچارکن ، تله سیکدن اوغلانجیغین دوشوروبن ایتیردی. ائشی نین گؤز یاشلاری سئله دؤندو ، "اروز قوجا" آختاریبان آراشدیردی ، بیر چوخ ایگیت اونون اوچون  آت چاپدیردی ، آما یینه کؤرپه اوشاق تاپیلمادی ، بولونمادی.

اوغوز ائللرینین یوردو بوشالمیشدی ، کیچیک کؤرپه آغلاماقدان یورولموشدو ، آجالمیشدی ، اویوموشدو. قورخونج بو سس سیزلیک ده ، قامیشلیقدان دیشی آسلان یاواش – یاواش واریب گلدی ، اوغلانی آغزینا آلیب ، چیخیب گئتدی ، کیم بیلیر او هارا گئتدی. اوغلانجیغی کیچیک آسلانلارا وئریب ، یئمک ائتدی ، یوخسا اونو امیشدیریب ، یئتیشدیردی؟

کیم بیلیر...

                                         آردی  وار ...

نه قدر آجی دیر بونو آنلاماق

کیمسه نین اوزونو خاطیرلاماماق

هر گون آخشام سانکی بیریسی اؤلور

هله کیمسه ده بونو آنیمساماماق

گئجه لر تئز یاتیب سحر تئز قالخماق

ساده جه دانیشماق ، بیر شئ یازماماق

سانکی بوندان باشقا بیر فیکیر یوخدور

زامان گئدیشینی ساییتلاماماق

سئومک نه دئمک دیر ، اونو اونوتماق؟

قاووشماغی بوش وئر ، اوزاق لاشماماق!

قارانلیق بو قدر آغیرلاش سادا

نه فایدا ، ایشیغی هئچ آختارماماق

چهارشنبه آخشامی بوز کیمی دونماق

" سازیمین سؤزو " ایله آلوولانماماق

اوستومو بورویوب اولدوز لا قاناد

نه فایدا ، گؤیلره هئچ یاللانماماق!...

                                     تهران – 5/9/86