گئدیرسن

شعر : حسن اومود اوغلو

سوکوتا بورونوب یوللارلا آنلار

گؤی لر دا ساللاییب قاشین قاباغین

گئتمک ایسته ییرسن آددیمین گلمیر

گؤزومه باغلی دیر سنین آیاغین

اوخلانیب گؤزومه گؤزلرین سنین

باخیشین جالاییر کؤنلومه سازاق

آیریلیق آوینی اوخلویورام من

هر کیپریک چالاندا دؤنور بیر واراق

جومورام کؤنلونه آی دنیز گؤزلوم

کؤنلون دالغالانیر چاغلاییر منی

آدیمی سیلیرسن بوگون بختیندن

گؤزلر داملا – داملا آولاییر منی

گؤزیاشین جواهیر گؤزیاشین اینجی

دایان گئتمه دایان دردینی آلیم

آغارمیش ساچیمی ساپینا دوزوم

بو سون یادگاری بوینونا سالیم

الوداع دئییرم تیترک دوداقلا

لکن آرزیم عشقیم دومانا دؤنور

سؤزلریم آسانجا قوپور دیلیمدن

آنجاق گؤروشوموز گومانا دؤنور

منیم سه بختیمدن بئله گلیب دیر

هئچ آلوو بئله جه منی یاخمادی

اوچدو آرزیلاردان تیکدی ییم بینا

ییخیلمیش تاواندان توز دا قالخمادی

گئتدین بخت ائوینه یولون اوغورلو

ظن ائتمه اؤز الیم اؤز باشیم اولدو

گئتدین می حایاتین اوغوللو قیزلی

منیم سه سیرداشیم گؤزیاشیم اولدو

بوگون سن گئدیرسن کدرلی یم من

دونوب دور آغزیمدا هاراییم سؤزوم

یوخ – یوخ آغلاماییر دالینجا سنین

اوغور اولسون دئیه سو سپیر گؤزوم

آتالار دئییب لر حایاتین یولو

یاری قسمت اولسا یاری همت دیر

اولدوقجا چالیشدیم چاتمادیم سنه

خوشبخت اول گؤزلیم بودا قسمت دیر

                                      بودا قسمت دیر...

منیم آدیم قیرمیزی

یازان : اورهان پاموک

آذربایجان تورکجه سینه کؤچورن :

رسول ملک زاده

3 – من ، کؤپک

گؤردوغونوز کیمی ، دیشلریم او قدر ایتی و اوزوندور کی آغزیما زورلوقلا سیغارلار. بونون منه قورخوتوجو بیر گؤرونتو وئردیغینی بیلیرم ، آما خوشوما گلیر. بیر دفعه سینده بیر قصاب دیشلریمین بؤیوکلوغونا باخیب : " اولان بو کؤپک دئییل دوموز " دئمیشدی.

آیاغیندان ائله بیر دیشله دیم کی اونو ، دیشلریمین اوجوندا یاغلی اتی نین قورتولان یئرده سومویونون سرت لی یینی حیس ائتدیم. بیر کؤپک اوچون هئچ بیر شئ ، ایچدن گلن بیر غضب و حیرصله برباد بیر دوشمنین اتینه دیشلرینی باتیرماق قدر خوش اولماز. بئله بیر فورصت اؤنومه گلنده ، دیشله مه یه لاییق اولان قوربانیم سالاق – سالاق اؤنومدن کئچرکن سئوینجدن گؤزلریم قارالیر ، دیشلریم سانکی سیزلایاراق قاماشیر و بیلمه یه – بیلمه یه حلقومومدان سیزلره قورخوتان خیرلامالار چیخارتمایا باشلاریم.

بیر کؤپه یم من و سیزلر منیم قدر معقول یاراتیقلار اولمادیغینیز ایچین هئچ کؤپک دانیشیر می دئییرسینیز. آما بیر یاندان دا اؤلولرین دانیشدیغی ، قهرمانلارین بیلمدیکلری کلمه لری ایشلتدی یی بیر حیکایه یه اینانمیش کیمی گؤرسه نیرسینیز. کؤپکلر دانیشیر ، آما ائشیتمه سینی بیله نه.

اول زامان ایچینده ، قلبیر سامان ایچینده ، بیر زامانلار بیر باشکندین ان بؤیوک مسجدلریندن بیرینه هله دئیه لیم کی آدی بیازید ( بایزید ) مسجدی اولسون ، بیر گئری قالمیش شهردن بیر نزاکت سیز واعظ گلمیش. آدینی بلکی ساخلامالی ، مثلا شیخ نصرت دئمه لی اونا ، آما باشقا نه یالان سؤیله مه لی ، کهنه بئیینلی بیر واعظ میش بو آدام. آما باشیندا نه قدر آز بئیینی وارسا دیلینده ده ، ماشاآللاه ، او قدر قدرت وارمیش. هر جمعه جماعاتا ائله بیر حال وئریر ، ائله بیر آغلاتیرمیش کی گؤزلری قورویوب هوشدان چیخانلار اولورموش. آمان ساقین یانلیش آنلاشیلماسین ، دیلی قووتلی اوبیری واعظ لر کیمی آغلامازمیش او هئچ ، تام عکسی ، هر کس آغلارکن اونون کیرپی یی ده اویناماز، جماعاتی دانلاییر کیمی دانیشیغا داها دا قووت وئریرمیش. دانلاماغی سئودیکلریندن اولسا گرک ، بوتون بستانجیلار ، حالواجیلار ، باشماق تایی ساییسیندان چوغونلوقلار و اؤزو کیمی بیر چوخ واعظ بو آداما غول کؤله ( بنده ) اولموشلار. آه ، اودا کؤپک دئییل کی ، چیی سوت اممیش اینسان اوغلو ایمیش ، بو حئیران شلوغلوغون قارشیسیندا اؤزوندن یاخشی جا چیخمیش و باخمیش کی جماعاتی آغلاتماق قدر قورخوتمانین دا بیر دادی وار ، اؤزوده بو ایشده داها چوخ چؤرک وار ، اؤزوندن چیخیب ، دئمه یه گتیرمیش کی :

باهالی لیغین ، وبا نین ، باشاری سیزلیقلارین ، تک سببی ، حضرت پیغمبریمیز زامانینداکی اسلامی اونوتوب ، مسلمانلیق دئیه باشقا کیتابلارا و یالانلارا قانیب اینانمامیزدیر. حضرت محمد زامانیندا مولود اوخوتماق می واردی؟ اؤلویه قیرخ مجلیسی توتماق ، روحو اوچون حالوا پیشیرمک می واردی؟ حضرت محمد زامانیندا قرآن کریمی ماهنی کیمی موسیقی مقامیندا اوخوماق می واردی؟ مناره یه چیخیب سسیم نه قدر گؤزل ، عربجه م نئجه ده عرب کیمی دئییب اؤزونو توتا – توتا ، موسیقی مقامیندا اذان اوخوماق می واردی؟ مزارلارا گئدیب یالواریرلار ، اؤلولردن مدد اومورلار ، زیارتگاه لارا گئدیب بت پرست لر کیمی داشا عبادت ائدیرلر ، پارچا باغلاییرلار ، نذر ائدیرلر. بو عاغیللاری وئرن طریقت لر می واردی حضرت محمد زامانیندا؟ طریقت چیلرین عاغیل شیخی ابن عربی ، فرعونون ایمانلا اؤلدوغونه اینانیب گناهکار اولموشدور. طریقت چیلر ، مولوی لر ، خلوتی لر ، قلندری لر ، چالقی چالاراق قرآن کریم اوخویوب ، اوشاق اوغلانلا بیرلیکده ، دوعا ائدیریز دئیه رقص ائدیب اوینایانلار ، بونلار کافیر دیر. تکیه لری ییخیلمالی ، پئی لری یئددی آرشین قازیلمالی ، چیخان توپراق دنیزه تؤکولمه لی کی آنجاق اورالاردا ناماز قیلینا بیلسین.

داها دا آزیب آغزیندان توپورجک ساچاراق بو شیخ نصرت ، ای مؤمن لر، قهوه ایچمک حرامدیر ، دئمکده ایمیش. پیغمبریمیز حضرتلری بونون ذهنی کور ائتدی یینی ، معده یی دلدی یینی ، بئل آغریسی و قیسیرلیق ( نازایی ) گتیردی یینی بیلدیکلری و قهوه نین شیطانین اویونو اولدوغونو آنلادیقلاری اوچون ایچمه میشلردیر. بیرده ، ایندی قهوه خانالاردا کئیف اهلی نین ، خوشلوق دالیندا اولان زنگینلرین ، دیز – دیزه اوتوروب هر جوره ادب سیزلی یی ائتدیکلری یئرلردیر و حتی تکیه لردن اؤنجه قهوه خانالار باغلانمالی دیر. یوخسول لارین قهوه ایچه جک پولو مو وار؟ قهوه لره گئدیب قهوه ایله باش قاتیب ، ایپین اوجونو ائله بیر ایتیریرلرکی ، اورادا ایتین کؤپه یین دانیشدیقلارینی دوغرودان ظن ائدیب دینله ییرلر ، کؤپک دیر منه و دینیمیزه کوفر ائدر ، دئییرمیش بو شیخ نصرت.

اجازه نیزله ، بو واعظ افندی نین سون سؤزونو جاواب لاماق ایسته ییرم. حاجی – شیخ – واعظ – امام تیمی نین ، بیز کؤپکلری هئچ سئومه مه لری معلومونوزدور البته. منه قالیرسا ، مثلا حضرت محمدین اوستونده یوخویا گئدن بیر پیشی یی اویاندیرماماق اوچون اتگینی کسمه سی ایله ایلگیلی . پیشی یه گؤسته ریلن بو احترامین بیزلره گؤسته ریلمه دی یی خاطیرلاناراق و نان کور ( چؤرک بیلمه ین ) اولدوغو ان سفئیه آدام اوغلو طرفیندن ده بیلینه ن بو مخلوقلا ابدی ساواشیمیز اوزوندن رسول الله ین کؤپکلره بیر دوشمانلیغی واردی ، دئمک ایسته نیر. دستاماز بوزار دئیه مسجدلره گیره بیلمه مه میز ، یوز ایللردیر مسجد حیه طلرینده میرجورلارین سوپورگه لریندن یئدیغیمیز دایاقلار ، پیس نیت لرله یاپیلمیش بو یانلیش ( غلط ) تفسیرین سونوجودور.

سیزلره قرآن کریمین ان گؤزل سوره لریندن کهف سوره سینی خاطیرلاتماق ایسته ریم. بو گؤزل قهوه ده ، آرامیزدا قرآن کریم اوخومایان کیتابسیزلار بولوندوغوندان دئییل ، ائله حافظه لری تازالاییم دئیه : بو سوره ده بت پرست لر آراسیندا یاشاماقدان بئزمیش 7 گنج حیکایه ائدیلیر. بونلار بیر ماغارایا سیغینیرلار و یاتیرلار. آللاه بونلارین قولاقلارینا مهور ویریر و اونلاری تام اوچ یوز دوققوز ایل یوخلادیر. اویاندیقلاریندا آرادان بو قدر ایل کئچدی یینی بو 7 گنجدن بیریسی اینسانلار آراسینا قاریشدیغیندا ، الیندکی ایشله نمه ین سیککه دن آنلار ، چوخ شاشیریرلار. اینسان اوغلونون آللاها باغلی لیغینی ، اونون معجزه لرینی ، زامانین کئچدی یینی ، درین بیر یوخونون دادلی لیغینی آنلاتان سوره نین حددیم اولمایاراق سیزلره خاطیرلاتاجاغیم اون سکگیزینجی آیه سینده بو 7 گنجین یوخلادیغی اصحاب کهف ماغارانین گیریشینده یاتان کؤپکدن بحث واردیر. طبیعی دیر کی ، هر کس قرآن کریم ده اؤز آدینین کئچمه سی ایله غرورلانا بیلیر. بیر کؤپک اولاراق بو سوره ایله غرورلانیب و دوشمانلارینا ایت دئیه ن ارض رومیلرین عاغیللارینی انشاآللاه باشلارینا گتیریر دئییرم.

او زامان کؤپک لره قارشی بو دوشمانلیغین اصلی اساسی نه دیر؟ کؤپک میرداردیر نییه دئییرسینیز؛ ائوینیزه کؤپک گیررسه نییه هر یئری باشدان آشاغی یووارسینیز؟ بیزه توخونانین نییه دستامازی بوزولور ، خفتانینیزین اوجو بیر کؤپه یین نملی توکلرینه بئله بیر توخونسا نییه او خفتانی باشینا هاوا ده یه ن قادینلار کیمی 7 دفعه یوماغی شرط ائدیرسینیز؟ بیر کؤپک قابی یالادی دئیه او قابین یا ائشی یه آتیلماسی یا قلئی لنمه سی گرکدی یی یالانینی آنجاق قلئی جیلر چیخارتا بیلیر. بلکی ده پیشیک لر.

نه زامان کی کنددن ، کؤچدن واز کئچیلیب شهره اوتورولدو ، چوبان کؤپکلری کندده قالدی ، اوزامان بیز کؤپکلر مردار اولدوق . اسلامیت دن اؤنجه اون ایکی آیدان بیری ایت آیی دی . ایندی ایسه ایت اولدو بیر اوغورسوز. اؤز دردلریمله بو آخشام وقتی بیر آزقیسا ، بیرآز پای آلماق ایسته یه ن سیز دوستلاریمی اوزمک ایسته مه م ، منیم قیزقینلی غیم واعظ افندی نین قهوه خانامیزا آتیب توتماسینا .

بو ارض روملو نصرتین باباسینین بلیرسیز اولدوغونو سؤیله سه م  نه بویورولور ؟ منه ده دئمیشلردیرکی ، سن نه بیچیم کؤپک سن ، اوستان بیر قهوه ده رسیم آسمیش حیکایه آنلاتیر بیر مداحدیر دئیه سن اونو قوروماق اوچون ، واعظ افندی یه دیل اوزاتیرسان .هاشا ، دیل اوزاتمیرام. من قهوه خانالا ریمیزی چوخ سئوه ریم . بلیرمی سینیزکی رسیم بئله اوجوز بیر کاغاذ اوستونده نقش اولدوغواوچون یادا بیر کؤپک اولدوغوم اوچون اوزولمورم ده ، من سیزلرله بیرلیکده آدام کیمی اوتوروب قهوه ایچمه دی ییمه حئییف له نیرم . بیزلر قهوه میز و قهوه خانالاریمیز ایچین اؤلوروز... آما اودا  نه ... اوستام ، باخ منه قهوه وئریر. هئچ رسیم قهوه ایچه ر می ؟ دئمه یین ، باخین -  باخین ، کؤپک گؤزل -  گؤزل قهوه ایچیر .

اوه ، آمان چوخ یاپیشدی ، ایچیمی ایسسیتدی ، گؤزلریمی ایشیقلاندیردی ، ذهنی می آچدی و باخین عاغیلیما نه گلدی .وئندیک دوچو پادشاهیمیز حضرتلری نین قیزلاری نورحایات سلطانا هدیه اولاراق چین ایپه ییندن  توپ – توپ پارچالاردان ، اوستو آبی چیچکلی چین گیل قابلاریندان  ( سفال ) باشقا نه یوللامیش بیلیر می سینیز ؟ توکلری ایپکدن یوموشاق عشوه لی بیر فرانک کؤپه یی . بو کؤپک ائله نازلی ایمیش کی ، بیرده قیرمیزی ایپکدن پالتارلاری وارمیش . بیزیم یولداشلاردان بیری اونونلا بیر گئجه یاتمیش دا اوردان بیلیرم : بو کؤپک سئویشیرکن ده البسه سیز یاپا بیلمیرمیش . بو فرانک اؤلکه سینده ذاتاً کؤپک لرین هامیسی بئله البسه گئییرمیش ، اورادا خانیم یانا بیر فرانک  خانیمی چیپلاق بیر کؤپک می گؤرموش ، یوخسا کؤپه یینینکینی می گؤرموش ، بیلمیرم آرتیق ،  " آی حئیوان چیپلاق! " دئیه دوشوب هوشدان چیخمیش دئیه حیکایه ائدیرلر.

فرانک کافیرلری نین اؤلکه سینده ذاتاً هر کؤپه یین بیر صاحیبی وارمیش . یازیق کؤپکلر بویونلاریندا زنجیر ، ان بدبخت کؤله لر کیمی زنجیرلنمیش اولاراق تک – تک سوروتله نه – سوروتله نه کوچه لرده گزدیریلیر لرمیش . بو آداملار سونرا بو یازیق کؤپکلری زورلا ائولرینه سوخاراق ، حتی یاتاقلارینادا آلیرلارمیش اونلاری . بیر کؤپک دیگری له دئییل قوخلاشیب سئویشسین ، جوت ده گزه مزمیش . زنجیر لر ایچینده او یازیق حاللاری له کوچه ده راست گلیرلرسه حزونلو گؤزلرله بیر بیرلرینی اوزاقدان گؤررلرمیش ، اوقدر . بیزیم استانبول کوچه لرینده سورولر ، جماعاتلر حالینده سربست جه گزن کؤپکلر اولمامیز ،افندی صاحیب تانیمادان یول کسمه میز ، کئیفیمیزین چکدی یی ایستی گوشه یه قیوریلیب ، کؤلگه یه یاتیب میشیل – میشیل یاتمامیز ، ایسته دیغیمیز یئره سیچیب ایسته دیغیمیزی دیشله مه میز ، کافیرلرین عاغیللارینین آلاجاغی شئ لر دئییل . عجبا بو اوزدن می ارض روملونون حئیرانلاری استانبول کوچه لرینده صدقه ایچین دوعالارلا کؤپک لره ات آتیلماسینا ، بونون اوچون وقف لر قورولماسینا قارشیلار ، دئیه دوشونمه دیم دئییل . اگر بونلارین نیتی کؤپکلره دوشمانلیقدان باشقا کافیرلیک ائتمک سه کؤپک میللتینه دوشمانلیغین ذاتاً کافیرلی یین ائله اؤزو اولدوغونو یادیزا سالیرام . بو رذیللرین انشاء آللاه اوزاق اولمایان اعداملاریندا ، بعضا عبرت اولسون دئیه یاپدیقلاری کیمی جلاد یولداشلار بیزلری ده پارچا یئیه لیم دئیه چاغیریرلار.

بونو آنلاتیم سون اولاراق : بوندان اؤنجه کی افندیم چوخ عادیل بیر اینسان دی . گئجه آدام سویماغا چیخدیغیمیزدا ایشی بؤلوشوردوک : من هافیلدامایا باشلایینجا ، او قوربانین بوغازینی کسر ، بئله جه حریفین چیغیرماسی دویولمازدی . قارشی لیغیندا دا جزالاندیردیغی سوچلولاری کسر، قایناتیر ، منه وئریردی ده یئیه ردیم . من چیی ات سئومه م . ارض روملو واعظین جلادی بونودا آرتیق اینشاء آللاه دوشونورده او پیسین اتینی چیی – چیی یئییب معده می بوزمام .   

بولاق

یازان : م . ا .

اوشاقلیقدا یایدان یایا 5 – 10 گون دینجلیب دولانماغا کنده قوناق گئده ردیک. کندده های دوشوب اوشاقلار شهردن قوناق گلیب دئیه قارشیمیزا چیخیب تئز یولداش اولوب چای – چیمنه اویونا گئدردیک. اوینویوب یورولوب ، دینجلمک  اوچون باغچادان هره بیر تورش آلما دریب زحمتیله چایی اوتایا آتلاییب داغین دؤشونده دوزلاق دان بیر تیکه دوز قوپاردیب آلمییه ویریب یئیه ردیک. ایندی ایسه من آند ایچسه م کندلییه م اینانین من او کندین دوزون یئمیشه م ، دوز چؤره یی ایتیرمک اولماز ، آتالار دئییب. دوزلو آلمانی یئییب سوسامیشیق."اوشاقلار کیمسه تئز یئتیشه او تئز سو ایچه جک" دئیه بولاغا جاق دویوشه قاچیریق. بولا ق باشی اول من ، اول من ، سسیله های لانیب بیر داش کیمسه نین آیاغینا ده ییر دیغیررانیب داشدان داشا ده ییب سون داشی بولاغا آتیر. دوری بولاق بولانیر ، سوستالیب یئره اوتوروب سوس توتوروق. اولسون 5-10 دیقه جاق دورالار دئیه یولاغی باغریمیزا باسیریق. یاریم ساعات سونرا اوستوموز سو ، چیمنده اوینوروق. بولاغی ساغ اولسون.

ایللر بویودور تبریزین فیکیر بولاغی قورویوب. قوروتدولار؟ بیلمیرم ، بونو سوسوز خالقیم سوروشور. ائشیدیب گؤرموشوق وفالی کؤپک یییه سینه قویروغون بولار. یاز گونلرین بیرینده بیر یابانجی اوسالیقدان کؤپک اولوب قویروغو قلم. او قلیمیله بو بولاغی قورتدادی ، ائله بیل ائشیتمه میشدی ایلان یوواسینا چوپ اوزاتمازلار. ائشیتسه ده تورک اولمادان دوشونمزدی.نئچه ایللیک قوروموش بولاق دیله گلدی. یئرین باغری چاتدادی. بولاغین اوره یی پاتداییب گؤزیاشی آخدی. سو زور چیخدیغیندان بولانمیش گلیر. ائشیدیب سئویندیک. اوشاقلیق هاواسیله 5-10 دیقه جاق دورالار دئیه بولاغا قوشا گلدیک. دورالمادی. گونلر – آیلار کئچدی یینه دورالمادی. بولانماسا دورالماز کیمسه قولاغیما دئدی ، بیلمه دیم.

ایندی ایسه ایلدن فائیز کئچیب آغزیمیز سوسوز ، گؤزوموز بولاغا باخیر. ساغدا اؤزوموزدن سولدا. سول بولاندیریر ساغ بالیق توتور. یازیق سوسوز ائلیم ، یازیق سوسوز خالقیم.

منیم آدیم قیرمیزی

یازان : اورهان پاموک

آذربایجان تورکجه سینه کؤچورن :

 رسول ملک زاده

استانبولا ، دوغوب بؤیودوغوم شهره ، اون ایکی ایل سونرا بیر اویور گزر ( یوخودا دولانان ) کیمی گیردیم. اؤله نلر اوچون توپراق چکدی دئیه رلر ، منی ده اؤلوم چکمیشدی. ایلک باشدا شهره گیردیغیمده یانلیزجا اؤلوم وار سانمیشدیم ، سونرا عشق ایله ده قارشیلاشدیم. آما عشق ، او آرا ، استانبولا ایلک گیردی ییمده ، شهردکی خاطره لریم قدر اوزاق و اونوتولموش بیر شئ ایدی. اون ایکی ایل اؤنجه استانبولدا خالامین اوشاق یاشینداکی قیزینا عاشیق اولموشدوم.

استانبولو ترک ائتدیکدن یانلیزجا دؤرد ایل سونرا ، عجم اؤلکه سینین قورتولمایان دوزه نگاهیندا ، قارلی داغلاریندا و کدرلی شهرلرینده گزر ، مکتوب داشی ییر ، وئرگی ( مالیات ) توپلارکن ، استانبولدا قالان اوشاق سئوگیلیمین اوزونو یاواش – یاواش اونوتدوغومو حیس ائتدیم. اؤزومو ایتیریب بو اوزو خاطیرلامایا چوخ چالیشدیم آما ، نه قدر چوخ سئورسنیز سئوین ، اینسانین هئچ گؤرمه دیغی بیر اوزو یاواش – یاواش اونوتاجاغینی دا آنلادیم. دوغو ( شرق ) دا کاتیبلیکلر و یولجولوقلار لا پاشالارین خیدمتینده کئچیردیغیم ایللرین آلتینجی سیندا خیالیمدا جانلاندیردیغیم اوزو استانبولداکی سئوگیلیمین اوزو اولمادیغینی بیلیردیم آرتیق. آلتینجی ایلده یانلیش خاطیرلادیغیم اوزو ، داها سونرا ، سکگیزینجی ایلده بیر دفعه داها اونوتوب ، یینه بام – باشقا بیر شئ اولاراق خاطیرلادیغیمی دا بیلیردیم. اون ایکی ایل سونرا ، اوتوز آلتی یاشیمدا شهریمه گئری دؤندوغومده ، سئوگیلیمین اوزونو بئله – بئله چوخدان اونوتموش اولدوغومو آجی ایله حیس ائدیردیم.

دوستلاریمین ، فامئللریمین ، محلله مدکی تانیدیقلارین چوخ بو اون ایکی ایلده اؤلموش لردی. خلیجه باخان مزارلیغا گئتدیم ، آنام و یوخلوغومدا اؤلن عمی لریم اوچون دوعا ائتدیم. پالچیق توپراغین قوخوسو خاطیره لریمله قاریشدی ، بیریسی آنامین مزارینین کناریندا بیر کوزه سیندیرمیشدی ، بیلمیرم نییه سینیق پارچالارا باخارکن آغلامایا باشلادیم. اؤلولره می ، او قدر ایلدن سونرا عجاییب بیر شکیلده هله ده حایاتیمین باشیندا اولمام می ، یوخسا تام عکسینه باشا دوشدوغوم ، حایات یولجولوغومون سونونا گلدی ییم اوچون مو آغلاییردیم ، بیلمیرم. بللی – بلیرسیز بیر قار یاغماغا باشلامیشدی. اورادان – اورایا داغیلان تک – توک دانالاره داغیلمیشدیم ، اؤز حایاتیمین بلیرسیزلیکلری ایچینده یولومو ایتیرمیشدیم کی ، باخدیم مزارلیغین قارانلیق بیر گوشه سینده قارانلیق بیر کؤپک منه باخیر.

گؤز یاشلاریم دیندی ( دایاندی ) ، بورنومو سیلدیم. قارا کؤپه یین منه دوستلوقلا قویروغونو ساللادیغینی گؤروب مزارلیقدان چیخدیم. داها سونرا ، بابا طرفیندن فامئل لریمدن بیرینین اسکی دن اوتوردوغو ائولردن بیرینی کیرالاییب محلله یه یئرلشدیم. ائو صاحیبه سی قادین ، ساواشدا صفوی عسگرلرینین اؤلدوردوغو اوغلونا بنزتدی منی. ائوه یئتیشه جک ، یئمکلریمی پیشیره جکدی.

استانبولا دئییل ده ، دونیانین او بیری اوجونداکی عرب شهرلریندن بیرینه کئچیجی ( موقت ) اولاراق یئرلشمیشیم ده شهر نئجه بیر یئردیر دئیه ماراقلانیرمیشیم کیمی کوچه لره چیخدیم ، اوزون – اوزون ، دویا – دویا یورودوم. کوچه لر می دارالمیشدی ، یوخسا منه می ائله گلیردی؟ کیمی یئرلرده ، بیر بیر لرینه قارشیلیقلی اوزانمیش ائولر آراسینا سیخیلمیش کوچه لرده ، اوستلری یوکلو آتلارا ، ده یمه مه ک اوچون دووارلارا ، قاپیلارا سورونه – سورونه یورومک زوروندا قالدیم. زنگین لر ده آرتمیش می ایدی ، یوخسا منه می ائله گلیردی. گؤرکملی بیر آرابا ( ماشین ) گؤردوم ، بئله سی نه عربستاندا ، نه عجم اؤلکه سینده واردیر ، مغرور آتلارین چکدی یی بیر قالا کیمی ایدی. چمبرلی داشین اورادا ، تویوق بازاریندان گلن پیس قوخونون ایچینده بیر بیرلرینه سوخولموش ، جیریق پالتارلار ایچینده عارسیز دیلنجی لر گؤردوم. بیری کوردو و یاغان قارا باخیب گولومسوردو.

اسکی دن استانبول داها یوخسول ، داها کیچیک ، داها خوشبخت دئسه لر اینانمازدیم بلکی ، آما قلبیم بئله دئییردی. چونکو آرخامدا بیراخدیغیم سئوگیلیمین ائوی یئرلی یئرینده جؤگه ( ایهلامور ) و شاه بلوط آغاجلاری نین ایچینده ایدی ، آما قاپیدان سوروشدوم بیر باشقاسی اوتوروردو آرتیق اورادا. سئوگیلیمین آناسی ، خالام ، اؤلموش ، عم اوغلوم لا قیزی داشینمیشلار و بئله وضعده قلبیزی و خیاللاریزی نئجه ده آجیماسیزجا سیندیردیقلارینی هئچ بیلمه ین قاپیداکی آداملارین سؤیله دیغی کیمی ، باشلاریندان بعضی فلاکتلر کئچمیشدی. سیزه ایندی بونلاری آنلاتماییم دا اسکی باغچاداکی جؤگه آغاجینین شاخه لریندن کیچیک بارماغیم بؤیوکلوغوندا بوز پارچاجیقلاری آسلاندیغینی ، ایستی ، یاشیل و گونشلی یاز گونلرینی خاطیرلادیغیم باغچانین کدردن ، قاردان و باخیمسیزلیقدان اینسانین عاغلینا اؤلومو گتیردی یینی سؤیله ییم.

فامئللرین باشلارینا گلن لرین بیر قسمینی عم اوغلومون منه ، تبریزه یوللادیغی مکتوبدان بیلیردیم ذاتا. او مکتوبدا ، عم اوغلوم منی استانبولا چاغیرمیش ، پادشاهیمیز ایچین گیزلی بیر کیتاب حاضیرلادیغینی ، منیم اونا یاردیم ائتمه می ایسته دیغینی یازمیشدی. منیم بیر دؤنم تبریزده عثمانلی پاشالاری ، والی لر ، استانبولداکی ایسته ینلر اوچون کیتابلار حاضیرلادیغیمی عم اوغلوم ائشیتمیشدی. تبریزده گؤردوغوم ، کیتاب سفارش ائدن ایسته ینلردن پئشین پول آلیب ، ساواشلاردان و عثمانلی عسگرلریندن شکایتجی نقاشلاردان و خطاطلاردان هله ده شهری ترک ائدیب قزوینه و دیگر عجم شهرلرینه گئتمه میش اولانلاری تاپماق و پولسوزلوق و ایلگی سیزلیک دن شکایتجی بو بؤیوک اوستالارا صحیفه لری یازدیریب ، نقش ائتدیریب ، جیلد ائتدیریب کیتابی استانبولا یوللاماقدی. گئنج لی ییمده عم اوغلومون منه کئچیردی یی نقش و گؤزل کیتاب عشقی اولماسایدی هئچ گیره بیلمزدیم بو ایشلره.

عم اوغلومون بیر زامانلار اوتوردوغو کوچه نین مئیدانا آچیلان اوجونداکی سلمانی اوستاسی ، هله ده توکانیندا ، عئینی آینالار ، دولچالار ، صابون تئللری آراسیندایدی. گؤز – گؤزه گلدیک ، آما منی تانیدی می بیلمیرم. ایچینه ایستی سو دولدوردوغو باش یوما قابینین ، تاواندان ( سقفدن ) ساللانان زنجیرین اوجوندا هله ده عئینی یایی چکرک ایله ری گئری ساللاندیغینی گؤرمک نئشه لندیردی منی.

گئنج لی ییمده یورودوغوم کیمی محلله لر، کیمی کوچه لر ، اون ایکی ایلده یانیب ، کول دومان اولوب اوچموشدو دا یئرلرینده کؤپک لرین یول کسدی یی ، اوشاقلاری قورخوتدوغو یانقین یئرلری آچیلمیش ، کیمینه ده منیم کیمی اوزاقلاردان گلنی شاشیرتان ( حئیرته سالان ) زنگین قوناقلاری ( بؤیوک ائولری ) تیکیلمیشدی. بونلارین بعضی لرینین پنجره لرینه ان باهالی سیندان ، رنگلی وئندیک جاملاری تاخیلمیشلاردی. یوکسک ( اوجا ) دووارلارین اوستوندن یاپیشان پنجره لردن یوخلوغومدا استانبولدا ایکی قاتلی بیر چوخ زنگین ائوین تیکیلدیغینی گؤردوم.

باشقا بیر چوخ شهرده اولدوغو کیمی استانبولدا دا پولون هئچ می هئچ ده یه ری قالمامیشدی آرتیق. منیم دوغویا گئتدی ییم ایللرده بیر آغچایا دؤرد یوز درهم لیک قوجامان بیر چؤرک چیخاران تندیرلر ایندی عئینی پولا بونون یاریسی و اوسته لیک دادی دوزو اینسانین اوشاقلیغینی هئچ می هئچ یادا سالمایان بیر چؤرک وئریرلردی. رحمتلی آنام اون ایکی یومورتا اوچون اوچ آغچا سایماق گرکدی یینی گؤرسه ایدی تویوقلار سیرتیلیب باشیمیزا سیچمادان باشقا بیر دیارا قاچالیم ، دئیه ردی ، آما بیلیردیم بو ده یه رسیز پول هر یئری سارمیشدی. فلیمینق دن ، وئندیک دن گلن تجار گمی لرینین صاندیق – صاندیق بو تقلبی پوللارلا دولو اولدوغو سؤیله نیردی. ضربخانالاردا اسکی دن یوز درهم قوموشدن بئش یوز آغچا کسیلیرکن ایندی صفوی لرله قورتولمایان ساواشلار اوزوندن سکگیز یوز آغچا کسیلمه یه باشلانمیش ، یئنی چریلر ( تورک سربازلاری ) ، آلدیقلاری آغچانین خلیجه دوشدوغونده ، سبزه اسکله سیندن دنیزه توکولن قورو پخله لر کیمی سودا اوزدوغونو گؤروب عصیان ائتمیشلر و دوشمن قالاسی ایمیش کیمی پادشاهیمیزین سارایینی محاصره ائتمیشلردی.

بیازید ( بایزید ) مسجدینده وعظ وئرن و حضرت محمد سویوندان بیر سئیید اولدوغونو اعلان ائدن نصرت آدلی بیر واعظ ده بوتون بو اخلاق سیزلیق ، باهالی لیق ، جنایتلر ، اوغرولوقلار سیراسیندا آد سالمیشدی. ارض رومی دئییلن واعظ ، سون اون ایل ایچریسینده استانبولو بوروین بوتون فلاکتلری ، باغچا قاپی و قازان جیلار محلله سی یانقین لارینی ، شهره هر گیریشینده اون مین لرجه اؤلو آلان وبایی ، صفوی لره قارشی ساواشدا او قدر جان وئریلمه سینه قارشین بیر سونوج ( نتیجه ) آلماماسینی ، باتی دا خیریستی یانلارین ( مسیحی لرین ) عصیانلار چیخاریب کیچیک عثمانلی قالالارینی گئری آلمالارینی ، حضرت محمدین یولوندان جایماسی له ، قرآن کریمین امیر لریندن اوزاقلاشیلماسی ، خیریستی یانلارین خوش گؤرولوب ، سربستجه ( آزادجا ) شراب ساتیلیب خیاوانلاردا چالقی چالینماسی ایله آچیقلاییردی.

منه ارض روملو واعظ دن هیجانلا بحث ائدیب بو خبرلری وئرن تورشوجو ، مئیدان بازاری ساران تقلبی پولون ، یئنی قیزیل سیککه لرین ، آصلانلی تقلبی پوللارین ، قوموشو گئتدیکجه آزالان آغچالارین عئینی کوچه لری دولدوران چرکزلر ، آبازارلار ، مینقریاحلار ، بوشناکلار ، گورجولر ، ائرمنی لر کیمی اینسانی کسین و گئری دونوشو زور بیر اخلاق سیزلیغا سوروتله مه سینی سؤیله دی. اخلاق سیزلار ، عصیانکارلار قهوه خانالاریندا توپلانیرلارمیش ، صاباحلارا قدر غئیبت ائدیرلرمیش. افیون کش معتادلار ، قلندری خرابالاری آللاهین یولو بودور دئیه قهوه لرده صاباحلارا قدر موسیقی ایله اویناییب ، اورالارینا بورالارینا شیشلر سوخوب ، هر جور ادب سیزلی یی ائتدیکدن سونرا بیر بیرلرینین و کیچیک اوغلانلارین ایشینی یئر به یئر ائدیرلرمیش.

دادلی بیر عود سسی ائشیتدیم ده اونو مو آختاریب ایزله دیم ، یوخسا خاطیره لر و ایستک لریم دئدیغیم عاغیل قاریشیقلیغی زهر تورشوجویا داها آرتیق دایانا بیلمه ییب منه بیر چیخیش یولو مو وئردی ، بیلمیرم. بیلدی ییم ، بیر شهری سئورسه نیز ، اورادا چوخ گزرسه نیز ، ایللر سونرا او شهرین کوچه لرینی یانلیز روحونوز دئییل ، کؤوده نیز ( بدنینیز ) ده اؤزلوغوندن ائله بیر تانیر کی ، قارین کدرلر – کدرلی سپه لدی یی بیر کدر آنیندا آیاقلارینیز سیزی اؤزلوغوندن سئودی یینیز بیر تپه یه چیخاریر.

بئله جه نعلبند مئیدانیندان آیریلیب سولئیمانییه مسجدینین دوز یانیندان خلیجه یاغان قاری سئیر ائتدیم : قوزئیه ( شیمالا ) باخان داملاردا ، قبه لرین نسیم آلان گوشه لرینده قار ایندی دن توتموشدو. شهره گیرن بیر گمی نین منه پیر – پیر سلام یوللایاراق ایندیریلن یئلکن لری ( بادبان لاری ) خلیجین اوزو ایله عئینی کول دومان رنگینده ایدی. سرو و چینار آغاجلاری ، داملارین گؤرونوشو ، آخشام اوستونون حزنی ، آشاغی محلله لرین ایچ سس لری ، ساتیجی لارین باغیریشلاری و مسجد حیه طینده اوینایان اوشاقلارین چیغیرمالاری باشیمدا بیرلشیب ، منه هئچ شاشمایاجاق بیر شکیلده بوندان سونرا حایاتیمین شهریندن باشقا بیر یئرده یاشامایاجاغیمی ائشیتدیریردی. بیر آن ، سئوگیلیمین ایللردیر اونوتدوغوم اوزو گؤزلریمین اؤنونه گله جک ساندیم.

یوققوشدان آشاغی ایندیم. شلوغلوق ایچینه گیردیم. آخشام اذانیندان سونرا بیر جیگر چی توکانیندا قارنیمی دویوردوم. بوش توکانین پیشیک بسله ین کیمی شفقتله تیکه لریمه باخاراق منی بسله ین صاحیبینین آنلاتدیقلارینی دیقتله دینله دیم. اوندان آلدیغیم ایلهام و آدرسله ، کوچه لرین یاخچی جا قارالماسیندان سونرا اسیر بازاری نین آرخالارینداکی دار کوچه لردن بیرینه گیردیم ، بورادا قهوه خانایی تاپدیم.

ایچه ریسی شلوغ و ایستی ایدی. تبریزده ، عجم شهرلرینده بیر چوخ بنزرلرینی گؤردوغوم و اورادا مداح دئییل ده پرده دار دئییله ن حیکایه جی آرخادا اوجاغین یانیندا بیر یوکسلتی یه یئرلشمیش ، تک بیر رسیم ، گؤبود کاغاذا ته لسیک ، آما هنرله چکیلمیش بیر کؤپک رسمی آچیب آسمیش ، آرادا بیر رسیمدکی کؤپه یی اشارت ائده – ائده جیکایه سینی او کؤپه یین آغزیندان آنلاتیردی.

آغا

یازان : م . ا . 

بؤیوک باباما آغا دئیه ردیک . آغام ان بولوجو چوخ قوجا . داییم گیلدن بیزه ایکی ائو آرا وار ، گونده اونلاردان بیزه گلیب قاییداردی. آغام قوجا اولدوغوندان بیر الینده آغاجدان چلیک ، باشقا الیندکی چلیک نوه لر اولوردو. من ایسه هامیدان چوخ. اونا گؤره منی چوخ سئوه ردی.

ائله بو قاییتمالارین بیرینده آنام منه " اوغول آغاوی آپار دایین گیله " دئیه آغامین الین الیمه وئردی. آغامین الیندن یاپیشماسام یئرییه بیلمز، من دئیه ردیم. سونرالار بیلدیم آغام منیم الیمدن یاپیشارمیش!

آغام بیر گون زور یئریشیندن منه دئدی " اوغول دایان دینجه لیم " ، سسی توتولوب آغلادی ، " بیر گون بو کوچه نی مه للاق آشا – آشا گئدردیم ایندی ایسه... " بوغازی بیچیلیب قه هه ر دانیشیغا بئجیت وئرمه دی .

من اونونلا بو حالی دوشونمه دیم ، من آغاما گولدوم آغاج گولمه دی ، ائله منله او آغاج چلی یین فرقی بو. آغاج بیلدی نییه دینمیر ، من بیلمه دیم نییه گولدوم . آغاج جان دا اولمادیم!...

گوله نین باشینا گلر ، 24 ایل کئچیب ، آنام آخسیر ، اونون دؤزومو چوخ ، آغلاماز. من اونا باخیب آغامین آغلادیغی یادیما دوشوب آغلیرام. ایندی ایسه بیلیرم نییه آغلیرام.

آذربایجان منه آغام اولوب تبریز آنام. آغام اؤلوب آنام آخسیر. نوه لر .... دانیشیر ، کیمسه اونون الیندن یاپیشار ، آغاجلار کسیلیب ، کیمسه اونا چلیک اولار ، کیم آغلاییب کیم گوله ر ، اونون دؤزومو چوخ ، آغلاماز ، من اونا باخیب آغلارام . اوره ییم دولو آهیم تئز توتار. منی آغلار گؤروب گولن بیر ائل اولسا اونون ائلینین باشینا گلسین.

منیم آدیم قیرمیزی

یازان : اورهان پاموک

آذربایجان تورکجه سینه کؤچورن :

 رسول ملک زاده

1 –  من اؤلویم

شیرین – 5 ( سون بؤلوم )                     

دوستاغین ایلک گئجه سینده ، دوواردا یئری ین سوسه ریلرین سسی له اویاندیم. قورخودان بیر کنارا سیخیلیب دیزلریمی قوجاقلادیم. ایلک گونلر سوسه ریلردن قورخسامدا یاواش – یاواش تک آداملیق دوستاغین ایچینده اونلارین دا اولماسی لازیم دیر دئیه دوشوندوم. حتی اونلارلا دوست اولوب دانیشماغادا باشلادیم ، سانکی بوندان سونراکی حایاتیمدا اونلار هر یئرده واردیلار ، قبریمده بیله!

سحره یاخین دوستاغین دمیر قاپی سینین تاققیلتی سی دیسگیندیردی منی ، بیر بارداق سامان سویو کیمی چای ، بیر پارچا چؤره ک ، کیفیر بیر مژمئیی نین ایچینده ، یئره چیرپیب گئتدیلر ، من اؤزومه گلینجه ، سوسه ریلر یئتیشمیشدیلر چؤره یه!

هاواسی چوخ آغیر ایدی دوستاغین ، آما نفس آلیب آلماماق نه فرق ائدر ، بیر یئردکی یاشاماقدان اثر قالماز دووارداکی سوسه ریلر ده اولماسا!

اؤز - اؤزومه دانیشیردیم ، یئر اوزوندکی اینسان ، تانری یئرینده اوتوروب ، اونون یاساقلاریندان سؤز ائدیب ، جانلارا قییا بیلیرمی؟ اگر بو جانی تانری وئریب تانری آلاجاقسا ، سیز کیم اولورسوز؟ چکیلین آرامیزدان!

ساعاتلر کئچدیکجه اوره ییم سیخیلیردی ، سانکی دووارلار اوستومه گلیردیلر ، 4 دووار اوستونده دیرناقلا قازیلمیش بوش خیاللار ، ییخیلمیش آرزیلار ، عیصیانلار ، منه باخیردیلار ، دانیشیردیلار ، منسه دوشونوردوم ، یعنی آزدا اولسا بیر اومود وار می؟

زامان ، ساده جه بیر آز زامان ، اوشاقلاریم اوچون ، آما بو دیرناقلا قازیلمیش دووارلار منی ده جایدیریبلار ، گؤرونن او کی بورا گلن هر کس بو یوللاردان بیر – بیر کئچیر ، بلکی ده محکمه نین منه توتدوغو وکیل ، حاقلی دیر ، بو قادین دلی دیر ، بلکی ده!

بو دوستاغین آغیر هاواسی منه اونوتدوروب ، من بیر قادینام ، اؤلن سه بیر ارکک ، من نییه اؤزومو یورورام ، بو یولون سونو بللی دیر ...

بونلاری دوشونورکن ، بیردن دوستاغین پاس باسمیش قاپیسی اوجا سسله آچیلدی ، سویوق قانلی بیر ال ایچری اوزاندی ، محکمه نین حکمونو سول الیمه وئریب گئتدی ، اعدام!

بیر سوره ال ساخلایاجاقلارمیش ، کی من سون گؤره ویمی ده یئرینه گتیرم ، نه ده اولسا من بیر قادینام. بوتون اوشاقلاریمی یئتیم خانایا تاپیشیراجاقلار ، بلکی ده یئنی دوغان کؤرپه نی اوشاغی اولمایان بیر عاییله یه وئررلر ، کیم بیلیر قیزیم نه اولاجاق ، بلکی ده اورتانجیل بوتون بونلارا دایانا بیلمه ییب یئتیم خانادان قاچار ، نه ده اولسا سون گونلرده آتاسی اونا بعضی پوللو ایشلر اؤرگتمیشدی ، بلکی ده سون بئشیک یئتیم خانادا یانلیز قالاجاق ، کیم بیلیر گئجه لر نه یوخولار گؤره جک ، بلکی ده بیر زامانلار نه چتین لیک لرله قورودوغوم عاییله ، یئر اوزوندن تماما سیلینه جک ، هئچ یوخموش کیمی ، بلکی ده!

بیر نئچه گون سونرا تک آداملیق دوستاقدان باشقا بیر یئره آپاریلدیم ، 7 قادین وار ایدی اوردا ، من ده یئنی آنلادیم ، اونلارا دا بو دونیادا یئر یوخموش ، دونیادا بو قدر بوشو – بوشونا یاشایان وارکن! بیلمیرم منیم آیاغیم دوشمه دی ، یا ائله بورانین قسمتی بودور ، ائله بیرینجی گونده قادینلارین بیرینین حکمو گلدی ، یارین صاباح اعدام اولاجاق ، هر کس دوروب اونونلا وداعلاشیردی ، قادینسا ییخیلمیش بیر دووار کیمی ایدی ، اونو هئچ تانیماسامدا گئدیب اوزوندن اؤپدوم ، بوم – بوز ایدی . آز سونرا دوقتور گلیب قادینین قولوندان بیر اینه ویردی ، سونرالار آنلادیم ، مورفین ایمیش ، راحاتلاتسین دئیه ، آما اینانین قادینین دردلری مورفین دن چوخ داها گوجلو ایدی ، سحره جان تاوانا گؤز تیکیب آغلادی . کیمسه یاتمادی او دوستاغدا ، سحره یاخین هرکس اؤزونو یوخویا ویردی ، کیمسه او آنی یاشاماق ایسته میردی ، قاپی آچیلدی ، قادین آیاغا قالخیبان یوخودا ساندیغی دوستاقداکیلارا سون دفعه بیر باخدی ، گئتمه دن اؤنجه یانینداکینین اوستونو چکمه یی ده اونوتمادی ، و سس سیزجه گئتدی ...

آخشاما قدر کیمسه دانیشمادی ، آغیزلاری پیچاق آچمیردی ، اؤلو توزو یاتمیشدی اوستوموزه ، سونوندا بیریسی دیله گلدی :

- یینه 7 قادین قالدیق .

منه دؤندو : - سن ده کیمسه ن ؟ سنی ده هئچ تانیمادیق.

باشقا بیریسی ، بلکی ده تانیماساق یاخچی اولار ، سونرا آیریلماسی زور اولور ، دئدی.

یینه سس سیزلیک اولدو ، من ده بو سویوق هاوانی ایسسی دیییم دئیه ، الیمی آرتیق قاباغا گلمیش قارنیما قویاراق ، 7 قادین دئییل ده 8 قادین ایق ، دئدیم. هامیسی دؤنوب منه باخدیلار ، نه دئدیغیمی آنلامیشدیلار ، - به سحردن نییه دئمیرسن؟ هئچ زاد دا یئمه میسن کی !

دوستاق آیاغا قالخمیشدی ، بیر نئچه دیقه ده ان یاخچی یئری منه وئردیلر ، یئمه ییمی گتیردیلر ، بیر دئدیغیمی ایکی ائتمه دیلر ، نه لر ائتمه دیلر کی ...

اونلار بو دونیادا گؤردوغوم ان یاخچی اینسانلار ، اؤزلری یئمه ییب منه یئدیریرلر ، گئیمی ییب منه گئیدیریرلر ، کیم دئییر آدام اؤلدوروبلر ، یا باشقالاری له اولوبلار ، کیم دئییر؟

بونلاری دئیه نلر ، بو ایشلرین اورتاغی ، سوچلوسو دئییل لر می؟ اولماسالار دا، او دونیادا بیزه ده وئرجکلر دئیه حئساب گئتمی ییبلر می؟ سیزین هر شئ ییز حئساب – کیتاب اوزو ایله دیر ، بیزسه ، سیزین اویونجاقلاریز ، ایشله دیب سونرا ائشی یه آتیرسیز ، بو دونیادا دا ، کیم بیلیر بلکی او دونیادا دا!

دوستاغین قاپیسی هر دفعه آچیلاندا ، اوره ییم چیرپینیر ، یینه بیر قارقا ایچری گیریب ، بورداکیلارا خبر گتیره جک دئیه ، بوگون ده اوره ییم چیرپینا – چیرپینا گؤزلریمی یومموشدوم ، قولاقلاریمی توتموشدوم ، آز سونرا قادینلارین بیری اللریمی قولاقلاریمدان آییردی :

- گؤزون آیدین ، قیزین گلیب دور آیاغا !

آز سونرا قیزیمین قارشیسیندا اوتورموشدوم ، نه ده چوخ دانیشیردی ، منه اومود وئره رک ، دوقتورون دئدیقلارینی بیر – بیر آنلاتیردی ، فیلان ایشی گؤر ، فیلان ایشی گؤرمه دئیه ، جامین دالیسیندان کؤرپه اوشاغا تیکدی یی پالتارلاری گؤستریر، واقت تامامدیر دئییرلر ، گئده – گئده ،سن آللاه گؤزله ، دئییر.

یازیق قیز ، بیر یاندان اوشاغین یولون گؤزلور ، بیر یاندان دا ائرکن دوغماماسی اوچون دوعا ائدیر ، هم سئوینیر ، هم اوزولور ، یازیق قیز .

دوستاغیما قاییتدیقدان سونرا قادینلاری سس سیزجه بیر کناردا اوتورموش گؤردوم . من یوخ کن بیر شئ لر اولدوغو بللی ایدی ، یئریمین ایچینده اوتوردوم ، قادینلارین بیری الیندکی مینجیق لاری ساپا دوزوردو ، باشینی قووزاییبان سوروشدو :

- بونلار 32 دانا ایدی ، بیری یوخدور ، سیز گؤرمه میسیز؟

کیمسه دن سس چیخمادی ، بیردن قاپی آچیلدی ، دوقتور گلمیشدی ، الینده اینه ، او قادینا ساری گئتدی ، دئمک سیرا اونا گلمیشدی ، هئچ ایسته مه دیغی بیر زامان ، قادین مینجیقلاری له مشغولدو ، دوقتورو گؤرونجه ، قیشقیرماغا باشلادی ، اینه بیر نئچه نفرین یاردیمی ایله ویریلدی ، نه وضعده ، یانیمداکی قادین ، سن باخما ، دؤن او اوزه ، دئدی.

آز سونرا قادین کاغاذ تک آغارمیش اللری ایله ، مینجیقلاری بیر – بیر یئره سالیردی ، گئجه نین بیر یاریسی ، سسلر له اویاندیم ، او قادین دوستاق قاپیسینی دؤیوبن باغیریردی :

- گلین ده بو کاغاذ دا یازدیقلاریزی اوزومه سؤیله یین ، آنلیما یازین ، یا هارا سئور سز ، کیشی سیز گلین ...

هر کس اونو یئره اوتورتماغا چالیشیردی ، او ایسه داها بترلشیردی ، تا کی من قارنیمدان یاپیشدیم ، منی گؤرونجه ، سس سیزجه یئره اوتوردو ، سحره جان جینگیری دا چیخمادی ، منی بیر آز یوخو توتدو ، اویاندیغیمدا ، یوخ ایدی آرتیق . بوراسی نه قدر اؤلومه یاخین بیر یئر !

آرتیق آلیشمیشدیق ، ان یاخینلاریمیز ، بیر گئجه ده بیر کاغاذ آلیردی ، سونرا اینه ، سونرا آجی بیر گئجه ، سحر اولونجا دا ، کیمسه دانیشمادان قاپی آچیلیردی ، او قاپی دان چیخان ، بیر داها گلمیردی ...

بیر – بیر گئتدیلر ، ان سونا قالان اوشاغی گؤرمه یی چوخ ایستی ییردی ، حامیله لیغیمین یئددینجی آیینین اورتالاریندا ، اودا گئتدی ، سون آرزیسینا چاتمادان ، هانکی آرزیسینا چاتمیشدی کی !

او گئدن گونون صاباحی سی ، اوزون بیر سانجی باشلادی قارنیمدان ، سن دئمه ، قادین بیر گون ده قالسایدی آرزیسینا چاتاردی . دوستاغین خسته خاناسینا آپاردیلار ، اوشاق 7 آیلیق ایدی ، یانلیز بیر دفعه گؤردوم ، قیز ایدی ، دوقتورلر اونا شیرین قیز دئییردیلر ، کیم بیلیر بلکی آدی شیرین اولار ، ائرکن دوغدوغو اوچون " اوشاقلار مریض خاناسینا " آپاردیلار اونو ، قیزیما تاپیشیردیم.

 بیر آز اوردا قالمالیدیر سونرا آناسینا وئررلر ، دوقتورلرین بیری دئییردی بونلاری ، هر شئ دن خبرسیز.

دوغوم دان 7 گون سونرا ، گئجه نین بیر یاریسیندا ، یوخودا ایکن ، قولومون اینجیمه سینی حیس ائتدیم ، گؤزلریمی آچدیغیمدا ، مورفین اینه سی قولوما تاخیلمیشدی ...          86.7.3