شیرین – 4     

گئجه یاریسیندا یاغیش شیر- شیر یاغارکن ، منیم بیر آیاغیم یاتاغیمدا ، اوبیریسی حیه طده قالیب. قاچا- قاچا حیه طه چیخیرام ، حیه طین بیر طرفینده سولار ییغیشیب ، بیر طرف ده زیغ ، منسه آیاق یالین قاچیرام حوض باشینا ، هر یئریم سو ، آیاقلاریم زیغ ، اوره ییم قالخیر ، ایسلانیب اتاغا دؤنورم آما آز سونرا یینه یاغیش آلتیندایام. نئچه گوندور اوره ییم بولانیر ، بو گئجه داها بتر. فرهاد داش کیمی یاتیب ، هئچ یئریندن ترپشمیر ، شیرین حیه طده قالیب ، او شیرین یوخوسوندان ال چکمیر. بو دونیادا یانلیز قیزیم قیزلیجه یاش گؤزلرینی منه تیکیب ، یانلیز قیزیم ، اودا یاتانمیر ، هردن دالیمجا حیه طه گلیر ، توتولموش سسی له یالواریر :

- گل گئیین دوقتوره گئدک ، سن آللاه گل.

ایندی دوزه لر دئییرم ، سن گئت یات. ال چکمیر ، هر زامانکی کیمی سؤزونده برکینیر ، یاغیش آلتینا گلیر ، اودا ایسلانیر ، حیرصله نیرم ، قیشقیریرام ، گئت یات !

اتاغا گئدیر آما یاتمیر ، قیزلیجه پنجره دن باخیر ، اونا دئیه ن یوخدور او یئرده کی تانری یاتیب ، سن نییه آییقسان؟ یوخسا سنده می بیلیرسن نییه اوره ییم بولانیر ، سن نه زامان بو قدر بؤیودون؟

عومرومده یانلیز 3 دفعه بئله اوره ییم بولانیب. ایندی بونون دؤردونجو اولماسینی دوشونمه ک او قدر زور کی ، پایلاشاجاق کیمسه مده یوخ ، گئدیب کیفیمدن سون سیگاریمی گؤتورورم ، قیزیم یئرینین ایچینده اؤزون یوخویا ویریب ، گؤز آلتیجا منه باخیر ، سیگاری الیمده قیزله دیرم ، حیه طه چیخیرام ، نه ائیلیرم یانمیر ، نه قدر راحات ، نه قدر ده زور ایش ، سونوندا یاریمچیلیق یانیر ، بوتون نفسیمینه ن چکیرم ، اوره ییم قالخیر ، سیگار الیمدن دوشور ، سولار ایچینه ، توپورورم سولار ایچینه ، توپورجه ییم ایکی بؤلونور ، سانکی ایکی نفر توپورور ، یا دا ، ایکی جانلی بیر قادین . نه ده گؤزل فرصت دیر آللاها ، عزراییلا ، شیطانا ، بیر داشلا ایکی قوش ویرماق اوچون ، آما بیلمیرم نییه منه یئتیشه نده هئچ بیری ایشینی باجارمیر ، هئچ بیری .

سحر آچیلاندا ، گئجه راحات یاتانلار ائرکن قالخمیشدیلار ، قیزیم یاتمیشدی ، بو دفعه دوغرودان ، منده آییقلیق لا یوخو آراسیندا بیر یئرده ایدیم ، هر یئریمی سانجی بوروموشدو ، بیردن پیچیلداشما سسلری دیقتیمی چکدیم ، گؤزلریمی زورونان آچیب سسه ساری دؤندوم ، فرهاد اورتانجیلی کنارا چکیب دانیشیردی :

- اولان قورخما ، کیفی گؤستردی ییم آداما آپار ، اونونکو ایله ده ییش ، دورمادان دئدی ییم یئره گئت ، منده سنین دالیندایام ، بیر شیء اولورسا اؤزومو یئتیره رم .

قالخیب یئریمین ایچینده اوتوردوم ، بو آدام نه دئییر؟ اورتانجیل آغ – آبباغ آغاریب ، سون بئشیک هر شیء دن خبرسیز اونلارین ال آیاغینا دولاشیر: - من ده گلیرم ، هارا گئدیرسیز؟ منی ده آپارین !

فرهاد حیرصینه ن اونو ایته له دی ، - گئچ اوتور یئره ، ایندی هامینی اویالداجاقسان .

دؤندو منه باخدی ، منیم آییق اولدوغومو گؤرونجه یولا دوشدو ، اورتانجیلی چکه – چکه .

- دور ، اونو هارا آپاریرسان؟

سایمادی ، اورتانجیل چاره سیزجه دؤنوب منه باخدی ، نه قدر ده قورخوردو ، زورونان آیاغا قالخدیم ، اونلار قاپینی اؤرتوب گئتمیشدیلر ، بیر نئچه آددیم قاپی یه ساری گؤتوردوم آما قاپی یانیندا ییخیلدیم ، سون بئشیک قیشقیردی ، قیزیم اویاندی ، گلیب منی قووزادیلار ، گئچ قویما ، دئدیم ، قیزدا ال آیاغینی ایتیرمیشدی ، قاپینی آچیب کوچه یه چیخدی ، باش آچیق ایدی ، آز سونرا قاییتدی ، - کیمسه یوخ ، نه اولوبدور؟

ایش ایشدن گئچمیشدی آرتیق . ناهاراجان مین دفعه اؤلدوم دیریلدیم. ساعات ایکی یاریمدا یاواشجا گلدیلر ، اورتانجیل یورگون ایدی ، یاتماق ایسته ییردی ، دور ناهاریوی یئه سونرا یات ، دئدیم ، فرهاد دا سوفرا باشیندا اوتورموشدو آنجاق اونو حیه طه چاغیردیم ، اؤز کیفیر ایشله ریوه بو اوشاقلاری قاتما ، دئدیم ، اودا ائله بونو گؤزلی ییردی ، ارکک لی یینی دونیایا گؤسته رمه لی ایدی ، اوشاقلار گلدیلر ، قیزیم آرایا گیردی :

- مریض دیر ، ویرما !

بیر آز قیشقیر باغیر سالیب گئتدی ، گئدرکن منیم آجیغیما اورتانجیلین دا الیندن یاپیشیب اؤزو ایله آپاردی. ناهاردان سونرا بترلشدیم ، قیزیم گئییندیریب دوقتوره آپاردی ، یولدا ، پولون وار می ؟ سوروشدوم ، اودا سن بونو دوشونمه ، فقط دوزه ل ، دوزه ل ، دئدی. خسته خانادا بو نئچه ایلده ییغدیغی بوتون پوللارینی خرجله دی ، سونوندا دوقتور دردیمی آنلاتدی : - 3 آیلیلق حامیله سیز ، یئییب ایچماغیزا دیققت ائدین ، آغیر ایش گؤرمه یین ، هر 15 گوندن بیر کنترلا گلین  و بیر چوخ سؤز داها کی چوخونو هئچ ائشیتمه دیم. من اؤز آغیرلیغیمی داشیماغا گوجوم یوخ کن ، بیر جان داها اوستومه یوکله ندی. قیزیم دیققتله قولاق آسیردی ، یولدادا سئوینجی نی قیزله ده بیلمیردی : - بو گئجه ائوده کیلره خبر وئره ریک ، کاش بیر قوطو دا شیرنی آلئیدیق .

جیبلریندن قالان پوللارینی چیخاتدی ، 450 تومن پولی قالمیشدی ، بیر آز توتولدو ، کیفیمه باخدیم مین تومنیم وار ایدی ، اونا وئردیم ، گئت آل ، گوله گوله گئتدی ، بیز قادینلار نه قدر ده صاف ایق ، یادا سفئیه !

ائوه یئتیشه نده اورتانجیل ائوده ایدی ، آما فرهاد هله گلمه میشدی ، چوخ حیرصله نمیش ایمیش ، منی یئریمه اوتورتاجاق میش ، اورتانجیل دئییردی ، قیزیم گولدو ، او بیر بیلسه نه اولوب گلر باشیوا دولانار ، دئدی .شامی قیزیم پیشیردی ، منده بیر آز اورتانجیل لا دانیشدیم ، سن ائوین بؤیوک اوغلوسان ، بو اوشاقلاردان دا سن گرک گؤزلی یه سن ، و بونلار کیمی سؤزلر . اودا تعجبله منه باخیردی

 - آنا نه اولوب من بیر ایش گؤرمه میشه م کی .

هئچ بیلمیردی بوگون نه ایش گؤروب ، یادا منه بئله گلیردی. ساعات 12 نی گئچدی ، گلیب چیخمادی ، اوشاقلار یئمکلرینی یئدیلر ، سون بئشیک شیرنی ایستیردی ، قیزیم وئرمیردی

- هامی بیر یئره ییغیش سین ، اوندان سونرا.

سون بئشیک ال چکمیردی ، وئر یئسینلر ، او خبری ده سحر وئره ریک ، دئدیم. قیزیم بیر آز راحاتلادی ، گئجه ایسته دیغی کیمی اولمادی. آز سونرا هامیسی یاتدیلار ، منده فرهاد نییه یوبانیب ، باشینا بیر شئ گلمه سین ، دئیه دوشونوردوم .

قارانلیق بیر جمعه گئجه سی ایدی او گئجه ، گؤیه باخماغا اوره ک دایانمیردی ، گئجه نین بیر یاریسیندا قاپی آچیلدی ایچه ری گیردی ، آرخاسینداندا دوستو دئدی یی آدام ، اللریم تیتره مه یه باشلادی ، دانیشمادان حیه طه چیخدیم حیه طین قارانلیق بیر گوشه سینده اوتورموشدوم ، دیلیم توتولموشدو، گؤزلریمدن یاش آخیردی ، اتاغین ایچی گؤرونوردو حیه طدن ، بیر آز اوتوروب دانیشدیلار ، سونرا فرهاد دوروب دوستونون یئرین سالدی ، یا دا منیم یئریمی ، بیلمیرم .آز سونرا حیه طه گلدی ، الیمدن توتوب زورونان اتاغا چکدی :

من ائشیکده دورموشام ، دئییب ، چیخیب گئتدی . منسه آیاق اوسته ده دورانمیردیم ، دؤنوب قاپی یه ساری یوللاندیم ، ایندی او آدام آرخامدان گله جک دئیه چوخ گؤرخوردوم آنجاق او راحاتجا اوتوروب منه باخیردی ، سانکی بیر فیلم سئیر ائدیردی ، سونونو بیلدی یی بیر فیلم ، الیم قاپی یه ده یدیگی آندا ، دالدان ، " قیزین چوخ گؤزل دیر " دئدی . یئریمده قورودوم ...

سحره یاخین دوستونو قاپی دان یولا سالیب ایچه ری گیرنده ، الیندکی پوللاری دا جیبینه قویدو. سونرا هئچ بیر شئ اولمامیش کیمی گیریب یاتدی. آغیر بیر سس سیزلیک ائوی بوروموشدو ، دوروب پالتارلاریمی گئیدیم ، سون دفعه دونیا گؤزو ایله اوشاقلارا باخدیم ، نه ده گؤزل یاتیبلار ، هر شئ دن خبر سیز ، یا دا منه ائله گلیر ، بلکی ده قیزیم هر شئیی گؤروب !   گؤزلریم ائوین ان ایتی پیچاغینی آختاریردی ، نه تصادوف ، شیرنی قوطوسونون یانیندا ، پیچاغی گؤتوروب حیه طه چیخدیم ، گئجه اوتوردوغوم یئرده اوتورموشدوم ، هاوا ایشیقلانماق ایسته ییردی ، آما گون دوغمادان اؤلوم دوغمالی ایدی بو ائوده ، یوخسا آرتیق اؤزومه ده اینانجیم قالمازدی ، بوتون ایناندیقلاریما آرتیق اینانمادیغیم کیمی .

چادیرامی اوستومه چکدیم ، سحر اوشاقلار قورخماسینلار ، دئیه ، پیچاغی بیله ییمین اوستونه قویدوم ، گؤزلریمی یومدوم ، الیم تیتره ییردی ، پیچاغی الیمده سیخدیم ، سون بیر داها نفس چکدیم ، آما سون آندا ، ایچیمدن بیر سس دانیشماغا باشلادی ، بو گونه قدر هئچ ائشیتمه دیگیم بیر سس :

- سن منیمله دانیشمادان ، نئجه قییارسان جانیما ، بو ائوده اؤلمه یه لاییق بیری وارسا ، اتاقدا یاتان کیشی دیر ، اگر بیرینی ویراجاقسان اونو ویر ، اوجور آتا اولماز اولسون !

ایکینجی جانیمی تماما اونوتموشدوم ، آما او یاواش – یاواش دانیشماق لادا قالماییب ایسته دیکلرینی منه یاپدیردی. بیردن اؤزومو اتاقدا گؤردوم ، فرهادین باشی اوستونده ، نه قدر ده شیرین بیر یوخودا ایدی ، پیچاغی یاواشجا بوغازینا دایادیم ، بو دفعه الیم تیتره میردی ، هئچ آجیمادان کسدیم . پیچاق دوشوندوگومدن ده ایتی چیخدی !

چوخ چکمه دی کی هر یئر قان اولدو آما من نه قانین فیشیلداماسیندان قورخدوم ، نه فرهادین ال آیاق چالماسیندان ، نه ده نفس آلماغا چالیشان کسیلمیش بوغازین اوجادان خیریلداماسیندان ، من ساده جه اؤزومدن قورخدوم ، بو قدر سویوق قانلیلیغیمدان ، بیر زامانلار بیر قاریشقانین جانینا بیله قییمایان اوره ییم ، بیر گئجه ده داشا دؤندو ...                   86.6.6

 شیرین - 3

ایللردیر قورو بیر چایین کؤرپوسوندن کئچه بیلمیرم ، بیر هفته دیر یالواریرام ، بیر هفته دیر ، من نه قدر یالوارسامدا ، کؤرپو یانینداکی داغلار داها منه بئجیت وئرمیر ، کؤرپو باشینداکی دلی یولو کسیب کئچیت وئرمیر ، نه باج آلیر نه یول وئریر ، هئچ بیلمیرم نییه اودا ایشین سئومیر ، بلکی اودا بیلیر بونو ، اریم بیر هفته دیر گلیب . بیر هفته دیر سیگار چکیرم حدسیز حئساب سیز ، دؤرت بیر یانیمی توستولر آلمیش ، ایللر بویودور ساخلادیغیم ناموسومون گئتمه سینی سیزده گؤرورسوز؟ هئچ گؤر اینانیرسیز ، ناموس قورویان کندیسی او ناموسو ساتدی ، ایللر بویودور ساخلامیشام ، اویسا او ، بیر هفته ده ساتدی ...

دوستاقدا چوخ شئ لر اؤرگشمیش ، دوستاغا دوشنده گئدر بیرآز قالار ، دوزه لر چیخار دئیه دوشونموشدوم ، حالبوکی بو آدام بیلمه دیقلارینی دا اوردان اؤرگشیب گلدی ، بو بیر هفته نین هر ثانییه سینده یئنی بیر پیسلیک اورتایا قویدو. آرتیق منیم تانیدیغیم فرهاد قبیرسیز بیر اؤلو ایدی . بوگون قبریستانا آنامی گؤرمه یه گئدرکن ، اوجا سسلی بیر آمبولانس سورعتله یانیمدان کئچدی ، بیرآز اویانلیقدا سسی کسیلدی ، سورعتی آزالدی ، آنلاشیلان بو آجی سس کسیلمه سی بیر اینسانین بو دونیادان کؤچمه سینی خبر وئریر ، قبریستانا یئتیشه نده ، او آمبولانسی سس سیزجه قبریستانا گیرر گؤردوم ، آرخاسیندان بیر سورو آغلایان گؤردوم ، دئمک دلی بعضا آچیر کؤرپو یولون ، دئمک آللاه بعضا سئچیر اؤز قوللارین. بو دونیادا هر کس دن چوخ ، بو دونیادا اولمایان آناملا دانیشارام ، او بیلیر کی بودونیادا  نه چکمیشه م ،او بیلیر کی زامانیندا کیملر قاپیمی دؤیوبلر ، بیر سفرینده ، یئنی بیر ائوه داشین میشدیک ، ائو صاحیبی گلیب قاپیدان ، بیلیرم کی قاباقکی ائویزدن ائشی یه اؤتوروبلر ، آما بوردا پول فیکری ائله مه ، ایسترسن هئچ کیرایه ده وئرمه ، دئدی ، سؤزون کسیرینی ده گؤزلری ایله آنلاتدی ، نه قدر ده اوتانماز بیری ایدی ، قاپینی اؤتدوم ، قاپی دالیندان سن یینه دئدیقلاریمی دوشون ، دئدی ، سحر تئزدن ائوی بوشاتدیم. باشقا بیریسی ، آدام یوللادی کی ارین دوستاقدادیر ، قاضی تئز بوشار ، سن اریندن بوشان ، منده آللاهین امرینه ن ، پیغمبرین بیلمیرم نه منه سینه ن سنی آلارام ،چوخدا ثوابدیر، ساده جه گولدوم ، هر شئ بو قدر راحات می؟ کیمیسی پولی ایله گلدی ، کیمی دینی ایله ، هامیسینی گلیب آناما آنلاتدیم ، هامیسینی الی بوش یولا سالدیم ، ایندی بیر هفته دیر آناما دئییرم کی : آنا بیلیرسن می ، فرهاد چوخدان اؤلموش ، منده خبرسیز ، نئچه ایلدیربوشو- بوشونا گؤزلورم!  سون گونلرده قبریستانا گلنده ، چوخ یاخیندا بورا یولوم دوشه جک ، کیمی بیر حیس سه دوشورم. یئنی قازیلان بوش قبیرلره باخیرام ، هانکیسی منیم کی؟ حتی بیر سفرینده قبریستانین میرده شیرخاناسینا دا گئتدیم ، هاردا یوغولاجاغیمی گؤرمک ایسته دیم ، او آمبولانس داکینی دا بورا گتیرمیشدیلر، اؤلو یاخینلارینین آغلاشمالاری ایچینده ، من یاواش- یاواش او اتاغا یاخینلاشدیم ، بیردن قورخونج بیر آرواد قاپینی آچدی: "- بیر نفر گلسین یاپیشسین ، چوخ آغیردی!" او آغلاشمالار ایچینده مندن سونرا کیمسه اونو ائشیتمه دی ، ایچه ری گیردیم ، غریب بیر قوخو حالیمی قاتیردی ، دایاندیم ، دؤروبره باخدیم ، اؤلونو بیر سککی اوستونده اوزاتمیشدیلار ، آلاسین بیر قادین ، نه قدرده منه بنزی ییر، اگر دوروب او کؤرپونون یولونو نه جور آچدیغینی آنلاتسا ، بوتون حایاتیمی اونا باغیشلارام ، بلکی آللاه دا اونا 140 ایل عومور وئرر، منیم جانیمی آلار." گل یاپیش آخی اؤلدوم " ، میرده شیر چابالیر ، قادینی یوماقدا زورلانیر ، بیرآز داها یاخینلاشدیم ، اؤلو ترپه شدی ، حتی بیر آرا گؤزلرینی ده آچدی ، دیلیم توتولا- توتولا بو ترپه شیر دئدیم ، میرده شیر گولدو ، اگر قورخوسان گئت آیریسی گلسین ، دئدی. میرده شیر حیرصینه ن ایشینی گؤروردو ، قادینی اینجی دیردی ، " من بورا گلنده بوجور یوما ، اولور مو؟ " دئدیم ، بیرآز قالسان سن ده یومالی اولارسان ، دئدی. قاپینی آچیب قیشقیردی:" بو کیمدیر بورا یوللامیسیز، سفئه لییب ، آیری آدام گلسین."  اؤلو یاخینلاریندان 2 قوجا آرواد آغلایا – آغلایا ایچه ری گیردیلر، تانیمادیقلاری اوچون  تعجبله منه باخیردیلار. اتاقدان ائشی یه چیخدیم ، اؤله ن قادینین اری اوتوروب یانینداکیلارلا آغلاشیردی: - ایندی منیم کیم پالتارلاریمی یوواجاق؟ کیم یئمه گیمی پیشیره جک؟

یانینداکی آروادلاردا بیز یاپاریز دئیه ، سؤز وئریردیلر، آنجاق کیشی بونونلا راضی اولماییب ایصرارلا منه باخان اولماز ، چوخ چکمز کی منده اونون یانینا گئدرم ، دئییردی. آما ائله ایندی دن او ایشلری و او ایشلردن داها چوخونو گؤرمه یه حاضیر اولانلار ، صفه دوزولموشدولر. کیشی نه قدر آغلاسادا ، اوره ک سئوینجی بعضا اوزوندن اوخونوردو ، منجه او قادین هله اؤلمه ییب ، میرده شیرین سویوق سولاری ایله گؤزلرین آچیر، آنجاق نییه دئسین کی من اؤلمه میشیه م ، نییه دؤنسون کی بو دونیایا ، اری ائشیکده یئنی حایاتینی قوروب ، یئنی ائشینی سئچیب ، اوره گینده نه فیکیرلر ائدیب ، او قادینین دؤنوب ده بو ایشلری بوزماغا حاققی یوخ ، یاشاماغا حاققی یوخ!  ائوه دؤندوم ، من اؤز باشیما بیر چاره قیلمالی یه م ، بللی کی آللاه او قادینی مندن چوخ سئویر ، منده اؤزومو آللاها سئودیرمه نین بیر یولونو تاپمالی یه م. بو گونلرده آللاه منی سئومه سده ، اوشاقلاریم یاواش – یاواش منیم قیمتیمی آنلا ییرلار ، آتالارینی تانی ییرلر ، ائله بیرینجی گونده ، حیرصله نیب ، سون بئشیگین چرخین سیندیردی ، اورتانجیلا بیر سیللی ویردی ، قیزین اوستونه قیشقیردی ، قاباغیندا دایاندیم ، منده پاییمی آلدیم ، او گوندن بویانا گئجه لر یوبانیر ، ائوه گلنده اوشاقلارین اوره ک لری توتولور. دونن گئجه اؤزوندن بئش بترینی دوستوم دور دئیه ائوه گتیردی ، اوشاقلار یاتمیشدیلار ، قالخیب قیزیمین اوستونو چکدیم ، باشینی دا ، دوستوم دا بو گئجه بوردا قالاجاق ، دئدی ، یئریمیز یوخدور ، هاردا یاتاجاق ، دئدیم ، منیم دوستلاریمینان بوجور سؤزوم اولماز ، ائله بوردا بیزینه ن یاتار ، دئدی ، اوشاقلاری شام آدینه ن اویاتدیم ، یاواشجا ائودن ائشی یه چیخدیق ، یوخولو – یوخولو هارا گئدیریک ، دئدیلر ، دانیشمی یین گلین ، دئدیم. هارا گئده جگیمیزی منده بیلمیردیم ، بو ساعاتدا کیمین قاپیسینی دؤیه بیله رم؟ قونشولارین بیرینین قاپیسینی دؤیدوم ، یانلیز ، یاشلی بیر قادین ، قاپینی آچماسی چوخ چکدی ، یاتمیشدی ، گؤزوم اؤز قاپیمیزدا ایدی ، ایندی اریم گلر دئیه قورخوردوم ، خئیر اولا قیزیم ، دئدی ، اوتانا – اوتانا دئدیم: خالا بو گئجه بوردا قالا بیله ریک؟

قیزیمین گؤزلری دولموشدو ، اؤز ائویزدی ، بویورون ، دئدی ، ایچه ری کئچدیک ، ساغ اولسون هئچ بیر شئ سوروشمادی ، منده دانیشمادان اوشاقلاری یاتیتدیم ، پنجره قاباغیندا اوتوروب سیگار چکمه یه باشلادیم ، قونشو بیر لیوان سو گتیردی ، اوزومه باخیردی ، چوخ اوتاندیم ، سویو یانیما قویوب گئتدی ، پنجره دن کوچه میزه باخیردیم ، بیردن قاپیمیز آچیلدی ، اریمله دوستو کوچه یه چیخدیلار ، دوستو حیرصینه ن بیر شئ لر دئییب گئتدی ، اریم دووارا بیر یوموروق ویریب ائوه دؤندو. دووارا ویراندا ، گؤزوم آغریدی ، سحر ، او یوموروغون تایین ، گؤزومه ویردی ..        

         30/5/86                

شیرین – 2  

سونوندا اوشاقلاری یوخویا وئردی ، ایشیقلاری سوندوردو ، مورادینا چاتدی ، گلیشیندن بللی ایدی ، یانلیز بونون اوچون گلمیشدی . اگر قیزاران گؤزلر ، تیتره یه ن اللر ، دولاشان ساچلار ،اوشاقلارینا باخیب ،

اوره گینده باغیران ، سسی نی چیخاتمایان  بیر قادین ، سویوق ، بوز کیمی  بیر قادین گؤرسه ز ، بیلین کی او منم . گئجه نین قارانلیغی دا قیزلتمیر ، منده کی بو چیپلاقلیغی ، دونیاداکی بوتون گؤزلردن، اوتانیرام . یالواریرام آللاه جانیمی آلسین سحره جان ، جانیمی آلسین ، دیلیمدن دوشمور . هر دفعه سینده ، یانیمدا یاتان ، اریم آدلانان کیشی بوتون تانری لارین دستک ایله جواب وئردی : گئجه یئنی باشلامیش ، داها ائرکن دیر ، داها ائرکن !

 باخین آللاهین جوابینا ، گؤرون کیمین آغزیندان چیخیر !    سون بیر هفته ده اولانلار سورعتله گؤزومون اؤنوندن کئچیر ، خالچانی بیتیردیم ، هیجانلا آلیجی سینی چاغیردیم ، دانیشدیغیمیز 2 میلیون تومن ایدی ، بوتون بورجلاریمی اؤده ییب اوشاقلارا دا بیر شیءلر آلاجاغیمی پیلانلامیشدیم . آلیجی گلیب بیر گؤزو خالچادا ، بیر گؤزو پوللاریندا ، اوچونجو گؤزو منده ، گؤزومون قاباغیندا ساییردی پوللارین ، بازارین کاسات لیغیندان دانیشیردی ، اویاندان- بویاندان دانیشیب سونوندا آغزینداکینی چیخاتدی : میلیون یاریم وئره بیله رم ، خانیم ،بیرده میننت ویردی ، بازاردا بو پولودا وئرمزلر ، خانیم. بیر آندا ال قولوم سوستالدی ، دانیشماغا بیله حالیم اولمادی ، بو پول بورجلاریمی دا زورونان اؤده ر ، نئچه آیدیر گؤزله دیگیم بو گونه لعنت اولسون! نه قدر ده بو خالچایا گووه نمیشدیم ، بونو سایمامیشدیم ، گووه ندیگیم داغلارادا ، قار یاغدی .

چاره سیزجه پوللاری آلدیم ، آلیجی الینی بیله خالچایا سورتمه دی ، حاممال خالچانی قاتتادی ، گؤزلری اللریمده ، بلکی بیر پولدا من وئره رم ، آلیجی گوله- گوله ، حاممال حیرصینه ن دونیامی ییغیب ، گئتدیلر . سون بیر دفعه نئچه آیلیق گئجه یولداشلاریم ، قانیملا بویادیغیم ، گؤز یاشلاریملا سولادیغیم خالچا گوللرینه باخدیم ، گوللرین بیری آغلایا- آغلایا ، نه روحسوز قادین سان ، بیزی نییه ساتدین ، دئیه باغیریردی !

اوشاقلاریما سؤز وئردیگیم شئ لرین هئچ بیریسینی آلا بیلمه دیم ، اونلاردا مندن داها چوخ نفرت ائدیب ، آتالارینین یولونو گؤزله مگه باشلادیلار ، اودا الی قولوندان اوزون گلیرسه ، نه اولاجاق بو اوشاقلارا؟ بونو دوشونوب ده ، بورجلارین بیر آزینی یالوار یاخارلا ساخلادیم ، بلکی او گلن گون بیر شئ لر آلاریز دئیه .

سونوندا دوستاقدان چیخاجاغی گون گلدی چاتدی ، اوشاقلار آتالاری غوربتدن گلیر دئیه چوخ سئوینیردیلر، یانلیز بیر آز قیزیمین توتگونلوغونو حیس ائدیردیم ، سحر تئزدن گئیینیب یولا دوشدوم ، اوشاقلاری ائوده قویدوم ، آتالارینین هاردا قالدیغینی آنلاماسینلار دئیه ،  یئتیش دیگیمده ، بیر آز اؤنجه بیراخدیق ، دئدیلر ، منده ایندی ائوه یئتیشیب دئیه تلاشلانیب ، ائوه دوندوم. ائوده ده دئییل دی ، ناهار چاغی اولدو ، گلیب چیخمادی ، اوشاقلار آجالدی ، سوفرانی آچدیم ،  سوفرادا اونون بشقابی بوش – بوش بیزه باخیردی ، اوشاقلار یئمکلرینی یاواش یئییردیلر ، آتالاری دا گلسین اونلارا قاتیلسین دئیه ، گلمه دی ، یورولدولار ، سون بئشیک یاتدی ، بو دونیادا نه قدر یانلیز اولدوغوموزو یینه ده حیس ائدیردیک ، چیخیب قاپی دا دوردوم ، قادین قونشولار ، هن قیز ارین داها گلمه دی می؟ نه قدر سنه دئدیک بوشان ، گؤر کیمین یولونو گؤزله دین ، دئدیلر ،

یانلیز اولسا ایدیم بوشاناردیم ، دئدیم . قونشولار بیر- بیر ائولرینه گئتدیلر ، یانلیز قالدیم ، هاوا قارالاندا ، گلدی ، منی گؤرونجه بوردا نییه دورموسان ، دئدی ، منده سحردن هارداسان؟ دئدیم .

- ایشلریم وار ایدی ، گؤرورسن کی گلدیم.

- یانیندا پولون وار؟    

 - یوخ نئجه ؟                        

بوتون پوللاریمی اونا وئردیم ، گئت سون بئشیگه چرخ آل ، اورتانجیلا کیف ، قیزادا باشماق ، چوخ باهالی سین دا آلما ، پول گؤرمه ز ، دئدیم. پوللاری آلیب جیبینه قویدو : - هله نه تله سی سن ، سونرا آلاریق !

یانیمدان کئچدی ، قاپینی آچیب ایچه ری گیریردی ، بونلاری آلمادان ائوه گلمه ، دئدیم. حیرصینه ن منه بیر باخدی ، دؤنوب آیاقلارین سورویه- سورویه گئتدی ، منده ائوه دوندوم. قیزیم دئدی :

- چوخ یوباندی ، باشینا بیر شئ گلمه سین  ؟

یوخ قیزیم ، دئدیم ، ایندی گلر. ساعاتلر کئچدیکجه منده یاواش- یاواش او پوللاری وئردیگیمدن پئشمان اولوردوم. اگر آلماسا من نئیله رم؟ آنجاق سونوندا قاپی دؤیولدو ، اوشاقلار هیجانلا قاپی نی آچدیلار ، شوکور ، آلیب دیر ، اوشاقلاری تک – تک قوجاقلادی ، آلدیقلارینی وئردی ، نه راحات تولادی ، منیم پولوملا ، سون بئشیک چرخینه مینیب منه باخیردی ، باخیشی ایله منه دئییردی : نئچه آیدیر سنین آلمادیغین چرخی آتام آلدی ، گؤردون!. بؤیوک قیزیم آتاسی گلدیگیندن به ری باشینی اؤرتموشدو ، بیر آز سونرا باخدیغیمدا ، باش آچیق ایدی آرتیق ، منسه ، هله ده چادیرا باشیمدا ایدی ، هله ده فیکریم گئجه ده .

بو اوزون گئجه ده ، نه دانیشدی ، نه دانیشدیم ، اوشاقلار ائرکن یاتدیلار ، اونلارداهر کس کیمی اونون یانیندا، بوتون دونیا اونون یانیندا ، آللاه دا ایذین وئریردی اونا ، یعنی باشلایا بیله رسن ، کیم توتار سنی ، قارشینداکی اینسان دئییل کی ، سنین قولون ، هئچ آجیما ! نئچه دفعه یورگونلوقدان یوخو توتدو منی ، یینه اویاتدی ، ایسته دیگینی یاپدی ، یینه یورولدوم ، یینه یاتدیم ، یینه اویاتدی ...

سحره یاخین یوخوم قاچدی ، اؤزومدن ایرگه نیردیم ، منده کی بو چیرکین لیک هئچ بیر سودا آرینماز آرتیق ، سویوق یئللر اذان سسی نی گتیرنده ، او یورولوب یاتمیشدی ، آغزی آچیق ، اذان ریتمینده خورولدوردو ،

 منسه ، سویوق اللریمله قولاقلاریمی توتموشدوم ، بو ایکی سسی ائشیتمک ایسته میردیم .

گونش دوغدو ، هاوا ایشیقلاندی ،  آما هله ده اللریم قولاقلاریمدا ، هله ده او ایکی سس کسیلمه ییب ، اؤزومه باخیرام ، باشیمداکی آغ ساچلار نه قدر ده چوخالیب ، بیر گئجه ده ، سون بئشیک هر گونکو عادتی کیمی یوخودان دوروب گؤزلرینی اوغا- اوغا منه ساری گلیر ، آجام آنا ، آجام ، منی گؤرونجه ، قیشقیردی ، قاچدی ...                 16/5/86

شیرین – 1                            

قارانلیق بیر گئجه نین تام اورتاسیندا

بؤیوک بیر شهرین ان قیراغیندا

بایقوش لارین بیله یاتدیغی زامان

کیمسه دئمیر منه نییه آییقسان ؟

ایللردیر بو ائوده خالچالار دوغور

دوغوم گئجه لری چوخ سسلی اولور..

***

ایلک گونلر یازیق اوشاقلاریم یاتا بیلمیردیلر، قونشولاردا سسدن گیلئی لی ایدیلر.آنجاق زامانلا هامیسی آلیشدیلار.ایندی خالچانین آچمیش گوللری ، یاش گؤزلریمه اوجادان گولورلر،آیلاردیر بیتمه یه ن بو گوللر، سس سسه وئریبلر: " تئز اول یئنی گوللر توخو ،تئز اول " نه ده ماراخلی دیلار گؤزیاشلاریمی گؤرمه یه !

سحره جان بیر آز داها توخومالی یم ، بیر آز داها ، 5 آی قاباق سون پوللاریمیز دا خرجله ندی ، بیر قادین ، 3 اوشاق ، آجیماسیز بیر دونیا ، وار یوخومو ساتدیم ، یئتمه دی ، آرتیق ساتاجاق بیرشیء ده یوخ ، اگر ناموسلو شرفلی اولسام ، گونلردیر باغیریرام اوتانماز آوجیلارا ، ساتاجاق بیر شیءییم یوخ قارداشیم !

بو خالی بیر قورتولسا ، منده بیر گئجه راحات یاتارام ، خروزلار بانلاسادا دورمام ، قییامتلر قوپسادا ، یانلیز آج اوشاقلاریم منی او آغیر یوخودان اویالدا بیلر ، یانلیز آج اوشاقلاریم !

سونرا یئنی بیر خالچا باشلارام.

ائولندیگیم گئجه تانیمادیغیم بیریسی قولاغیما " بو ائوه آغینان گیریب آغینان چیخاجاقسان " دئدی.

آنجاق او بیلمیردی بو ایکی آغین آراسیندا آدام نه لر چکیر. من بیر شیء آنلامادان بیرینجی آغی اوستومه گئیدیردیلر. نه لرین الیمدن چیخدیغینی چوخ گئج آنلادیم، ایکینجی آغی گئیماق ایسته دیم ، بو دونیانین داشین آتماق ایسته دیم ، آنجاق دالبادال گلن 3 اوشاق قارشیمدا دوردو. بو دونیادا یانلیز اونلارا بورجلویام ، بیر گون منی قارقیش ائده جکلر ، بیلیرم ، او گون هانسی داشین آلتیندا اولاجاغام؟

باخ یینه بارماغیمی کسدیم ، باغلی ییرم ، دورمور ، بو سویوق قان نییه کسیلمیر؟ دونن ده کسمیشدیم ، کهنه یارا دئشیلیر ، اوره گیمدکی یارالار کیمی ، خالچانین آغ یئری قیزاریر ، سیلیرم، گئتمیر ، یاییلیر ، بو خالچا اوستونده هانسی حاجی ناماز قیلاجاق ؟ کیم بیلیر دوشه ر یا دوشمز!

بلکی آنام دا منی بئله نچی بیر خالچا اوستونده دوغوب . آدیمی شیرین قویدو ، بختیمی آجی

یازدی ، اؤز بختی کیمی . اؤزومو تاپمامیشدان ، تانیمامیشدان ، بیریسی تاپیلدی ، داغ قازمامیشدان ، فرهادیم اولدو ، داغ قازماسادا ، بیر قویو قازدی ، همده نه قویو!

اوشاقلیق چاغیندا قادین اولموشدوم ، چوخ چکمه دی کی قولچاقلار یئرینی اوشاقلار آلدی . بو فرهاد ، چوخ تئز سوغودو ، 3 اوشاق الیمه وئریب ، یوخ اولدو گئتدی . بیر سوره سونرا خبری دوستاقدان گلدی ، بو فرهاد دونیادا چوخلارینا قویو قازیرمیش ، منده یانلیز منه قازیر سانیردیم!

اوشاقلاریم آتالارینی ائله ده تانیمیرلار . بؤیوک قیزیمین بیر آز یادیندا قالیب ، بیر گئجه

سحره جان آناسینین دؤیولمه سینی ، قیشقیرماسینی ، قونشولار قاپینی دؤیدولر ، فرهاد داها چوخ حیرصله ندی ، " سسی وی دونیا عالم ائشیتدی بئحیا " دئدی . قونشولار قاپی دؤیماقدان یورولوب گئتدیلر ، آما فرهاد یورولمادی ، گئجه لر یورولمازدی!

ائشیکده اسن سویوق یئللر ایچه ری گیریر ، سویوق اللریمه ده ییب ، قویور قاچیر ، بو ائو هر زامان کی کیمی سویوق دور ، سون بئشیگیم اوستونو آچیب ، اؤسگورور ، اونا دا سویوق ده ییب ، قالخیب اوستونو چکیرم ، یوخودا اؤز اؤزونه دانیشیر : " محمد بیر دوور ده وئر من سوروم دا ، وآللاه باشاریرام.." نئچه آیدیر چرخ ایستی ییر ، منده بوگون صاباح ائلی ییرم ، بو خالچادا قورتولمور کی ، بوردا یئکه لیر ، زنگین لر ائوینه گئدنده کیچیلیر!

ائشیکده اسن سویوق یئللر بو دفعه اذان سسی نی ایچه ری گتیریر ، نئچه مسجدین اذان سسی ایچه ری گیرماقدا بیر بیریله یاریشیر ، منسه ، الیم قان ، اوره گیم قان ، هر یئریم قان ، نییه آللاه منیمله دانیشماغا گلمیر؟ هر گون بو ساعاتدا یولونو گؤزله رم ، نییه آللاه نامازینی قیلمیر؟

اوتوروب ایشیمه دوام ائدیرم ، او گلمز ، نییه گلسین ، ساغ اولسون بیر هفته سونرا اریم گله جک ، اوشاقلار سئوینیرلر ، دده لری غوربتدن گلیر ، اورا ایش اوچون گئتمیشدی ، اونلارا بئله دئمیشه م. سون بئشیگیم دئییر :

" سن پیس سن با ، آقاجانیم گلسه منه چرخ آلاجاق " ، اورتانجیل اوغلوم دئییر : " گلسه دییه جگم، هفته ده بیر سئری دویو قویوردون ، اوندان سونرا بیر گون یئر آلما بیر گون ده یومورتا پیشیریردین ، آقاجانیم گئدیب غوربتده ایشلی ییر سنده بوردا دوز عمللی یئمک پیشیرماغی دا باشارمیسان ، ائله فیکرین خالچا توخوماقدا قالیب ، به او یوللادیغی پوللار هارا گئدیر؟" بو اوشاقلاردا هئچ گؤرمه دیقلاری آتالارینی مندن چوخ سئویرلر ، بؤیوک قیزیم دئییر : " آقاجان گلسه یینه سنی دؤیه جک ؟"

بیلمیرم، اونو تانیمیرام ، 12 ایل دوستاقدان سونرا اؤزگه بیر کیشی کیمی ائویمه گلیر ، گؤره سن بیر آز اولسون

ده گیشیب می ؟ بیلمیرم ، اونونلا نه دانیشاجاغام ، نئجه یاتاجاغام اونونلا؟ بیلمیرم ، بو منیم ایکینجی ائولیلیگیم می؟ او دا منیم کیمی دوشونور مو؟ بیلمیرم ، بیلمیرم...

۸۶.۵

اؤزونو اؤلدورن بیر قیزین سون مکتوبو

بو یازینی اوخودوغونوز زامان ، من چوخدان او دونیایا گئچمیشم ،او دونیا آدیندا بیر یئر اولورسا اگر ، چونکو گئجه لر ،یئریمین ایچینده ، آللاهینان پیچیلداشدیغیمدا ، دردلشدیغیمده ، یاواشجا آغلاشدیغیمدا « اوتای دا گؤزلی ییرم سنی ، گل» دئمه زدی .

بلکی سیزده هر زامان اینتیحار سؤزو گلنده ، « بو ایش گوناهدیر ، قرآندا آیه سی وار ، بو جانی سن یاراتما میسان کی سن آلاسان » و بونلار کیمی بیر چوخ ساچما سؤزو آغزیزا گتیریرسیز ، قورخاقلار ! اگر اؤزوزو اؤلدوره بیلمیسیز ، سیزده قورخاقسیز . من ان آزیندان بو دونیایا گلیشیمی اؤزوم سئچه بیلمه سمده ، بو دونیادان گئدیشیمی اؤزوم سئچدیم : گئجه هامی یوخودا ایکن ، یاواشجا آنامین اوزوندن اؤپدوم ، آتاما نفرتله باخدیم ، کیچیک قارداشیمین اوستونو چکدیم ، یازیق باجیلاریما گؤزلریم دولدو ، اوشاقلیق دا اویناتدیغیم قولچاغیمی قوجاقلادیم ، اونونلا بیرلیکده سون دفعه گؤیدکی اولدوزلارا باخدیم ، من آغلادیم ، اودا آغلادی ، سونرا ، بیرلیوان سو ، ایکی بسته یوخو هپبی ، سونرا ، یاشاسین اؤلوم !...

بیلیرم کی سون آنلاریمدا ، او آغیر یوخو اوستومه جومدوغوندا ، آصلا پئشمان اولمایاجاغام . بلکی ده اؤزومه اوره ک وئرمک اوچون ، دونن اوخودوغوم خبری خاطیرلی یه جگم . تاکستانین « آغچا کند» کندینده  بیر سنگسار خبری، اؤز دیلیمیزده داشینان آدام اؤلدورمک ، بیر آدامی یئره قویلی ییب ، اؤله نه قدر باشینا داش ویرماق ، نه یازیق کی بودا قرآندا وار ، خوشوزا گلدی؟

حتما دئییرسیز نییه اؤزوو اؤلدوردون اونو آنلات ،او زامان سیزدن سوروشورام منه  یاشاماق اوچون بیر نه دن گؤرسدین ، بیلیرم کی ایندی باشلی ییب دونیانین گؤزل لیقلارینی منه سایاجاقسیز آما من بونلارین هئچ بیریسینی یاشامادیم ، حتی من بو دونیایا گلمه گی ده ایسته مدیم ، آصلیندا آنام بابام دا بئشینجی اوشاقلارینین دوغماسینی ایسته میردیلر، آما یازیقلار بیلمیردیلر نئجه قاباغین آلمالیدیلار. هر سئری اوشاقلاری اولاندا قاش قاباقلارینی ساللی ییب " آللاه وئریب روزی سینی ده اؤزو یئتیرر " دئییردیلر و یئنی بیر اوشاقلاری اولماماسی ایچین دوعا ائدیردیلر. آما سیزده بیلیرسیز ، بو ایشلر دوعا ایله اولماز. اگر بو مکتوبو آتاما اوخوساز ، بیلیرم کی ایندی اؤز اوره گینده دئییر: - آخی بو قیز اوشاق ایدی ، بو سوزلری هاردان بیلیر؟

منده بوردان آجیق وئرمک اوچون ، اونا دیلیمی چیخاردیرام، یازیق سنین دونیادان  خبرین یوخ ، من داها نه لر بیلیردیم ، نه لر. چوخ یوخوم گلیر ، یاواش یاواش گؤزلریم یومولور ، بلکی ده بو آغیر یوخو اؤزومو اؤلدوردوغومون نه دنینی یازماغا ایذین وئرمه یه جک ، آما سون نفسیمه قدر یازاجاغام ، بو گئجه 18 ایل اوره گیمده قالان سؤزلری قیشقیراجاغام ، ائشیدن اولورسا اگر.

آتا بیلیرسن نه قدر سئوینیرم؟ بو دونیادا بیر دفعه ده اولسون سنین سؤزون گئچمه دی ، منی ساتا بیلمه دین ، او یاشلی ، چیرکین کیشی یه ، او کیشی دن نوزوللو پول آلمیشدین ، قایتارا بیلمیردین ، اونون آیاغی بیزیم ائوه آچیلمیشدی ، هر دفعه سینده اوندان بیر نئچه گون وقت ایستی ییردین ، آما او آصلیندا او پولو ایسته میردی کی ، اونون گؤزو سنین قیزلاریندا قالمیشدی ، قیزلاریوین ایچیندن منی سئچدی، ان کیچیک قیزیوی ، منیم 18 یاشیم ، اونون دا اؤز دئییشی 58 یاشی ، نه گؤزل! سن ده هئچ اعتراض ائتمه دین ، سانکی بیر حئیوان ساتیرسان ، فیکرین چک لرینده قالمیشدی ، منیم فیکریمی سوروشمادین ، " قیزین ایختییاری آتاسیندادیر " دئدین ، " اوندان یاخچی ار تاپا بیلمه سن " دئدین .پول سنی ائله کیریختیرمیشدی کی ، هر ایشی تئز یئر به یئر ائله مگه چالیشیردین . سنی هئچ بو قدر زیرنگ گؤرمه میشدیم. یارین بوتون رسمی ایشلر قورتولاجاق ایدی. سن چک لریوی قوجاقلایاجاقدین ، او کیشی ده ...

بیلیردیم کی او گئجه اؤله جگم ، سیز نه قدر ده بو ایشی گوناه بیلسز ، من بیر گون تئز اؤلمه گی سئچدیم ، اولکر کیمی ! او کیشی او گؤزل گئجه سینی یاشایا بیلمه دی . بو منیم اؤلومومه سبب اولسادا اونون اوچون او قدر ده اؤنملی دگیل. کیم بیلیر بو گونه قدر ، نئچه دفعه او گئجه نی یاشامیش . اونا فرق ائله مز کی ، من اولماسام 19 یاشینداکی باجیم ، او اولماسا 20 یاشینداکی ، او دا اولماسا باشقا بیر بورجلوسونون قیزی ، 20 یاشدان اوسته گئتمه دیم چونکو 20 یاشدان اوسته بیر قیز او کیشی اوچون بیر آز یاشلی ساییلیر! بلی اینسان هوسلی دیر ، اینسان دویماز ، یاشاسین حئیوان کیمی یاشاماق !                                                                   

بو سیزین بو دونیانیز ، او دونیا اوچون ده دئییرسیز کی یاخچی کیشی لره گؤزل حوری لر وار ، چوخ گؤزل ، آما یاخچی خانیم لارا نه لر وار؟ اوجا بویلو کیشی لر می؟

من یینه سفئه لدیم ، سون نفسیمده ده بو فیکیرلر منی راحات بیراخمیر ، گؤزلریم یومولور ، چوخ یوخوم گلیر ، چوخ ...

                     20/4/86